ສົງຄາມການຄ້າ ຢຸດຕິຊົ່ວຄາວ

    ກອງ​ປະ­ຊຸມ​ກຸ່ມ​ປະ­ເທດ G20 ທີ່​ມີ​ຂຶ້ນ​ລະ­ຫວ່າງ ວັນ​ທີ 28-29 ມິ­ຖຸ­ນາ 2019 ຜ່ານ​ມາ ທີ່​ເມືອງ​ໂອ­ຊາ​ກາ ປະ­ເທດ​ຍີ່­ປຸ່ນ ມີ​ເຫດ­ການ​ພົ້ນ​ເດັ່ນ​ນັ້ນ​ຄື: ການ​ປະ­ຊຸມ​ນອກ​ຂອບ​ຂອງ​ປະ­ທານ​ປະ­ເທດ​ຈີນ ສີ ຈິ້ນ​ຜິງ ແລະ ໂດ​ນານ ທຣຳ ປະ­ທາ­ນາ­ທິ­ບໍ­ດີ ອາ​ເມ​ຣິ​ກາ ຜົນ​ການ​ພົບ​ປະ​ເຈລະ­ຈາ​ປາ­ກົດ​ວ່າ​ຕ່າງ​ຝ່າຍ​ຕ່າງ​ຍອມ​ຖອຍ​ຄົນ​ລະ​ກ້າວ ແລ້ວ​ເລີ່ມ​ໃຫ້​ມີ​ການ​ເຈລະ­ຈາ​ການ​ຄ້າ​ອີກ​ຄັ້ງ.

    ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ (VOVWORLD) ສະ­ບັບ​ອອນ​ລາຍ ລົງ​ວັນ​ທີ 4 ກໍ­ລະ­ກົດ 2019 ມີ​ບົດ​ໃນ​ຫົວ­ຂໍ້: ຄວາມ​ສະ­ຫງົບ​ງຽບ​ຊົ່ວ­ຄາວ​ໃນ​ສົງ­ຄາມ​ການ​ຄ້າ​ອາ​ເມ​ຣິ​ກາ-ຈີນ ມີ​ບາງ​ຕອນ​ຂຽນ​ວ່າ:

    “...ທີ່​ການ​ພົບ​ປະ​ໃນ​ວັນ​ທີ 29 ມິ­ຖຸ­ນາ ຢູ່​ນອກ​ກອງ​ປະ­ຊຸມ G20 ທ່ານ​ປະ­ທາ­ນາ­ທິ­ບໍ­ດີ Donald Trump ໄດ້​ຕົກ­ລົງ​ເຫັນ​ດີ​ໂຍະ­ຍານ​ບາງ​ຂໍ້​ຈຳ­ກັດ​ສຳ­ລັບ​ກຸ່ມ​ບໍ­ລິ­ສັດ​ໂທລະ​ຄົມ­ມະ­ນາ­ຄົມ Huawei ຂອງ​ຈີນ ໂດຍ​ອະ­ນຸ­ຍາດ​ໃຫ້​ບັນ­ດາ​ບໍ­ລິ­ສັດ​ເຕັກ​ໂນ​ໂລ​ຊີ​ອາ​ເມ​ຣິ​ກາ ສົ່ງ​ອອກ​ເຄື່ອງ​ອຸ­ປະ­ກອນ​ໃຫ້​ແກ່​ກຸ່ມ​ບໍ­ລິ­ສັດ​ນີ້ ພ້ອມ​ທັງ​ຈະ​ເລື່ອນ​ກຳ­ນົດ​ເວ­ລາ​ການ​ຈັດ​ວາງ​ອັດ­ຕາ​ພາ­ສີ​ສຳ­ລັບ​ສິນ­ຄ້າ​ນຳ​ເຂົ້າ​ຈາກ​ຈີນ ທີ່​ມີ​ມູນ​ຄ່າ 300 ຕື້ USD.

