RCEP ຈະມີຜົນສະຫຼຸບໃນປີນີ້

411 10 ກ.ລ. 2019 ນານາສາລະ

    ສົງ­ຄາມ​ການ​ຄ້າ​ລະ­ຫວ່າງ​ສອງ​ມະ­ຫາ​ອຳ­ນາດ​ໂລກ​ໄດ້​ຢຸດ­ຕິ​ຊົ່ວ­ຄາວ... ແຕ່​ກໍ​ຕ້ອງ​ຍອມ­ຮັບ​ວ່າ​ມັນ​ມີ​ຜົນ​ສະ­ທ້ອນ​ຕໍ່​ເສດ­ຖະ­ກິດ​ໂລກ ກໍ​ຄື ກຸ່ມ​ອາ​ຊຽນ ສະ­ນັ້ນ ໃນ​ກອງ​ປະ­ຊຸມ​ສຸດ​ຍອດ​ຜູ້­ນຳ​ອາ​ຊຽນ ຄັ້ງ​ທີ 34 ທີ່​ມີ​ຂຶ້ນ​ໃນ​ລະ­ຫວ່າງ​ວັນ​ທີ 22-23 ມິ­ຖຸ­ນາ 2019 ຢູ່​ບາງ­ກອກ ປະ­ເທດ​ໄທ​ນັ້ນ ບັນ­ດາ​ການ​ນຳ​ອາ​ຊຽນ ກໍ​ເຫັນ​ດີ​ເປັນ​ເອ­ກະ​ພາບ​ຊຸກ­ຍູ້​ການ​ເຈລະ­ຈາ RCEP ໃຫ້​ສິ້ນ​ສຸດ​ໃນ​ປີ​ນີ້.

    ກ່ອນ​ກອງ​ປະ­ຊຸມ​ຜູ້­ນຳ​ສູງ​ສຸດ​ອາ​ຊຽນ​ນັ້ນ ລັດ­ຖະ­ມົນ­ຕີ​ເສດ­ຖະ­ກິດ​ອາ​ຊຽນ ກໍ​ໄດ້​ມີ​ການ​ປະ­ຊຸມ​ພິ­ເສດ​ເພື່ອ​ເຈລະ­ຈາ RCEP ໃນ​ວັນ​ທີ 21-22 ມິ­ຖຸ­ນາ 2019 ທີ່​ບາງ­ກອກ ໂດຍ​ຕັ້ງ​ເປົ້າ​ໃຫ້​ມີ​ການ​ປະ­ກາດ​ສະ­ຫຼຸບ ຜົນ​ການ​ເຈລະ­ຈາ​ໃນ​ໄລ­ຍະ​ກອງ​ປະ­ຊຸມ​ສຸດ​ຍອດ​ຜູ້­ນຳ​ອາ​ຊຽນ ໃນ​ເດືອນ​ພະ­ຈິກ​ທີ່​ຈະ​ມາ​ເຖິງ.

    RCEP ຫຼື ມີ​ຊື່​ເຕັມ​ວ່າ: Regional Comprehensive Economic Partnership.

ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ: ຄູ່​ຮ່ວມ​ມື​ນີ້​ເກີດ​ຂຶ້ນ​ໃນ​ກອງ​ປະ­ຊຸມ​ສຸດ​ຍອດ​ຜູ້­ນຳ​ອາ​ຊຽນ (ASEAN SUMMIT) ທີ່​ປະ­ເທດ​ກຳ­ປູ­ເຈຍ ລະ­ຫວ່າງ​ວັນ​ທີ 18-20 ພະ­ຈິກ 2012 ໂດຍ​ການ​ເຈລະ­ຈາ​ສ້າງ­ຕັ້ງ​ກຸ່ມ ເລີ່ມ​ແຕ່​ຕົ້ນ​ປີ 2014 ເປັນ­ຕົ້ນ​ມາ.

    RCEP ຫຼື ພວກ​ເຮົາ​ມັກ­ໄດ້​ຍິນ ຫຼື ເຫັນ​ຕາມ​ສື່​ມວນ​ຊົນ​ວ່າ (ອາ​ຊຽນ+6) ເຊິ່ງ​ປະ­ກອບ​ດ້ວຍ​ກຸ່ມ​ປະ­ເທດ​ອາ​ຊຽນ 10 ປະ­ເທດ ແລະ 6 ປະ­ເທດ​ຄູ່​ເຈລະ­ຈາ ຄື: ສປ ຈີນ ຍີ່­ປຸ່ນ ເກົາ­ຫຼີ​ໃຕ້ ອິນ​ເດຍ ອົດ​ສະ​ຕຣາ​ລີ ແລະ ນູ​ແວນ​ເຊ​ລັງ.

