ຍົກນ້ຳໜັກລາວ ປະກາດ 4 ນັກກີລາ ຮ່ວມ ຊີເກມ

141 12 ກ.ລ. 2019 ວົງຈອນກີລາ
ຍົກນ້ຳໜັກລາວ ປະກາດ 4 ນັກກີລາ ຮ່ວມ ຊີເກມ

    ທ່ານ​ນາງ ເຄືອ​ຄຳ ລີ​ເຍຍ​ວື ຫົວ­ໜ້າ​ຄູ​ເຝິກ​ກີ­ລາ​ຍົກ​ນ້ຳ­ໜັກ​ທີມ​ຊາດ​ລາວ ເຈົ້າ​ຂອງ​ຫຼຽນ​ຄຳ​ປະ­ຫວັດ­ສາດ ຊີ­ເກມ ຄັ້ງ​ທີ 25 (ວຽງ​ຈັນ​ເກມ 2009) ກ່າວ​ວັນ​ທີ 10 ກໍ­ລະ­ກົດ 2019 ວ່າ: ການ­ເຄື່ອນ­ໄຫວ​ຂອງ​ທັບ​ນັກ­ກີ­ລາ​ຍົກ​ນ້ຳ­ໜັກ​ທີມ​ຊາດ​ລາວ ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ຊີ­ເກມ ຢູ່​ປະ­ເທດ​ຟີ​ລິບ​ປິນ ໃນ​ທ້າຍ​ປີ​ນີ້ ປັດ­ຈຸ­ບັນ​ກຳ­ລັງ​ຢູ່​ໃນ​ການ​ຄັດ​ເລືອກ​ຂອງ​ຄະ­ນະ​ຄູ​ເຝິກ ເຊິ່ງ​ມີ​ນັກ­ກີ­ລາ 8 ຄົນ ຍິງ 4 ຄົນ ເຊິ່ງ​ເປັນ​ນັກ­ຮຽນ​ກີ­ລາ​ຂອງ​ໂຮງ­ຮຽນ​ພອນ​ສະ­ຫວັນ​ກີ­ລາ-ກາຍ­ຍະ­ກຳ.

    ນອກ​ນີ້​ຍັງ​ຈະ​ໄດ້​ນັກ­ກີ­ລາ​ທີ່​ຫາ​ກໍ​ຮຽນ​ຈົບ ມ4 ຊຸດ​ຈະ​ເຂົ້າ​ສົກ­ຮຽນ 2019-2020 ມາ​ເພີ່ມ 3 ຄົນ ແລະ ທຸກ​ຄົນ​ໄດ້​ເກັບ​ຕົວ​ເຝິກ­ຊ້ອມ​ເປັນ​ປະ­ຈຳ​ທີ່​ໂຮງ­ຮຽນ​ດັ່ງ­ກ່າວ ວັນ​ລະ 4-5 ຊົ່ວ­ໂມງ​ຕໍ່​ວັນ ເພື່ອ​ຄັດ​ເລືອກ​ນັກ­ກີ­ລາ​ຜູ້​ທີ່​ມີ​ພອນ​ສະ­ຫວັນ ຕິດ​ທີມ​ຊາດ 4 ຄົນ ຍິງ 2 ຄົນ ແລະ ທ້າຍ​ເດືອນ​ກໍ­ລະ­ກົດ​ນີ້ ຈະ​ປະ­ກາດ​ລາຍ​ຊື່​ນັກ­ກີ­ລາ​ເປັນ​ທາງ​ການ ເພື່ອ​ໃຫ້​ເຂົາ­ເຈົ້າ​ເຂົ້າ​ນອນ​ສູນ​ເຝິກ­ແອບ​ຢ່າງ​ຈິງ​ຈັງ ເພື່ອ​ຮັບ­ປະ­ກັນ​ການ​ສ້າງ​ຜົນ­ງານ​ໃນ​ຊີ­ເກມ​ຄັ້ງ​ນີ້ ໃຫ້​ມີ​ຜົນ­ສຳ­ເລັດ​ຕາມ​ເປົ້າ​ໝາຍ.

    ປີ 2018 ທັບ​ນັກ­ກີ­ລາ​ຍົກ​ນ້ຳ­ໜັກ​ທີມ​ຊາດ​ລາວ ຊຸດ​ນີ້ 8 ຄົນ ໄດ້​ເຂົ້າ​ຮ່ວມ​ງານ​ຊີງ​ແຊັມ​ນາໆຊາດ ຊີງ​ຂັນ​ພະ​ຣາ​ຊະ​ສະ​ທານ​ຂອງ​ເຈົ້າ​ຊີ­ວິດ​ໄທ ຍາດ​ໄດ້ 3 ຫຼຽນ​ເງິນ ຕົ້ນ​ປີ 2019 ສົ່ງ​ນັກ­ກີ­ລາ​ເຂົ້າ 4 ຄົນ ໃນ​ງານ​ດັ່ງ­ກ່າວ​ອີກ​ຄັ້ງ ຍາດ​ໄດ້ 1 ຫຼຽນ​ທອງ ແລະ ວັນ​ທີ 19-23 ພຶດ­ສະ­ພາ​ຜ່ານ​ມາ ເຂົ້າ​ຮ່ວມ​ງານ​ຍົກ​ນ້ຳ­ໜັກ​ຊີງ​ແຊັມ​ໂລກ​ຢູ່ ສປ ຈີນ ເພື່ອ​ລຸ້ນ​ເອົາ​ໂຄ​ຕ້າ​ໄປ​ໂອ​ແລມ​ປິກ 2020 ຢູ່​ປະ­ເທດ​ຍີ່­ປຸ່ນ ໂດຍ​ໄດ້​ນັກ­ກີ­ລາ​ເຂົ້າ​ຮ່ວມ 2 ຄົນ ກໍ​ຄື ນາງ ໄມ ເຍຍ​ວື ຮຸ່ນ​ນ້ຳ­ໜັກ​ບໍ່​ເກີນ 55 ກິ​ໂລ ແລະ ທ້າວ ຕ່ອນ​ຊຽນ ແຊ​ຈ້າວ ຮຸ່ນ​ນ້ຳ­ໜັກ​ບໍ່​ເກີນ 55 ກິ​ໂລ ແຕ່​ບໍ່​ສາ­ມາດ​ຍາດ​ຫຼຽນ​ໄດ້ ແຕ່​ນັກ­ກີ­ລາ​ພວກ​ເຮົາ​ກໍ​ໄດ້​ບົດ­ຮຽນ​ອັນ​ລ້ຳ​ຄ່າ ຈາກ​ການ​ເຂົ້າ​ຮ່ວມ​ລາຍ­ການ​ດັ່ງ­ກ່າວ.

ຂ່າວທີ່ກ່ຽວຂ້ອງ