ຣັດ​ເຊຍ ສືບ­ຕໍ່​ສະ­ໜອງ​ອາ­ວຸດ​ທີ່​ທັນ​ສະ­ໄໝ​ໃຫ້​ແກ່​ອິນ​ເດຍ

184 11 ກ.ລ. 2019 ຂ່າວຕ່າງປະເທດ
ຣັດ​ເຊຍ ສືບ­ຕໍ່​ສະ­ໜອງ​ອາ­ວຸດ​ທີ່​ທັນ​ສະ­ໄໝ​ໃຫ້​ແກ່​ອິນ​ເດຍ

   ສຳ­ນັກ​ຂ່າວ­ສານ TASS ຂອງ​ຣັດ​ເຊຍ ອ້າງ​ຕາມ​ຄຳ​ປາ​ໄສ​ຂອງ​ທ່ານ ວາ​ລາ​ດີ​ເມຍ ໂດຣ​ຊອບ ຮອງ​ຜູ້­ອຳ­ນວຍ­ການ​ຂອງ​ອົງ­ການ​ຮ່ວມ​ມື​ທາງ​ດ້ານ​ເຕັກ­ນິກ-ການ​ທະ­ຫານ ຂອງ​ຣັດ​ເຊຍ ໃຫ້​ຮູ້­ເມື່ອ​ວັນ​ທີ 9 ກໍ­ລະ­ກົດ​ນີ້​ວ່າ ຣັດ​ເຊຍ​ພວມ​ປະ­ຕິ­ບັດ​ບັນ­ດາ​ສັນ­ຍາ​ກ່ຽວ​ກັບ​ການ​ສະ­ໜອງ​ລູກ​ສອນ​ໄຟ​ປ້ອງ​ກັນ​ອາ­ກາດ S-400 ຈຳ­ນວນ 4 ຊຸດ ລວມ​ເຖິງ​ເຮືອ­ບິນ​ສູ້​ຮົບ Su-30MKI ແລະ  MiG-29K ຈຳ­ນວນ​ຫຼາຍ​ສິບ​ລຳ ພ້ອມ​ກັບ​ການ​ຍົກ​ລະ­ດັບ​ລົດ​ຖັງ T-90 ຈຳ­ນວນ  450 ຄັນ ໃຫ້​ແກ່​ກອງ­ທັບ​ອິນ​ເດຍ.

    ທ່ານ ວາ​ລາ​ດີ​ເມຍ ໂດຣ​ຊອບ ເວົ້າ​ວ່າ ວິ​ສາ​ຫະ​ກິດ​ຕ່າງໆ​ຂອງ​ຣັດ​ເຊຍ ພວມ​ພະ­ຍາ­ຍາມ​ປະ­ຕິ­ບັດ​ບັນ­ດາ​ໃບ​ສັ່ງ​ຈອງ​ສິນ­ຄ້າ ເພື່ອ​ສົ່ງ​ມອບ​ໃຫ້​ແກ່​ຝ່າຍ​ອິນ​ເດຍ ຕາມ​ແຜນ­ການ​ທີ່​ໄດ້​ວາງ​ໄວ້. ຕາມ​ນັ້ນ­ແລ້ວ​ກໍ​ແມ່ນ ຈະ​ສົ່ງ​ມອບ​ກຸ່ມ​ລູກ​ສອນ​ໄຟ​ປ້ອງ​ກັນ​ອາ­ກາດ S-400 ຊຸດ​ທຳ​ອິດ ພາຍ​ໃນ​ທ້າຍ​ປີ 2020 ແລະ ສ່ວນ​ທີ່​ຍັງ​ເຫຼືອ ມີ​ກຳ­ນົດ​ສົ່ງ​ມອບ​ຕາມ​ແຕ່​ລະ​ໄລ­ຍະ ໄປ​ຮອດ​ປີ 2025 ຫຼັງ​ຈາກ​ທີ່​ບ້ວງ​ຈ່າຍ​ລ່ວງ​ໜ້າ ໄດ້​ຮັບ​ການ​ປະ­ຕິ­ບັດ.

    ທ່ານ ວາ​ລາ​ດີ​ເມຍ ໂດຣ​ຊອບ ຍັງ​ໃຫ້​ຮູ້​ວ່າ ຣັດ​ເຊຍ​ໄດ້​ສະ­ເໜີ​ໃຫ້​ອິນ​ເດຍ ຮ່ວມ​ມື​ອອກ​ແບບ ແລະ ປະ­ກອບ​ກຳ­ປັ່ນ​ດຳ​ນ້ຳ​ໃໝ່ ບົນ​ພື້ນ­ຖານ​ຂອງ​ກຳ­ປັ່ນ​ດຳ​ນ້ຳ​ໄຟ­ຟ້າ-ດີ​ເອ​ແຊລ Amur-1650 ທີ່​ປະ­ກອບ​ລູກ​ສອນ​ໄຟ​ໂຈມ​ຕີ Brah-Mos ໂດຍ​ແມ່ນ​ສອງ​ປະ­ເທດ​ຮ່ວມ​ກັນ​ຜະ­ລິດ.

ຂ່າວທີ່ກ່ຽວຂ້ອງ