ເອີຣົບ ແລະ ລາວ ຮ່ວມສະຫຼຸບຜົນການເຈລະຈາຊ່ອງໜ້າ

615 10 ກ.ລ. 2019 ຂ່າວໜ້າ​ໜຶ່ງ

    ສະ­ຫະ­ພາບ​ເອີ​ຣົບ (EU) ແລະ ລາວ ຈັດ​ກອງ​ປະ­ຊຸມ​ເຈລະ­ຈາ​ຊ່ອງ​ໜ້າ ຄັ້ງ​ທີ 3 ເພື່ອ​ກ້າວ​ໄປ​ສູ່​ການ​ລົງ​ນາມ​ສັນ­ຍາ​ການ​ຄ້າ​ໄມ້​ແບບ​ສະ­ໝັກ​ໃຈ (VPA) ພາຍ​ໃຕ້​ແຜນ​ງານ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ປ່າ­ໄມ້​ການ​ຄຸ້ມ​ຄອງ ແລະ ການ​ຄ້າ​ໄມ້ (FLEGT) ຈັດ​ຂຶ້ນ​ວັນ​ທີ 17-21 ມິ­ຖຸ­ນາ 2019 ຢູ່​ປະ­ເທດ​ແບນ​ຊິກ ເຊິ່ງ​ສັນ­ຍາ​ດັ່ງ­ກ່າວ ມີ​ເປົ້າ​ໝາຍ​ເພື່ອ​ສ້າງ​ລະ­ບົບ​ການ​ກວດ­ກາ​ຢັ້ງ­ຢືນ​ຜະ­ລິດ​ຕະ​ພັນ​ໄມ້​ທີ່​ຖືກ­ຕ້ອງ​ຕາມ​ກົດ­ໝາຍ ທີ່​ໄດ້​ຂຸດ​ຄົ້ນ ແລະ ສົ່ງ​ອອກ​ໂດຍ​ລາວ ນອກ​ນີ້ ຍັງ​ຈະ​ຊ່ວຍ​ສົ່ງ­ເສີມ​ການ​ຄ້າ​ຜະ­ລິດ​ຕະ​ພັນ​ໄມ້​ທີ່​ຖືກ­ຕ້ອງ​ຕາມ​ກົດ­ໝາຍ ປັບ­ປຸງ​ການ​ຄຸ້ມ​ຄອງ​ປ່າ­ໄມ້ ແລະ ປະ­ກອບ­ສ່ວນ​ໃນ​ການ​ສະ­ກັດ​ກັ້ນ​ການ​ຂຸດ​ຄົ້ນ​ໄມ້​ຜິດ​ກົດ­ໝາຍ.