    ເຖິງ​ຢ່າງ­ໃດ​ກໍ​ຕາມ ທີ່​ປຶກ­ສາ​ດ້ານ​ການ​ຄ້າ​ຂອງ​ທຳ​ນຽບ​ຂາວ​ໃຫ້​ຮູ້​ວ່າ: ນີ້​ບໍ່​ແມ່ນ​ການ​ຜ່ອນ​ສັ້ນ​ຜ່ອນ​ຍາວ ພ້ອມ​ທັງ​ເນັ້ນ​ໜັກ​ເຖິງ​ນະ­ໂຍ­ບາຍ​ຂອງ​ວໍ​ຊິງ​ຕັນ ທີ່​ກ່ຽວ­ຂ້ອງ​ເຖິງ​ລະ­ບົບ 5G ຂອງ Huawei ແມ່ນ​ບໍ່​ມີ​ການ​ປ່ຽນ­ແປງ ທຸກ​ສິ່ງ​ທຸກ​ຢ່າງ​ທີ່​ອາ​ເມ​ຣິ​ກາ ໄດ້​ເຮັດ​ໄປ​ນັ້ນ ໂດຍ​ພື້ນ­ຖານ​ແມ່ນ​ອະ­ນຸ­ຍາດ​ຂາຍ Chip ໃຫ້ Huawei ແລະ ບັນ­ດາ​ຜະ­ລິດ​ຕະ​ພັນ​ເຕັກ​ໂນ​ໂລ​ຊີ​ລະ­ດັບ​ຕ່ຳ​ນີ້ ບໍ່​ສ້າງ​ຜົນ​ສະ­ທ້ອນ​ເຖິງ​ຄວາມ​ໝັ້ນ­ຄົງ​ແຫ່ງ​ຊາດ ການ​ຂາຍ Chip ໃຫ້ Huawei ດ້ວຍ​ຈຳ­ນວນ​ໜ້ອຍ​ຍັງ​ບໍ່​ຮອດ 1 ຕື້ USD ຕໍ່​ປີ​ນັ້ນ ໃນ​ໄລ­ຍະ​ສັ້ນ​ພຽງ​ແຕ່​ແມ່ນ​ພາກ­ສ່ວນ​ໜ້ອຍ​ໃນ​ລະ­ບົບ​ບັນ­ດາ​ບັນ­ຫາ ທ່ານ​ປະ­ທາ­ນາ­ທິ­ບໍ­ດີ Donald Trump ໃຫ້​ຮູ້​ວ່າ ບັນ­ຫາ Huawei ພຽງ​ແຕ່​ໄດ້​ຮັບ​ການ​ປຶກ­ສາ​ຫາ­ລື​ໃນ​ຕອນ​ທ້າຍ​ຂອງ​ການ​ເຈລະ­ຈາ​ດ້ານ​ການ​ຄ້າ​ເທົ່າ​ນັ້ນ ສິ່ງ​ດັ່ງ­ກ່າວ​ມີ​ຄວາມ​ໝາ­ຍວ່າ ຊາ­ຕາ­ກຳ​ຂອງ Huawei ຈະ​ຂຶ້ນ​ກັບ​ຂໍ້​ຕົກ­ລົງ​ດ້ານ​ການ​ຄ້າ​ລະ­ຫວ່າງ ອາ​ເມ​ຣິ​ກາ-ຈີນ.

    ກ່ຽວ​ກັບ​ພາ­ສີ ວົງ​ການ​ນັກ​ໄຈ້​ແຍກ​ຖື​ວ່າ​ເລື່ອງ​ທ່ານ Donald Trump ເລື່ອນ​ກຳ­ນົດ​ເວ­ລາ​ຈັດ​ວາງ​ອັດ­ຕາ​ພາ­ສີ 25% ສຳ­ລັບ​ສິນ­ຄ້າ​ຍັງ​ເຫຼືອ​ທັງ​ໝົດ​ທີ່​ນຳ​ເຂົ້າ​ຈາກ​ຈີນ​ນັ້ນ ພຽງ​ແຕ່​ມີ​ລັກ­ສະ­ນະ​ຊົ່ວ­ຄາວ​ເທົ່າ​ນັ້ນ ເພື່ອ​ແນ­ໃສ່​ສ້າງ​ເງື່ອນ­ໄຂ​ສະ­ດວກ​ໃຫ້​ແກ່​ເລີ່ມ​ດຳ­ເນີນ​ການ​ເຈລະ­ຈາ​ດ້ານ​ການ​ຄ້າ​ຄົນ​ໃໝ່ ສິ່ງ​ດັ່ງ­ກ່າວ​ບໍ່​ສາ­ມາດ​ຖື​ໄດ້​ວ່າ​ແມ່ນ​ບາດ­ກ້າວ​ບຸກ​ທະ­ລຸ ແລະ ກໍ​ບໍ່​ມີ​ຫຍັງ​ຮັບ­ປະ­ກັນ​ໄດ້​ວ່າ: ອາ​ເມ​ຣິ​ກາ ປ່ອຍ­ປະ​ຄວາມ​ຕັ້ງ­ໃຈ​ຈັດ​ວາງ​ອັດ­ຕາ​ພາ­ສີ​ສຳ­ລັບ​ສິນ­ຄ້າ​ຂອງ​ຈີນ...”.

