ຂ່າວຫຼ້າສຸດ

ໄຂບໍລິການນຳໃຊ້ວີຊາອອນລາຍຢ່າງເປັນທາງການ

491 10 ກ.ລ. 2019 ຂ່າວໜ້າ​ໜຶ່ງ
ໄຂບໍລິການນຳໃຊ້ວີຊາອອນລາຍຢ່າງເປັນທາງການ

    ກະ­ຊວງ​ການ​ຕ່າງ­ປະ­ເທດ ຮ່ວມ​ກັບ​ພາກ­ສ່ວນ​ກ່ຽວ­ຂ້ອງ​ຂອງ​ລັດ­ຖະ­ບານ ຈັດ​ພິ­ທີ​ໄຂ​ການ​ບໍ­ລິ­ການ​ນຳ​ໃຊ້​ວີ​ຊາ​ອອນ​ລາຍ (evisa) ຂຶ້ນ​ວັນ​ທີ 9 ກໍ­ລະ­ກົດ 2019 ຢູ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພ້ອມ​ດ້ວຍ​ຮອງ​ລັດ­ຖະ­ມົນ­ຕີ ທູ­ຕາ­ນຸ­ທູດ ແລະ ອົງ​ການ­ຈັດ­ຕັ້ງ​ສາ­ກົນ ປະ­ຈຳ ສປປ ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສະ­ເຫຼີມ​ໄຊ ກົມ​ມະ​ສິດ ກ່າວ​ວ່າ: ປັດ­ຈຸ­ບັນ ສປປ ລາວ ໄດ້​ມີ​ຂໍ້​ຕົກ­ລົງ​ຍົກ­ເວັ້ນ​ວີ​ຊາ​ປະ­ເພດ​ຕ່າງໆ​ແບບ​ສອງ​ຝ່າຍ ແລະ ຍົກ­ເວັ້ນ​ຝ່າຍ​ດຽວ​ກັບ 46 ປະ­ເທດ​ທົ່ວ​ໂລກ ພ້ອມ​ນີ້ ຍັງ​ໄດ້​ບໍ­ລິ­ການ​ອອກ​ວີ​ຊາ​ໃຫ້​ຄົນ​ຕ່າງ­ປະ­ເທດ​ທີ່​ມີ​ຈຸດ­ປະ­ສົງ​ເຂົ້າ ສປປ ລາວ ຜ່ານ​ບັນ­ດາ​ສະ­ຖານ­ທູດ ສະ­ຖານ​ກົງ­ສຸນ​ໃຫຍ່ ແລະ ຫ້ອງ­ການ​ກົງ­ສຸນ​ຂອງ​ລາວ​ຢູ່​ຕ່າງ­ປະ­ເທດ ກໍ​ຄື ຜ່ານ​ໜ່ວຍ​ງານ​ອອກ​ວີ​ຊາ​ປະ­ຈຳ​ຢູ່​ດ່ານ​ສາ­ກົນ 21 ດ່ານ ທົ່ວ​ປະ­ເທດ ເພື່ອ​ເປັນ​ທາງ​ເລືອກ​ສຳ­ລັບ​ການ​ຂໍ​ວີ​ຊາ​ເຂົ້າ ສປປ ລາວ ແຕ່​ການ​ບໍ­ລິ­ການ​ອອກ​ວີ​ຊາ​ໃຫ້​ຄົນ​ຕ່າງ­ປະ­ເທດ​ຍັງ​ມີ​ຂີດ​ຈຳ­ກັດ ແລະ ບໍ່​ທົ່ວ​ເຖິງ ຍ້ອນ​ຈຳ­ນວນ​ສຳ­ນັກ­ງານ​ຜູ້­ຕາງ­ໜ້າ ກໍ​ຄື ກົງ­ສຸນ ສປປ ລາວ ຢູ່​ຕ່າງ­ປະ­ເທດ​ຍັງ​ມີ​ຈຳ­ກັດ ເຮັດ​ໃຫ້​ຂະ​ບວນ​ການ​ຂໍ​ວີ​ຊາ​ເຂົ້າ ສປປ ລາວ ພົບ​ຄວາມ​ຫຍຸ້ງ­ຍາກ ໂດຍ​ສະ­ເພາະ ຢູ່​ບັນ­ດາ​ປະ­ເທດ​ທີ່​ບໍ່​ມີ​ສຳ­ນັກ­ງານ​ຕາງ­ໜ້າ​ການ​ທູດ​ລາວ​ຕັ້ງ​ຢູ່.

