ເຜີຍແຜ່ມາດຕະຖານເມືອງທ່ອງທ່ຽວສະອາດອາຊຽນ

239 11 ກ.ລ. 2019 ຂ່າວໜ້າ​ໜຶ່ງ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຮ່ວມ​ກັບ​ກະ­ຊວງ ຖວ​ທ ແລະ ເມືອງ​ຈັນ­ທະ​ບູ​ລີ ຈັດ​ກອງ​ປະ­ຊຸມ​ເຜີຍ­ແຜ່​ມາດ­ຕະ­ຖານ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ໃຫ້​ອຳ­ນາດ​ການ​ປົກ­ຄອງ​ເມືອງ​ຈັນ­ທະ​ບູ​ລີ ແລະ ພາກ­ສ່ວນ​ກ່ຽວ­ຂ້ອງ ຂຶ້ນ​ວັນ​ທີ 9 ກໍ­ລະ­ກົດ 2019 ຢູ່​ເມືອງ​ດັ່ງ­ກ່າວ ໂດຍ​ມີ​ທ່ານ​ນາງ ບົວ​ລອນ ວົງ​ດາ­ລາ​ແສນ ເຈົ້າ­ເມືອງ​ຈັນ­ທະ​ບູ​ລີ ທ່ານ ຄຳ​ຄູນ ໃບ​ລາ­ຕີ ຮອງ​ຫົວ­ໜ້າ​ພະ​ແນກ ຖວ​ທ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສົມ​ໄຊ ສີ​ປະ­ເສີດ ຫົວ­ໜ້າ​ພະ​ແນ​ກວາງ​ແຜນ ແລະ ພັດ­ທະ­ນາ​ການ­ທ່ອງ­ທ່ຽວ ກົມ​ພັດ­ທະ­ນາ​ການ ທ່ອງ​ທ່ຽວ ກະ­ຊວງ ຖວ​ທ ໄດ້​ນຳ​ສະ­ເໜີ​ການ­ຈັດ­ຕັ້ງ​ປະ­ຕິ­ບັດ​ມາດ­ຕະ­ຖານ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ຢູ່ ສປປ ລາວ ໃນ​ໄລ­ຍະ​ຜ່ານ​ມາ ພ້ອມ​ທັງ​ໄດ້​ຮັບ​ຟັງ​ກ່ຽວ​ກັບ​ອົງ​ປະ­ກອບ ແລະ ບັນ­ດາ​ຕົວ​ຊີ້​ວັດ​ຂອງ​ມາດ­ຕະ­ຖານ​ເມືອງ​ທ່ຽວ​ທ່ຽວ​ສະ­ອາດ​ອາ​ຊຽນ ໂດຍ​ສະ­ເພາະ 7 ມາດ­ຖານ​ຕົວ​ຊີ້​ວັດ​ຫຼັກ ຄື: ຕົວ​ຊີ້​ວັດ​ການ​ຄຸ້ມ​ຄອງ​ສິ່ງ­ແວ­ດລ້ອມ ຄວາມ​ສະ­ອາດ ການ​ປູກ​ຈິດ​ສຳ­ນຶກ​ການ​ຮັກ­ສາ​ສິ່ງ­ແວ­ດລ້ອມ ແລະ ຄວາມ​ສະ­ອາດ ຕົວ​ຊີ້​ວັດ​ພື້ນ​ທີ່​ສີ­ຂຽວ ຄວາມ​ປອດ​ໄພ​ດ້ານ​ສຸ­ຂະ­ພາບ ຄວາມ​ປອດ​ໄພ ແລະ ຄວາມ​ສະ­ຫງົບ​ໃນ​ເມືອງ ແລະ ຕົວ​ຊີ້​ວັດ​ໂຄງ​ລ່າງ​ພື້ນ­ຖານ ແລະ ສິ່ງ­ແວ­ດລ້ອມ​ດ້ານ​ການ­ທ່ອງ­ທ່ຽວ ລວມ​ທັງ​ຕົວ​ຊີ້​ວັດ​ຍ່ອຍ​ອີກ 28 ຕົວ​ຊີ້​ວັດ ຂັ້ນ​ຕອນ​ໃບ­ຢັ້ງ­ຢືນ ແລະ ຄະ­ນະ​ກຳ­ມະ­ການ​ປະ​ເມີນ ແນະ­ນຳ​ປຶ້ມ​ຄູ່​ມື​ມາດ­ຕະ­ຖານ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ແລະ ພື້ນ​ທີ່​ເປົ້າ​ໝາຍ ແບບ​ຟອມ​ການ​ປະ​ເມີນ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ​ໃນ­ຕໍ່­ໜ້າ ແລະ ການ​ກະ­ກຽມ​ສະ­ເໜີ​ຮັບ​ລາ­ງວັນ ໃນ​ປີ 2020.

