ຊາຍຮັກຊາຍ ຍິງຮັກຍິງ

248 12 ກ.ລ. 2019 ຫົວຂໍ້ຂ່າວອື່ນໆ

    ຫົວ­ຂໍ້​ທີ່​ຜູ້​ຂຽນ​ເອີ່ຍ​ຂຶ້ນ​ນີ້ ຢາກ​ໝາຍ​ເຖິງ​ບັນ­ຫາ​ກຸ່ມ​ຄົນ​ເພດ​ດຽວ​ມັກ​ຮັກ​ກັນ ແລະ ບາງ​ຄູ່​ຈົນ​ເຖິງ​ຂັ້ນ​ຈັດ​ງານ​ດອງ​ຄັກ­ແນ່​ກໍ​ມີ​ໃຫ້​ເຫັນ ຫວ່າງ​ມໍ່ໆມານີ້​ກໍ​ໄດ້​ກາຍ­ເປັນ​ກະ­ແສ​ຂ່າວ​ຮື​ຮາ​ອີກ​ແລ້ວ 2 ງານ​ເກີດ​ຂຶ້ນ​ໄລ່​ເລ່ຍ​ກັນ ເມື່ອ​ມີ​ອ້າຍ​ບ່າວ​ເຫີ່ມ​ໜ້າ​ຕາ​ດີ​ສອງ​ຄົນ ແລະ ສອງ​ສາວ​ງາມ​ພາ­ກັນ​ຈັດ​ງານ​ແຕ່ງ­ດອງ​ຂອງ​ຕົນ​ຂຶ້ນ ແລ້ວ​ໂພ​ສ​ຮູບ​ການ​ມັດ​ຂໍ່​ຕໍ່​ແຂນ​ໃນ​ພາ​ຂວັນ​ລົງ​ໃນ​ສື່​ສັງ­ຄົມ​ອອນ​ລາຍ (Facebook) ທ່າມ­ກາງ​ພໍ່​ແມ່​ຍາດ­ຕິ​ພີ່­ນ້ອງ​ເພື່ອນ​ມິດ​ມາ​ຮ່ວມ​ສະ­ແດງ​ຄວາມ​ຍິນ​ດີ​ນຳ. ຫຼາຍ​ຄົນ​ຕ່າງ​ກໍ​ພາ­ກັນ​ວິ­ພາກ​ວິ­ຈານ​ໄປ​ຕ່າງໆ​ນາໆວ່າ: ກົດ­ໝາຍ​ຢູ່​ຕ່າງ­ປະ­ເທດ (ບາງ​ປະ­ເທດ) ອະ­ນຸ­ຍາດ​ໃຫ້​ຄົນ​ເພດ​ດຽວ​ສາ­ມາດ​ແຕ່ງ­ດອງ ແລະ ຈົດ​ທະ­ບຽນ​ສົມ​ຣົດ​ກັນ​ໄດ້ ແຕ່​ກົດ­ໝາຍ​ລາວ​ເຮົາ​ເດ​ເພິ່ນ​ອະ­ນຸ­ຍາດ​ແລ້ວ​ບໍ່?.

    ກົດ­ໝາຍ​ວ່າ​ດ້ວຍ​ຄອບ­ຄົວ​ແຫ່ງ ສປປ ລາວ ໝວດ​ທີ 2 ວ່າ​ດ້ວຍ​ການ​ແຕ່ງ­ດອງ ມາດ­ຕາ 9 (ປັບ­ປຸງ​ໃໝ່) ໄດ້​ລະ­ບຸ​ຢ່າງ​ຈະ​ແຈ້ງ­ວ່າ: ເງື່ອນ­ໄຂ​ການ​ເອົາ­ກັນ​ເປັນ​ຜົວ​ເມຍ​ເຊິ່ງ​ຍິງ ແລະ ຊາຍ​ທີ່​ຈະ​ເອົາ­ກັນ​ເປັນ​ຜົວ​ເມຍ ຕ້ອງ​ມີ​ເງື່ອນ­ໄຂ​ດັ່ງ­ນີ້ ໜຶ່ງ ມີ​ອາ­ຍຸ​ແຕ່ 18 ປີ​ຂຶ້ນ​ໄປ ສອງ ມີ​ຄວາມ​ມັກ​ຮັກ​ຕາມ​ການ​ຕົກ­ລົງ ແລະ ຄວາມ​ສະ­ໝັກ​ໃຈ​ຂອງ​ຄູ່​ບ່າວ​ສາວ ສາມ ເປັນ​ໂສດ ເປັນ​ຮ້າງ ຫຼື ເປັນ​ໝ້າຍ​ໂດຍ​ມີ​ເອ­ກະ­ສານ​ຢັ້ງ­ຢືນ​ຢ່າງ​ຖືກ­ຕ້ອງ ແລະ ສີ່ ບໍ່​ເປັນ​ບ້າ​ເສຍ​ຈິດ ຫຼື ບໍ່​ເປັນ​ພະ­ຍາດ​ຮ້າຍ​ແຮງ ຫຼື ຕິດ­ແປດ. ໃນ​ຂະ­ນະ​ທີ່​ມາດ­ຕາ 10 (ປັບ­ປຸງ​ໃໝ່) ຂອງ​ກົດ­ໝາຍ​ສະ­ບັບ​ດຽວ​ກັນ​ນີ້ ຍັງ​ໄດ້​ລະ­ບຸ​ເຖິງ​ການ​ບໍ່​ອະ­ນຸ­ຍາດ​ໃຫ້​ແຕ່ງ­ດອງ​ກັນ ເຊິ່ງ​ການ​ແຕ່ງ­ດອງ​ຈະ​ບໍ່​ອະ­ນຸ­ຍາດ​ໄດ້​ໃນ 2 ກໍ­ລະ­ນີ ໃນ​ນັ້ນ ກໍ­ລະ­ນີ​ທີ 1 ກໍ​ຄື​ບຸກ­ຄົນ​ທີ່​ເປັນ​ເພດ​ດຽວ​ກັນ... ນັ້ນ​ກໍ​ສະ­ແດງ​ໃຫ້​ພວກ​ເຮົາ​ຮັບ​ຮູ້ ແລະ ເຂົ້າ­ໃຈ​ຢ່າງ​ຈະ­ແຈ້ງ​ແລ້ວ​ວ່າ​ກົດ­ໝາຍ​ແຫ່ງ ສປປ ລາວ ເຮົາ ຍັງ​ບໍ່​ທັນ​ອະ­ນຸ­ຍາດ​ໃຫ້​ຄົນ​ເພດ​ດຽວ​ກັນ ແຕ່ງ­ດອງ​ຢູ່​ກິນ​ກັນ​ເຊັ່ນ​ຄູ່​ຜົວ​ຕົວ​ເມຍ​ໄດ້​ເທື່ອ. ດັ່ງ­ນັ້ນ ໃນ​ໄລ­ຍະ​ຜ່ານ​ມາ​ຈຶ່ງ​ເຮັດ​ໃຫ້​ຫຼາຍ​ຄູ່​ຮັກ​ທີ່​ເປັນ​ເພດ​ດຽວ​ກັນ ຕັດ­ສິນ​ໃຈ​ໃຊ້​ຊີ­ວິດ​ຄູ່​ກັນ​ແບບ​ຜິດ​ກົດ­ໝາຍ ຜິດ​ຮີດ­ຄອງ​ປະ­ເພ­ນີ ບາງ​ຄູ່​ກໍ​ຝືນ​ຈັດ​ງານ​ລ້ຽງ​ສະ­ຫຼອງ​ວັນ​ວິ​ວາ​ຂອງ​ຕົນ​ຂຶ້ນ (ລວມ​ທັງ​ຄູ່​ຮັກ​ທີ່​ໄດ້​ເອີ່ຍ​ໃນ​ບົດ​ນີ້) ແຕ່​ບໍ່​ສາ­ມາດ​ຈົດ​ທະ­ບຽນ​ສົມ​ຣົດ​ກັນ​ໄດ້ ຍ້ອນ​ກົດ­ໝາຍ​ແຫ່ງ ສປປ ລາວ ບໍ່​ອະ­ນຸ­ຍາດ.

