ພົບເຊື້ອພະຍາດອະຫິວາໝູອາຟຣິກາ ເພີ່ມຢູ່ບ້ານນາສ້ຽວ

407 10 ກ.ລ. 2019 ຂ່າວໜ້າ​ໜຶ່ງ
ພົບເຊື້ອພະຍາດອະຫິວາໝູອາຟຣິກາ ເພີ່ມຢູ່ບ້ານນາສ້ຽວ

    ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໃຫ້​ສຳ­ພາດ​ກ່ຽວ​ກັບ​ການ​ແນະ­ນຳ​ວິ­ທີ​ການ​ຄວບ​ຄຸມ ແລະ ປ້ອງ​ກັນ​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ ທີ່​ກຳ­ລັງ​ລະ­ບາດ​ຢູ່ ສປປ ລາວ ວັນ​ທີ 8 ກໍ­ລະ­ກົດ 2019 ຢູ່​ກົມ​ລ້ຽງ­ສັດ ແລະ ການ​ປະ­ມົງ ວ່າ: ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ ເກີດ​ຂຶ້ນ​ເປັນ​ຄັ້ງ​ທຳ​ອິດ​ຢູ່ ສປປ ລາວ ວັນ​ທີ 20 ມິ­ຖຸ­ນາ 2019 ຢູ່​ບ້ານ​ສາ­ມັກ­ຄີ​ໄຊ ເມືອງ​ຕຸ້ມ​ລານ ແຂວງ​ສາ­ລະ​ວັນ ມີ​ໝູ​ຕາຍ ແລະ ຖືກ​ທຳ­ລາຍ​ໄປ​ແລ້ວ 2.340 ໂຕ ແລະ ວັນ​ທີ 1 ກໍ­ລະ­ກົດ 2019 ໄດ້​ມີ​ການ​ລາຍ​ງານ​ໝູ​ຕາຍ​ຢູ່​ບ້ານ​ນາ​ສ້ຽວ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ພົບ​ວ່າ​ມີ​ໝູ​ໄດ້​ຮັບ​ເຊື້ອ​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ​ແລ້ວ 110 ໂຕ ໃນ​ນີ້ ຕາຍ​ເອງ 96 ໂຕ ທຳ­ລາຍ 14 ໂຕ ເຊິ່ງ​ເຂດ​ດັ່ງ­ກ່າວ ໄດ້​ປະ­ກາດ​ເປັນ​ເຂດ​ແດງ (ເຂດ​ທີ່​ມີ​ການ​ລະ­ບາດ​ເຊື້ອ​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ) ແລ້ວ.

    ຕໍ່​ເຫດ­ການ​ດັ່ງ­ກ່າວ ກໍ​ໄດ້​ເຂັ້ມ​ງວດ​ບໍ່​ໃຫ້​ມີ​ການ​ນຳ​ໝູ​ເຂົ້າ-ອອກ​ໃນ​ເຂດ​ທີ່​ມີ​ການ​ລະ­ບາດ ໂດຍ​ມີ​ເຈົ້າ​ໜ້າ­ທີ່​ກວດ­ກາ​ຢ່າງ​ເຂັ້ມ​ງວດ​ປະ­ຈຳ​ຢູ່​ເຂດ​ດັ່ງ­ກ່າວ​ສະ­ເພາະ ສ່ວນ​ເຂດ​ອື່ນ​ໃນ​ທົ່ວ​ປະ­ເທດ ກໍ​ໄດ້​ມີ​ການ​ເຝິກ­ອົບ­ຮົມ​ໃຫ້​ຄວາມ​ຮູ້​ກ່ຽວ​ກັບ​ຄວາມ​ຮ້າຍ​ແຮງ​ຂອງ​ພະ­ຍາດ​ດັ່ງ­ກ່າວ ເພື່ອ​ໃຫ້​ທຸກ​ຄົນ​ຫັນ​ມາ​ຮ່ວມ​ມື​ສະ­ກັດ​ກັ້ນ ແລະ ໂຕ້​ຕອບ​ພະ­ຍາດ​ນີ້​ຢ່າງ​ທັນ​ການ ປັດ­ຈຸ­ບັນ ແມ່ນ​ໄດ້​ສືບ­ຕໍ່​ເຝົ້າ​ລະ­ວັງ​ເພື່ອ​ບໍ່​ໃຫ້​ພະ­ຍາດ​ນີ້ ຂະ­ຫຍາຍ​ອອກ​ເປັນ​ວົງ​ກວ້າງ ສຳ­ລັບ​ທຸ­ລະ​ກິດ​ຟາມ​ແມ່ນ​ໃຫ້​ມີ​ມາດ​ຕະ­ການ​ເຂັ້ມ​ງວດ​ໃນ​ການ​ເຂົ້າ-ອອກ ແລະ ສີດ​ພົ່ນ​ຢາ​ຂ້າ​ເຊື້ອ ພ້ອມ​ຮັກ­ສາ​ຄວາມ​ສະ­ອາດ​ຢູ່​ສະ­ເໝີ ສ່ວນ​ປະ­ຊາ­ຊົນ​ຖ້າ​ເກີດ​ມີ​ການ​ລະ­ບາດ​ຢູ່​ໃສ​ໃຫ້​ຕອບ​ໂຕ້​ຢ່າງ​ທັນ­ທີ ດ້ວຍ​ການ​ທຳ­ລາຍ​ຖິ້ມ (ເຜົາ ຫຼື ຝັງ) ພາຍ­ຫຼັງ​ສະ­ພາບ​ສະ­ຫງົບ ພາກ​ລັດ​ກໍ​ໄດ້​ມີ​ການ​ຊົດ​ເຊີຍ​ຄືນ​ໃນ​ເບື້ອງ​ຕົ້ນ​ໃຫ້​ຜູ້​ທີ່​ໄດ້​ຮັບ​ຜົນ​ກະ­ທົບ ເຊິ່ງ​ອາດ​ຈະ​ບໍ່​ສາ­ມາດ​ເຮັດ​ໄດ້​ເຕັມ​ສ່ວນ ແຕ່​ຈະ​ຊົດ​ເຊີຍ​ໃຫ້​ດ້ວຍ​ການ​ຊື້​ໝູ​ພໍ່-ແມ່​ພັນ​ໃຫ້​ລ້ຽງ​ຄືນ ເພື່ອ​ຕອບ​ສະ­ໜອງ​ວຽກ​ງານ​ຄ້ຳ­ປະ­ກັນ​ສະ­ບຽງ​ອາ­ຫານ ແລະ ຜະ­ລິດ​ໝູ​ເປັນ​ສິນ­ຄ້າ​ຂອງ​ລາວ.

ຂ່າວທີ່ກ່ຽວຂ້ອງ