    ທ່ານ​ນາງ ບົວ​ລອນ ວົງ​ດາ­ລາ​ແສນ ໄດ້​ເນັ້ນ​ໃຫ້​ຜູ້​ເຂົ້າ​ຮ່ວມ​ພ້ອມ​ກັນ​ນຳ​ເອົາ​ເນື້ອ​ໃນ​ຈິດ­ໃຈ​ຄັ້ງ​ນີ້ ໄປ​ຜັນ​ຂະ ຫຍາຍ ໂດຍ​ສະ­ເພາະ 7 ຕົວ​ຊີ້​ວັດ​ຂອງ​ມາດ­ຕະ­ຖານ​ທ່ອງ​ທ່ຽວ​ສະ­ອາດ​ອາ​ຊຽນ ເວົ້າ​ລວມ​ກໍ​ແມ່ນ​ການ​ຜັນ​ຂະ­ຫຍາຍ​ອອກ​ມາ​ຈາກ​ຄຳ​ຂວັນ 6ສ ຂອງ ນວ ສືບ­ຕໍ່​ກິດ­ຈະ­ກຳ​ຮັກ­ສາ​ຄວາມ​ສະ­ອາດ ເນັ້ນ​ຊົ່ວ­ໂມງ​ວຽງ​ຈັນ​ສະ­ອາດ​ໃນ​ທຸກໆ​ວັນ​ພຸດ ແລະ ການ​ອອກ­ແຮງ​ງານ​ເຮັດ­ອະ­ນາ­ໄມ​ວັນ​ເສົາ​ແຕ່​ລະ​ອາ­ທິດ ປະ­ສານ​ສົມ­ທົບ​ກັບ​ຂະ­ແໜງ​ໂຍ­ທາ​ທິ​ການ ແລະ ຂົນ​ສົງ ແລະ ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ ຖື​ເອົາ​ໜ່ວຍ​ງານ​ທີ່​ຮັບ­ຜິດ­ຊອບ​ໂດຍ​ກົງ​ຂອງ​ແຕ່​ລະ​ເຂດ ຈັດ​ຕັ້ງ​ຄະ­ນະ​ກຳ­ມະ­ການ​ຮັບ­ຜິດ­ຊອບ​ວຽກ​ງານ​ດັ່ງ­ກ່າວ ແລະ ມີ​ການ​ຖອດ​ຖອນ​ບົດ­ຮຽນ ປະ​ເມີນ​ຜົນ​ແຕ່​ລະ​ອາ­ທິດ ແລະ ຕໍ່​ເນື່ອງ ໄປ​ພ້ອມ​ກັບ​ການ​ຈັດ​ຂະ​ບວນ​ການ​ແຂ່ງ­ຂັນ​ກັນ​ແຕ່​ລະ​ບ້ານ ກຸ່ມ ເມືອງ ແລະ ແຂວງ ນວ ໂດຍ​ສະ­ເພາະ 4 ເມືອງ​ໃນ ໃຫ້​ເປັນ​ທີ່​ຍອມ­ຮັບ​ລະ­ດັບ​ພາກ​ພື້ນ ແລະ ສຳ­ເລັດ​ຕົວ​ຊີ້​ວັດ​ເຫຼົ່າ­ນັ້ນ​ກ່ອນ​ປີ 2020 ແລະ ສາ­ມາດ​ກາຍ­ເປັນ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ.

ຂ່າວທີ່ກ່ຽວຂ້ອງ