    ນັກ​ສັງ­ເກດ​ການ​ຈາກ​ຕ່າງ­ປະ­ເທດ​ໃຫ້​ຂໍ້​ສັງ­ເກດ​ວ່າ: ການ​ຢຸດ­ຕິ​ຊົ່ວ­ຄາວ​ນີ້​ຖື​ວ່າ​ເປັນ​ໄຊ­ຊະ­ນະ​ຂອງ​ຝ່າຍ​ຈີນ ເພາະ​ກ່ອນ​ການ​ພົບ​ປະ​ຝ່າຍ​ຈີນ​ຕັ້ງ​ເງື່ອນ­ໄຂ​ວ່າ ຝ່າຍ​ອາ​ເມ​ຣິ​ກາ ຕ້ອງ​ຢຸດ­ຕິ​ການ​ກີດ​ກັ້ນ​ບໍ­ລິ­ສັດ Huawei ຈີນ​ຈຶ່ງ​ຈະ​ກັບ​ມາ​ນັ່ງ​ໂຕະ​ເຈລະ­ຈາ​ກັນ​ໃໝ່​ອີກ​ຄັ້ງ ແຕ່​ໃນ​ຄວາມ​ເປັນ​ຈິງ​ຜູ້​ເດືອດ­ຮ້ອນ ກໍ​ຄື ຜູ້​ບໍ­ລິ­ໂພກ​ຄົນ​ອາ​ເມ​ຣິ​ກາ ແລະ ຜູ້​ຜະ­ລິດ​ໃນ​ຈີນ ທີ່​ເປັນ​ເຊັ່ນ​ນີ້ ກໍ​ເພາະ​ທັງ​ສອງ​ປະ­ເທດ​ມີ​ການ​ຄ້າ­ຂາຍ ຕ່າງ​ກໍ​ໄດ້​ຮັບ​ຜົນ​ປະ­ໂຫຍດ​ຈາກ​ການ​ເປີດ​ຕະ­ຫຼາດ​ຄ້າ­ຂາຍ​ເຊິ່ງ​ກັນ ແລະ ກັນ ຜູ້​ສັງ­ເກດ​ການ​ຍັງ​ຕັ້ງ​ຂໍ້​ສັງ­ເກດ​ວ່າ: ...ນະ­ໂຍ­ບາຍ American first ຈະ​ປະ­ສົບ​ຄວາມ​ລົ້ມ​ເຫຼວ​ເຊັ່ນ​ດຽວ​ກັບ “ວາ­ທະ​ຂອງ​ມອນ​ໂຣ” ຫຼື Monroes doctrine ວ່າ​ອາ​ເມ​ຣິ​ກາ​ຢູ່​ຄົນ​ດຽວ​ແບບ​ໂຣ​ບິນ​ສັນ ກໍ​ໄດ້ ບໍ່​ຕ້ອງ​ເພິ່ງ​ພາ​ອາ­ໄສ​ໃຜ ເພາະ​ອາ​ເມ​ຣິ​ກາ​ກວ້າງ​ໃຫຍ່​ໄພ­ສານ ມີ​ໝົດ​ທຸກ​ຢ່າງ​ບົດ​ຂຽນ​ຂອງ​ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ​ມ້ວນ­ທ້າຍ​ວ່າ:

    “...ເລື່ອງ​ອາ​ເມ​ຣິ​ກາ-ຈີນ ຢຸດ­ຕິ​ການ​ຈັດ​ວາງ​ພາ­ສີ​ໃໝ່​ຊົ່ວ­ຄາວ ແລະ ກັບ​ຄືນ​ສູ່​ການ​ເຈລະ­ຈາ ພຽງ​ແຕ່​ຊ່ວຍ​ບັນ­ດາ​ຕະ­ຫຼາດ ແລະ ນັກ​ລົງ­ທຶນ​ມີ​ໄລ­ຍະ​ເວ­ລາ​ທີ່​ສະ­ດວກ​ສະ­ບາຍ​ຊົ່ວ­ຄາວ​ເທົ່າ​ນັ້ນ ກໍ​ຄື ໄດ້​ຜ່ອນ­ຄາຍ​ໄພ​ນາບ​ຂູ່ ຊຶ່ງ​ປັດ­ຈຸ­ບັນ​ພວມ​ປົກ​ຄຸມ​ໄປ​ທົ່ວ​ພື້ນ­ຖານ​ເສດ­ຖະ­ກິດ​ທົ່ວ​ໂລກ ຄວາມ​ຫຍຸ້ງ­ຍາກ​ລຳ­ບາກ​ໃນ​ການ​ເຈລະ­ຈາ​ຍັງ​ຄົງ​ລໍ­ຖ້າ​ການ​ກະ­ທຳ​ຂອງ​ສອງ​ຝ່າຍ​ໃນ​ພາຍ​ພາກ​ໜ້າ ແລະ ຍັງ​ບໍ່​ທັນ​ມີ​ຫຍັງ​ຮັບ­ປະ­ກັນ​ໄດ້​ວ່າ ຈະ​ບັນ­ລຸ​ໄດ້​ຂໍ້​ຕົກ­ລົງ​ວ່າ​ດ້ວຍ​ການ​ຄ້າ​ນີ້...”.

    ຂໍ​ສະ­ເໜີ​ເປັນ​ການ​ແລກ­ປ່ຽນ.

ແນວ​ລາວ