ໄຂນຳໃຊ້ສູນການຄ້າຊັ່ງຈ່ຽງຊ໋ອບປິ້ງມໍ

275 11 ກ.ລ. 2019 ຂ່າວໜ້າ​ໜຶ່ງ
ໄຂນຳໃຊ້ສູນການຄ້າຊັ່ງຈ່ຽງຊ໋ອບປິ້ງມໍ

    ພິ­ທີ​ໄຂ​ນຳ​ໃຊ້​ສູນ​ການ​ຄ້າ​ຊັ່ງ​ຈ່ຽງ​ຊ໋ອບ​ປິ້ງ​ມໍ ຈັດ​ຂຶ້ນ​ວັນ​ທີ 4 ກໍ­ລະ­ກົດ​ຜ່ານ​ມາ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ເບີ​ລີນ ເພັດ​ຈັນ­ທະ​ຣາດ ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນະ­ຄອນ­ຫຼວງ​ວຽງ​ຈັນ ທ່ານ ຕິ່ງ ກົ່ວ​ຈ່ຽງ ປະ­ທານ​ບໍ­ລິ­ສັດ ຊັ່ງ​ຈ່ຽງ​ລາວ ຈຳ­ກັດ​ຜູ້​ດຽວ ທ່ານ ຫວັງ ສີ​ຮຸຍ ທີ່​ປຶກ­ສາ​ທູດ​ການ​ຄ້າ​ຈີນ ປະ­ຈຳ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຕິ່ງ ກົ່ວ​ຈ່ຽງ ກ່າວ​ວ່າ: ສູນ​ການ​ຄ້າ​ຊັ່ງ​ຈ່ຽງ​ຊ໋ອບ​ປິ້ງ​ມໍ ຕັ້ງ​ຢູ່​ບ້ານ​ນາ​ຄຳ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ເປັນ​ສູນ​ລວມ​ຂອງ​ສິນ­ຄ້າ​ຍີ່­ຫໍ້​ຊື່​ດັງ​ລະ­ດັບ​ໂລກ ປັດ­ຈຸ­ບັນ ເປັນ​ສູນ​ການ​ຄ້າ​ທີ່​ນຳ​ເຂົ້າ​ສິນ­ຄ້າ​ຈາກ​ຈີນ​ແຫ່ງ​ໃຫຍ່​ທີ່​ສຸດ​ໃນ​ທະ­ວີບ­ອາ­ຊີ ແລະ ເປັນ​ແຫຼ່ງ​ຈຳ­ໜ່າຍ​ສິນ­ຄ້າ​ທີ່​ໃຫຍ່​ທີ່​ສຸດ​ໃນ​ປະ­ເທດ​ລາວ ເນື້ອ­ທີ່​ກໍ່­ສ້າງ 70.000 ກວ່າ​ຕາ​ແມັດ ເນື້ອ­ທີ່​ເດີ່ນ​ຈອດ​ລົດ 7.000 ກວ່າ​ຕາ​ແມັດ ເນື້ອ­ທີ່​ສຳ­ລັບ​ຮ້ານ​ຄ້າ 50.000 ຕາ​ແມັດ ສູນ​ການ​ຄ້າ​ຊັ່ງ​ຈ່ຽງ​ຊ໋ອບ​ປິ້ງ​ມໍ ເປັນ​ອາ­ຄານ 5 ຊັ້ນ ປະ­ກອບ​ມີ: ໂຮງ­ແຮມ​ທີ່​ທັນ​ທະ​ໄໝ​ໄດ້​ມາດ­ຕະ­ຖານ ແລະ ຮ້ານ​ຄ້າ​ທີ່​ມີ​ສິນ­ຄ້າ​ຄຸນ​ນະ​ພາບ​ມາດ­ຕະ­ຖານ​ສາ­ກົນ ມີ​ເນື້ອ 6.000 ຕາ​ແມັດ ສູນ​ການ​ຄ້າ​ຊັ່ງ​ຈ່ຽງ​ຊ໋ອບ​ປິ້ງ​ມໍ ເປັນ​ສະ­ຖານ­ທີ່​ສາ­ມາດ​ສ້າງ​ລາຍ​ຮັບ​ຊຸກ­ຍູ້​ດ້ານ​ເສດ­ຖະ­ກິດ-ສັງ­ຄົມ ໃຫ້​ນະ­ຄອນ­ຫຼວງ​ວຽງ​ຈັນ ກໍ​ຄື ປະ­ເທດ​ລາວ ພ້ອມ​ນີ້ ຍັງ​ສ້າງ​ໂອ­ກາດ​ໃນ​ການ​ຄ້າ­ຂາຍ ເປັນ​ໄປ​ຕາມ​ທິດ​ທາງ​ການ​ຂະ­ຫຍາຍ­ຕົວ​ຂອງ​ໂຄງ­ການ “ໜຶ່ງ​ແລວ ໜຶ່ງ​ເສັ້ນ­ທາງ” ໃນ​ນາມ​ຕາງ­ໜ້າ​ບໍ­ລິ­ສັດ​ຊັ່ງ​ຈ່ຽງ ຈະ​ເຮັດ​ໜ້າ­ທີ່​ໃຫ້​ດີ​ທີ່​ສຸດ ເພື່ອ​ໃຫ້​ຊາວ​ຄ້າ­ຂາຍ ລາວ-ຈີນ ກໍ​ຄື ລູກ​ຄ້າ​ທີ່​ມາ​ໃຊ້​ບໍ­ລິ­ການ​ມີ​ການ​ຮ່ວມ​ມື ແລະ ໄດ້​ຮັບ​ຄວາມ​ສະ­ດວກ​ສະ­ບາຍ​ຕະ­ຫຼອດ​ໄປ.

    ພາຍ​ໃນ​ງານ​ເປີດ​ສູນ​ການ​ຄ້າ​ຊັ່ງ​ຈ່ຽງ​ຊ໋ອບ​ປິ້ງ​ມໍ ຍັງ​ມີ​ກິດ­ຈະ­ກຳ​ມອບ​ໂຊກ​ແຈກ​ຂອງ­ຂວັນ​ລາ­ງວັນ​ຫຼາຍ​ຢ່າງ​ໃຫ້​ຜູ້​ເຂົ້າ​ມາ​ຮ່ວມ ພ້ອມ​ຮັບ​ຊົມ​ການ­ສະ­ແດງ​ຈາກ​ສິ­ລະ​ປິນ​ຊື່​ດັງ​ຂອງ​ລາວ ແລະ ຈີນ ຕື່ມ​ອີກ.

ຂ່າວທີ່ກ່ຽວຂ້ອງ