    ທັງ 16 ປະ­ເທດ​ນີ້ ມີ​ພົນ­ລະ­ເມືອງ​ປະ­ມານ 3.560 ລ້ານ​ຄົນ ຫຼື ເກືອບ​ເຄິ່ງ​ໜຶ່ງ​ຂອງ​ພົນ­ລະ­ເມືອງ​ໂລກ ມີ​ມູນ​ຄ່າ​ການ​ຄ້າ​ລວມ 11,4 ພັນ​ຕື້​ໂດ​ລາ ຄິດ​ເປັນ 30% ຂອງ​ມູນ​ຄ່າ​ການ​ຄ້າ​ໂລກ ສຳ­ລັບ​ປີ 2018 ຜ່ານ​ມາ ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ກໍ​ມີ​ການ​ພົວ­ພັນ​ການ​ຄ້າ​ກັບ 6 ປະ­ເທດ​ດັ່ງ­ກ່າວ ເປັນ­ຕົ້ນ​ແມ່ນ​ການ​ສົ່ງ​ອອກ​ສິນ­ຄ້າ​ກະ­ສິ­ກຳ ນ້ຳ­ມັນ​ສຳ­ເລັດ​ຮູບ ເຄື່ອງ​ຄອມ​ພິວ​ເຕີ ເຄ​ມີ​ພັນ ຜະ­ລິດ​ຕະ​ພັນ​ຢາງ­ພາ­ລາ ເຄື່ອງ​ກົນ​ຈັກ ລົດ ອຸ­ປະ­ກອນ ແລະ ສ່ວນ​ປະ­ກອບ​ເມັດ​ປລາ­ສະ­ຕິກ ເຫຼັກ ເປັນ­ຕົ້ນ.

    ການ​ເກີດ​ຂຶ້ນ​ຂອງ RCEP ແມ່ນ​ເພື່ອ​ເປັນ​ການ​ເສີມ​ສ້າງ​ຄວາມ​ເຂັ້ມ­ແຂງ ໃນ​ທາງ​ການ​ຄ້າ​ລະ­ຫວ່າງ​ປະ­ເທດ​ສະ­ມາ­ຊິກ​ທັງ 16 ປະ­ເທດ ໃນ​ທ່າມ­ກາງ​ວິ​ກິດ​ສົງ­ຄາມ​ການ​ຄ້າ​ຂອງ​ສອງ​ມະ­ຫາ​ອຳ­ນາດ​ໂລກ ທັງ​ເປັນ​ການ​ສ້າງ​ຄວາມ​ເຊື່ອ​ໝັ້ນ​ໃຫ້​ແກ່​ພູ­ມີ­ພາກ​ອາ​ຊຽນ ແລະ RCEP ໄປ​ສູ່​ການ​ຂະ­ຫຍາຍ­ຕົວ​ທາງ​ການ​ຄ້າ ແລະ ການ​ລົງ­ທຶນ ໂດຍ​ຂໍ້​ຕົກ­ລົງ RCEP ຈະ​ເປັນ​ຂໍ້​ຕົກ­ລົງ​ການ​ຄ້າ​ເສລີ​ທີ່​ມີ​ຂະ­ໜາດ​ໃຫຍ່​ທີ່​ສຸດ​ໃນ​ໂລກ ພ້ອມ​ກັນ​ນັ້ນ ມັນ​ຍັງ​ຊ່ວຍ​ໃຫ້​ກຸ່ມ​ອາ​ຊຽນ​ສາ­ມາດ​ຮັບ​ມື​ກັບ​ຄວາມ​ປ່ຽນ­ແປງ ແລະ ຄວາມ​ບໍ່​ແນ່­ນອນ​ທີ່​ເກີດ​ຂຶ້ນ​ໃນ​ພູ­ມີ­ພາກ ໂດຍ​ສະ­ເພາະ ຜົນ​ກະ­ທົບ​ຈາກ​ຄວາມ​ເຄັ່ງ​ຕຶງ​ທາງ​ການ​ຄ້າ (Trade tension) ລະ­ຫວ່າງ​ຄູ່​ຄ້າ​ທີ່​ສຳ­ຄັນ​ຂອງ​ອາ​ຊຽນ.

    RCEP ຈະ​ເປັນ​ທາງ​ອອກ​ໃຫ້​ແກ່​ການ​ຄ້າ​ໂລກ ໃນ​ຂະ­ນະ​ທີ່​ມະ­ຫາ​ອຳ­ນາດ​ໂລກ ພວມ​ຕໍ່­ສູ້​ກັນ​ຢ່າງ​ຂ້ຽວ­ຂາດ.

ແນວ​ລາວ

ຂ່າວທີ່ກ່ຽວຂ້ອງ