    ໂດຍ​ປະ­ຕິ­ບັດ​ນະ­ໂຍ­ບາຍ​ເປີດ​ກວ້າງ​ການ​ພົວ­ພັນ​ຮ່ວມ​ມື​ກັບ​ຕ່າງ­ປະ­ເທດ ໃນ​ການ​ຍົກ​ລະ­ດັບ​ລະ­ບົບ​ການ​ອອກ​ວີ​ຊາ​ເຂົ້າ ສປປ ລາວ ໄປ​ສູ່​ລະ­ດັບ​ທັນ​ສະ­ໄໝ ມີ​ປະ​ສິດ­ທິ​ຜົນ ແລະ ໂປ່ງ​ໃສ ລັດ­ຖະ­ບານ ສປປ ລາວ ຈຶ່ງ​ຕົກ­ລົງ​ໃຫ້​ມີ​ການ​ພັດ­ທະ­ນາ​ລະ­ບົບ​ອອກ​ວີ​ຊາ​ອອນ​ລາຍ ເພື່ອ​ເປັນ​ທາງ​ເລຶອກ​ໃໝ່​ໃຫ້​ຄົນ​ຕ່າງ­ປະ­ເທດ ແນ­ໃສ່​ຊຸກ­ຍູ້-ສົ່ງ­ເສີມ​ການ​ພົວ­ພັນ​ຮ່ວມ​ມື​ໃນ​ດ້ານ​ຕ່າງໆ ກໍ​ຄື ການ​ໄປ-ມາ​ຫາ​ສູ່​ລະ­ຫວ່າງ​ຄົນ​ລາວ ແລະ ຄົນ​ຕ່າງ­ປະ­ເທດ ໃຫ້​ມີ​ການ​ຂະ­ຫຍາຍ­ຕົວ​ຍິ່ງ​ຂຶ້ນ ລະ­ບົບ​ວີ​ຊາ​ອອນ​ລາຍ​ນີ້ ໄດ້​ອອກ​ແບບ​ໃຫ້​ມີ​ລັກ­ສະ­ນະ​ງ່າຍ­ດາຍ ສະ­ດວກ ວ່ອງ­ໄວ ແລະ ມີ​ຄວາມ​ປອດ​ໄພ ເຊິ່ງ​ທຸກ​ຄົນ​ສາ­ມາດ​ສະ­ເໜີ​ຂໍ​ວີ​ຊາ​ເຂົ້າ ສປປ ລາວ ທາງ​ອອນ​ລາຍ​ໄດ້​ທຸກ​ເວ­ລາ ແລະ ທຸກ​ສະ­ຖານ­ທີ່ ທີ່​ມີ​ອິນ​ເຕີ​ເນັດ ແລະ ເປັນ​ການ​ປະ­ຢັດ​ຄ່າ​ໃຊ້​ຈ່າຍ ຖ້າ​ທຽບ­ໃສ່​ການ​ໄປ​ເອົາ​ຢູ່​ບັນ­ດາ​ສະ­ຖານ­ທູດ ສະ­ຖານ​ກົງ­ສຸນ​ໃຫຍ່ ເຊິ່ງ​ລັດ­ຖະ­ບານ​ໄດ້​ອະ­ນຸ­ຍາດ​ໃຫ້​ນຳ​ໃຊ້​ຢູ່ 7 ດ່ານ ຄື: ສະ­ໜາມ​ບິນ​ສາ­ກົນ​ວັດ​ໄຕ ຂົວ​ມິດ­ຕະ­ພາບ 1, 2 ແລະ 4 ສະ­ໜາມ​ບິນ​ສາ­ກົນ​ຫຼວງ​ພະ​ບາງ ສະ­ໜາມ​ບິນ​ສາ­ກົນ​ປາກ​ເຊ ແລະ ດ່ານ​ບໍ່​ເຕັນ ເພື່ອ​ເປັນ​ດ່ານ​ໃນ​ການ​ຮອງ​ຮັບ ແລະ ບໍ­ລິ­ການ​ສຳ­ລັບ​ຄົນ​ຕ່າງ­ປະ­ເທດ​ທີ່​ນຳ​ວີ​ຊາ​ອອນ​ລາຍ​ເຂົ້າ ສປປ ລາວ ໄລ­ຍະ​ເລີ່ມ​ຕົ້ນ​ຈະ​ເລີ່ມ​ໃຫ້​ບໍ­ລິ­ການ​ຢູ່ 2 ຈຸດ ຄື: ສະ­ໜາມ​ບິນ​ສາ­ກົນ​ວັດ​ໄຕ ແລະ ຂົວ​ມິດ­ຕະ­ພາບ 1 ຈາກ​ນັ້ນ ຈະ​ຂະ­ຫຍາຍ​ໄປ​ສູ່​ດ່ານ​ອື່ນໆ​ທີ່​ເຫຼືອ​ໃຫ້​ສຳ­ເລັດ ປັດ­ຈຸ­ບັນ ຜູ້​ທີ່​ໃຊ້​ວີ​ຊາ​ອອນ​ລາຍ​ສາ­ມາດ​ເຂົ້າ ສປປ ລາວ ໄດ້​ໂດຍ​ຜ່ານ 2 ດ່ານ​ດັ່ງ­ກ່າວ ທີ່ www.laoevisa.gov.la.

ຂ່າວທີ່ກ່ຽວຂ້ອງ