ໂນນ​ພູ​ໝາກ​ອະ​ງຸ່ນ Prosecco ພະລາດ​ຊະ​ວັງ Khan ແລະ ເມືອງ​ບູຮານ​ຫຼຽງ​ຈູກາຍເປັນ​ມໍ​ລະ​ກົດ​ໂລກ

116 10 ກ.ລ. 2019 ຂ່າວຕ່າງປະເທດ
ໂນນ​ພູ​ໝາກ​ອະ​ງຸ່ນ Prosecco ພະລາດ​ຊະ​ວັງ Khan ແລະ ເມືອງ​ບູຮານ​ຫຼຽງ​ຈູກາຍເປັນ​ມໍ​ລະ​ກົດ​ໂລກ

    ເຂດ​ໂນນ​ພູ​ໝາກ​ອະ​ງຸ່ນ (ໝາກ ລາ​ແຊງ)  Prosecco ຂອງ​ອີ​ຕາ​ລີ ຊຶ່ງ​ຕັ້ງ​ຢູ່​ທິດຕາເວັນອອກ​ສ່ຽງ​ເໜືອ​ນະຄອນ ເວ​ນິ​​ສ ພະລາດ​ຊະ​ວັງ ຄານ (Khan) ຕັ້ງ​ຢູ່​ທາງ​ທິດຕາເວັນອອກ​ສ່ຽງເໜືອ​ນະຄອນ ເຊ​ກິ ໃນ​ເຂດ​ຕີນ​ພູ ເກຣດ​ເຕີ ກັບ​ກາ​​ສ ຂອງ​ແຊກ​ໄບ​ຊານ; ແລະ ຮ່ອງຮອຍ​ເມືອງ​ບູຮານ​ຫຼຽງ​ຈູ ຂອງ​ຈີນ ຕ່າງ​ກໍ​ໄດ້​ຮັບ​ການ​ຮັບຮອງ​ເປັນ​ມໍລະດົກ​ຂອງ​ມວນ​ມະນຸດ ການ​ຮັບຮອງ​ດັ່ງກ່າວ ມີ​ຂຶ້ນ​ຢູ່​ໃນ​ວາລະ​ປະຊຸມ ຂອງ​ຄະນະ​ກຳມະການ​ມໍລະດົກ​ໂລກ ຂອງ​ອົງການ​ສຶກ​ສາ ວິທະຍາສາດ ແລະ ວັດທະນະທຳ​ຂອງ​ສະຫະ​ປະຊາ​ຊາດ (UNESCO) ຊຶ່ງ​ຈັດ​ຂຶ້ນ ທີ່​ນະຄອນຫຼວງ​ບາ​ກູ ຂອງ​ອາ​ແຊກ​ໄບ​ຊານ ເມື່ອ​ອາທິດ​ທີ່​ຜ່ານ​ມາ.

     ເຂດ​ໂນນ​ພູ​ໝາກ​ອະ​ງຸ່ນ Prosecco ເປັນ​ດິນ​ດອນ​ທີ່​ອຸດົມສົມບູນ ປົກ​ຄຸມ​ໄປ​ດ້ວຍ​ສວນ​ໝາກ​ອະ​ງຸ່ນ ຕັ້ງ​ຢູ່​ລະຫວ່າງ​ໂນນ​ພູ Conegliano ກັບ​ໂນນ​ພູ Valdobbiadene ດົນ​ນານ​ມາ​ແລ້ວ​ທີ່ Prosecco ໄດ້​ກາຍເປັນ​ກາ​ໝາຍ​ການ​ຄ້າ​ຂອງ​ເຫຼົ້າ​ແວງ​ສີຂາວ​ທີ່​ລື​ຊື່​ຂອງ​ອີ​ຕາ​ລີ.

     ສ່ວນ ພະລາດ​ຊະ​ວັງ Khan ທີ່​ຂຶ້ນ​ກັບ​ນະຄອນ​ປະຫວັດສາດ ເຊ​ກີ (Sheki) ຊຶ່ງ​ສະຕະວັດ​ທີ 18 ນະຄອນ​ນີ້​ໄດ້​ຖືກ​ທຳລາຍ​ໂດຍ​ກະແສ​ຂີ້ຕົມ​ທີ່​ໄຫຼ​ລົງ​ມາ ແລະ ຫຼັງ​ຈາກ​ນັ້ນ​ໄດ້​ຮັບ​ການ​ກໍ່ສ້າງ​ຄືນໃໝ່ ຈຸດ​ພິເສດ​ຂອງ​ພະລາດ​ຊະ​ວັງ​ແຫ່ງ​ນີ້ ກໍ​ແມ່ນ​ພວກ​ອາຄານ ທີ່​ໄດ້​ຮັບ​ອິດ​ທິ​ພົນ​ຂອງ​ສະ​ຖາ​ປັດ​ຕະ​ຍາ​ກຳ ຊາ​ຟາ​ວິດ (Safavid) ກັດ​ຈາ (Qadjar) ແລະ ຣັດ​ເຊຍ ໃນ​ໄລຍະ​ແຕ່​ທ້າຍ​ສະຕະວັດ​ທີ 18 ຫາ​ສະຕະວັດ​ທີ 19 ນະຄອນ ເຊ​ກີ ຖືກ​ຖື​ວ່າ​ເປັນ​ບ່ອນ​ຢຸດ​ແວ່ ບົນ​ເສັ້ນທາງ​ສາຍໄໝ ແລະ ເປັນ​ບ່ອນ​ແວ່​ຂອງ​ພໍ່ຄ້າ​ຊາວ​ຈີນ.

    ໃນ​ຂະນະ​ດຽວ​ກັນ UNESCO ກໍ​ໄດ້​ຮັບຮອງ​ເອົາ ຮ່ອງຮອຍ​ເມືອງ​ບູຮານ​ຫຼຽງ​ຈູ ຂອງ​ຈີນ ເຂົ້າ​ໃນ​ບັນຊີ​ລາຍ​ຊື່​ມໍລະດົກ​ໂລກ ໂດຍ​ເມືອງ​ບູຮານ​ຫຼຽງ​ຈູ ໄດ້​ສະໜອງ​ຫຼັກ​ຖານ​ພິເສດ ແລະ ຜົນ​ການ​ຄົ້ນ​ພົບ​ບູຮານ​ຄະດີ ໃຫ້​ແກ່​ອາ​ລິ​ຍະ​ທຳ ແລະ ວັດທະນະທຳ​ຈີນ​ທີ່​ມີ​ມູນເຊື້ອ ຮ່ອງຮອຍ​ຫຼຽງ​ຈູ ມີ​ປະຫວັດສາດ​ຫຼາຍ​ກວ່າ 5.000 ປີ ຕັ້ງ​ຢູ່​ພາກ​ຕາເວັນຕົກ​ສ່ຽງ​ໃຕ້​ຂອງ​ເຂດ​ລ້ອງ​ໜອງ​ທ້າຍ​ຫູ ໄດ້​ຄົ້ນ​ພົບ​ຮ່ອງຮອຍ​ວັດທະນະທຳ​ຫຼຽງ​ຈູ 1000 ກວ່າ​ແຫ່ງ.

ຂ່າວທີ່ກ່ຽວຂ້ອງ