ສ ອາ​ເມ​ຣິ​ກາ ຍົກ­ເວັ້ນ​ການ​ເກັບ​ພາ­ສີ 25% ກັບ​ສິນ­ຄ້າ​ຈີນ​ບາງ​ລາຍ­ການ

72 11 ກ.ລ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ຍົກ­ເວັ້ນ​ການ​ເກັບ​ພາ­ສີ 25% ກັບ​ສິນ­ຄ້າ​ຈີນ​ບາງ​ລາຍ­ການ

   ຫ້ອງ­ການ​ຂອງ​ຜູ້​ແທນ​ການ​ຄ້າ ສ ອາ​ເມ​ຣິ​ກາ ແຈ້ງ​ໃຫ້​ຮູ້­ເມື່ອ​ວັນ​ທີ 9 ກໍ­ລະ­ກົດ​ນີ້​ວ່າ ຈະ​ຍົກ­ເວັ້ນ​ການ​ເກັບ​ພາ­ສີ​ທີ່​ລະ­ດັບ​ສູງ​ກັບ​ສິນ­ຄ້າ​ຈີນ 110 ຜະ­ລິດ​ຕະ​ພັນ ເພື່ອ​ຊ່ວຍ­ເຫຼືອ​ບໍ­ລິ­ສັດ​ຂອງ ສ ອາ​ເມ​ຣິ​ກາ ຈຳ­ນວນ​ໜຶ່ງ ທີ່​ໄດ້​ຮັບ​ຜົນ​ກະ­ທົບ​ຈາກ​ຈາກ​ລະ­ດັບ​ພາ­ສີ​ຕ່າງໆ​ຂອງ ສ ອາ​ເມ​ຣິ​ກາ.

    ບັນ­ຊີ​ລາຍ​ຊື່​ຂອງ​ບັນ­ດາ​ຜະ­ລິດ​ຕະ​ພັນ ທີ່​ໄດ້​ຮັບ​ການ​ຍົກ­ເວັ້ນ​ພາ­ສີ​ໃນ​ເທື່ອ​ນີ້ ປະ­ກອບ​ມີ​ອຸ­ປະ­ກອນ​ການ​ແພດ ແລະ ບັນ­ດາ​ຜະ­ລິດ​ຕະ​ພັນ​ເຄື່ອງ­ໃຊ້​ໄຟ­ຟ້າ​ບາງ​ລາຍ­ການ ຊຶ່ງ​ບັນ­ດາ​ບໍ­ລິ­ສັດ​ຂອງ ສ ອາ​ເມ​ຣິ​ກາ ນຳ​ເຂົ້າ​ຈາກ​ຈີນ.

    ແຈ້ງ​ການ​ຂອງ​ຫ້ອງ­ການ​ຜູ້​ແທນ​ການ​ຄ້າ ສ ອາ​ເມ​ຣິ​ກາ ໃຫ້​ຮູ້​ວ່າ ບັນ­ດາ​ຜະ­ລິດ​ຕະ​ພັນ​ດັ່ງ­ກ່າວ​ຂອງ​ຈີນ ຈະ​ບໍ່​ຖືກ​ເກັບ​ພາ­ສີ​ທີ່​ລະ­ດັບ 25% ຊຶ່ງ ສ ອາ​ເມ​ຣິ​ກາ ປະ­ຕິ­ບັດ​ຕໍ່​ສິນ­ຄ້າ​ທີ່​ນຳ​ເຂົ້າ​ມາ​ຈາກ​ຈີນ ເປັນ​ມູນ​ຄ່າ 34 ຕື້​ໂດ​ລາ​ສະ­ຫະ­ລັດ ທີ່​ມີ​ອອກ​ມາ​ເມື່ອ​ວັນ​ທີ 6 ກໍ­ລະ­ກົດ ປີ 2018 ນັ້ນ. ການ​ຍົກ­ເວັ້ນ​ດັ່ງ­ກ່າວ ຈະ​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ດັ່ງ­ກ່າວ ແລະ ແກ່­ຍາວ​ໄປ​ຕື່ມ​ອີກ​ໜຶ່ງ​ປີ ນັບ​ແຕ່​ວັນ​ທີ 9 ກໍ­ລະ­ກົດ​ນີ້​ເປັນ­ຕົ້ນ​ໄປ. ນອກ­ຈາກ​ບັນ­ຊີ​ບັນ­ດາ​ຜະ­ລິດ​ຕະ​ພັນ ທີ່​ໄດ້​ຮັບ​ການ​ຍົກ­ເວັ້ນ​ພາ­ສີ​ໃນ​ເທື່ອ​ນີ້​ແລ້ວ ເມື່ອ​ປີ​ກາຍ ຫ້ອງ­ການ​ຜູ້​ແທນ​ການ​ຄ້າ ສ ອາ​ເມ​ຣິ​ກາ ກໍ​ໄດ້​ຍົກ­ເວັ້ນ​ພາ­ສີ​ໃຫ້​ແກ່​ຜະ­ລິດ​ຕະ​ພັນ​ອື່ນໆ​ອີກ 1.000 ລາຍ­ການ.

    ກ່ອນ​ໜ້າ​ນີ້ ສ ອາ​ເມ​ຣິ​ກາ ໄດ້​ເກັບ​ພາ­ສີ ກັບ​ສິນ­ຄ້າ​ທີ່​ນຳ​ເຂົ້າ​ຈາກ​ຈີນ ເປັນ​ມູນ​ຄ່າ 250 ຕື້​ໂດ​ລາ​ສະ­ຫະ­ລັດ ແລະ ຂູ່​ທີ່​ຈະ​ສືບ­ຕໍ່​ເກັບ​ພາ­ສີ​ກັບ​ສິນ­ຄ້າ​ທີ່​ຍັງ​ເຫຼືອ​ອີກ​ເປັນ​ມູນ​ຄ່າ 300 ຕື້​ໂດ​ລາ​ສະ­ຫະ­ລັດ.

ຂ່າວທີ່ກ່ຽວຂ້ອງ