    ທ່ານ ພວງ​ປາ​ຣິ​ສັກ ປຣະ​ວົງ​ວຽງ​ຄຳ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ຫົວ­ໜ້າ​ທີມ​ງານ​ເຈລະ­ຈາ​ຝ່າຍ​ລາວ ກ່າວ​ວ່າ: ລັດ­ຖະ­ບານ​ລາວ ມີ​ຄວາມ​ມຸ່ງ​ໝັ້ນ​ໃນ​ການ​ສືບ­ຕໍ່​ພັດ­ທະ­ນາ​ຂະ­ແໜງ­ການ​ປ່າ­ໄມ້​ໃຫ້​ມີ​ຄວາມ​ຍືນ​ຍົງ ການ​ເຈລະ­ຈາ​ຂອງ​ລາວ ກັບ EU ເປັນ​ສ່ວນ​ໜຶ່ງ​ໃນ​ຄວາມ​ມຸ່ງ​ໝັ້ນ​ດັ່ງ­ກ່າວ ເພາະ​ການ­ຈັດ­ຕັ້ງ​ປະ­ຕິ­ບັດ​ສັນ­ຍາ​ດັ່ງ­ກ່າວ ຈະ​ຊ່ວຍ​ເພີ່ມ​ທະ­ວີ​ຄວາມ​ເຂັ້ມ­ແຂງ​ດ້ານ​ການ​ຄຸ້ມ​ຄອງ​ຕ໋ອງ​ໂສ້​ການ​ສະ­ໜອງ​ໄມ້ ແລະ ມີ​ຄວາມ​ຮັບ­ຜິດ­ຊອບ​ໃນ​ການ​ຄຸ້ມ​ຄອງ​ປ່າ­ໄມ້ ນັບ​ຕັ້ງ­ແຕ່​ການ​ເຈລະ­ຈາ​ຊ່ອງ​ໜ້າ ຄັ້ງ​ທີ 2 ປີ 2018 ລາວ​ໄດ້​ດຳ­ເນີນ​ການ​ປັບ­ປຸງ​ນິ­ຕິ​ກຳ ໂດຍ​ສະ­ເພາະ ກົດ­ໝາຍ​ວ່າ​ດ້ວຍ​ປ່າ­ໄມ້ ກົດ­ໝາຍ​ວ່າ​ດ້ວຍ​ທີ່​ດິນ ແລະ ດຳ­ລັດ​ວ່າ​ດ້ວຍ​ການ​ປະ​ເມີນ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ການ​ປ່ຽນ­ແປງ​ເຫຼົ່າ​ນີ້ ໄດ້​ໃຫ້​ຄວາມ​ກະ­ຈ່າງ​ແຈ້ງ​ກ່ຽວ​ກັບ​ສິ່ງ​ທີ່​ຈະ​ໄດ້​ພິ­ຈາ­ລະ­ນາ​ເປັນ​ໄມ້​ທີ່​ຖືກ­ຕ້ອງ​ຕາມ​ກົດ­ໝາຍ ພາຍ​ໃຕ້ VPA ລະ­ຫວ່າງ ລາວ ແລະ EU ໃນ​ໄລ­ຍະ​ການ​ເຈລະ­ຈາ EU ແລະ ລາວ ໄດ້​ທົບ​ທວນ​ບັນ­ດາ​ນິ​ຍາມ​ໄມ້​ທີ່​ຖືກ­ຕ້ອງ​ຕາມ​ກົດ­ໝາຍ ເຊິ່ງ​ຈະ​ໄດ້​ນຳ​ໃຊ້​ໃນ​ການ​ບົ່ງ​ບອກ​ເຖິງ​ໄມ້​ທີ່​ຖືກ­ຕ້ອງ​ຕາມ​ກົດ­ໝາຍ ລາວ​ໄດ້​ມີ​ຄວາມ​ຄືບ​ໜ້າ​ໃນ​ການ​ຮ່າງ​ນິ​ຍາມ​ໄມ້​ທີ່​ຖືກ­ຕ້ອງ​ຕາມ​ກົດ­ໝາຍ​ຂອງ​ໄມ້ ທີ່​ມາ​ຈາກ​ເຂດ​ຫັນ­ປ່ຽນ​ທີ່​ດິນ​ປ່າ­ໄມ້ ແລະ ໄມ້​ນຳ​ເຂົ້າ ສ່ວນ​ວຽກ​ງານ​ກ່ຽວ​ກັບ​ປ່າ​ຜະ­ລິດ ພັນ­ທະ​ກ່ຽວ​ກັບ​ການ​ນຳ​ໃຊ້​ແຮງ​ງານ ການ​ປຸງ​ແຕ່ງ​ໄມ້ ແລະ ການ​ຄ້າ​ໄມ້​ທີ່​ໄດ້​ຕົກ­ລົງ​ກັນ​ໃນ​ກອງ​ປະ­ຊຸມ​ຄັ້ງ​ກ່ອນ ກໍ​ມີ​ຄວາມ​ຄືບ​ໜ້າ­ທີ່​ເຊັ່ນ​ດຽວ​ກັນ ນອກ​ນີ້ ຝ່າຍ​ລາວ​ຍັງ​ໄດ້​ລາຍ​ງານ​ຄວາມ​ຄືບ​ໜ້າ​ກ່ຽວ​ກັບ​ຄວາມ​ສາ­ມາດ​ນຳ​ໃຊ້​ປ່າ­ໄມ້​ຂອງ​ຊຸມ​ຊົນ ເພື່ອ​ຈຸດ­ປະ­ສົງ​ດ້ານ​ການ​ຄ້າ​ພາຍ​ໃຕ້​ກົດ­ໝາຍ​ປ່າ­ໄມ້ ເຊິ່ງ​ມີ​ທ່າ­ແຮງ​ເຮັດ​ໃຫ້​ເພີ່ມ​ລາຍ​ຮັບ ປັບ­ປຸງ​ຊິ­ວິດ​ການ​ເປັນ​ຢູ່​ໃຫ້​ຊຸມ​ຊົນ ແລະ ສະ­ໜອງ​ແຫຼ່ງ​ວັດ­ຖຸ​ດິບ​ເພີ່ມ​ຕື່ມ​ໃຫ້​ທຸ­ລະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ ການ​ຜະ­ລິດ ຜະ­ລິດ​ຕະ​ພັນ​ໄມ້​ຂອງ​ຄົວ​ເຮືອນ ນອກ​ນີ້ ລາວ​ຍັງ​ໄດ້​ສະ­ເໜີ​ຂໍ້​ມູນ​ລະ­ອຽດ​ກ່ຽວ​ກັບ​ການ​ວາງ​ໂຄງ​ຮ່າງ​ການ­ຈັດ­ຕັ້ງ ໃນ​ການ­ຈັດ­ຕັ້ງ​ປະ­ຕິ­ບັດ VPA ແລະ ລະ­ບົບ​ຄ້ຳ­ປະ­ກັນ​ໄມ້​ທີ່​ຖືກ­ຕ້ອງ​ຕາມ​ກົດ­ໝາຍ​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