    ຄວາມ​ມັກ​ຮັກ​ເປັນ​ເລື່ອງ​ລະ­ອຽດ​ອ່ອນ ແລະ ເປັນ​ເລື່ອງ​ຂອງ​ຄົນ​ສອງ​ຄົນ ຈົນ​ບາງ​ຄັ້ງ​ເລື່ອງ​ຂອງ​ການ​ເປັນ​ຄົນ​ເພດ​ດຽວ​ກັນ ກໍ​ບໍ່​ສາ­ມາດ​ມາ​ເປັນ​ອຸ­ປະ­ສັກ​ຂວາງ​ກັ້ນ​ໄດ້ ຫຼາຍ​ປະ­ເທດ​ໃນ​ໂລກ ກໍ​ໃຫ້​ສິດ​ເສລີ­ພາບ​ໃນ​ການ​ໃຊ້​ຊີ­ວິດ​ຄູ່ ໂດຍ​ການ​ປະ­ກາດ​ໃຊ້​ກົດ­ໝາຍ​ທີ່​ອະ­ນຸ­ຍາດ​ໃຫ້​ຄົນ​ເພດ​ດຽວ​ກັນ ສາ­ມາດ​ແຕ່ງ­ດອງ​ກັນ​ໄດ້ ແຕ່​ໃນ​ຂະ­ນະ​ທີ່​ບາງ​ຊາດ ໂດຍ​ສະ­ເພາະ​ປະ­ເທດ​ທີ່​ມີ​ພົນ­ລະ­ເມືອງ​ເຄັ່ງ​ສາ­ສະ­ໜາ (ບາງ​ສາ­ສະ­ໜາ) ໄດ້​ເກືອດ​ຫ້າມ​ແບບ​ເດັດ­ຂາດ​ທີ່​ສຸດ​ກັບ​ກຸ່ມ​ຮັກ​ຮ່ວມ​ເພດ (ເພດ​ທີ 3) ຢ່າ​ວ່າ​ແຕ່​ປະ­ກາດ​ອອກ​ກົດ­ໝາຍ​ອະ­ນຸ­ຍາດ​ໃຫ້​ຄົນ​ເພດ​ດຽວ​ກັນ​ແຕ່ງ­ດອງ​ເອົາ­ກັນ​ໄດ້​ເລີຍ ຂະ­ໜາດ​ວ່າ​ການ­ສະ­ແດງ​ອອກ​ໃຫ້​ຮູ້​ວ່າ​ຕົວ​ຕົນ​ທີ່­ແທ້​ຈິງ​ເປັນ​ເພດ​ທີ 3 ທີ 4 ຍັງ​ບໍ່​ໄດ້​ເລີຍ ຍ້ອນ​ຢ້ານ​ຖືກ​ລົງ­ໂທດ ຈົນ​ເຮັດ​ໃຫ້​ກຸ່ມ​ຄົນ​ຈຳ­ພວກ​ນີ້ ເຊື່ອງ​ຊ້ອນ​ອຳ​ພາງ​ຕົວ​ຕົນ​ທີ່­ແທ້​ຈິງ​ຂອງ​ຕົນ​ເອງ​ໄວ້​ໃນ​ໃຈ​ຕະ­ຫຼອດ​ມາ.

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