ພະຍາດຝູງບົ້ງສາລີ ໄດ້ທຳລາຍພືດສາລີເນື້ອທີ່ 4 ພັນກວ່າເຮັກຕາ

464 09 ກ.ລ. 2019 ຂ່າວໜ້າ​ໜຶ່ງ

    ບັນ­ຫາ​ການ​ລະ­ບາດ​ຂອງ​ພະ­ຍາດ​ພືດ ແລະ ສັດ­ລ້ຽງ ຖ້າ​ເກີດ​ຂຶ້ນ​ຢູ່​ປະ­ເທດ​ໃດ​ເຂດ​ໃດ​ມັນ​ໄດ້​ກະ­ທົບ​ຕໍ່​ເສດ­ຖະ­ກິດ​ຂອງ​ປະ­ເທດ​ນັ້ນ ດັ່ງ­ນັ້ນ ລັດ­ຖະ­ບານ​ລາວ​ເຮົາ ຈຶ່ງ​ໃຫ້​ຄວາມ​ສຳ­ຄັນ ຖ້າ​ມີ​ພະ­ຍາດ​ລະ­ບາດ​ກໍ​ເລັ່ງ​ແກ້​ໄຂ​ດ້ວຍ​ຫຼາຍ​ວິ­ທີ ເພື່ອ​ບໍ່​ໃຫ້​ແຜ່​ລາມ​ໄປ​ວົງ​ກວ້າງ ປັດ­ຈຸ­ບັນ ປະ­ເທດ​ເຮົາ​ພວມ​ປະ​ເຊີນ​ກັບ​ບັນ­ຫາ​ການ​ລະ­ບາດ​ຂອງ​ຝູງ​ບົ້ງ​ສາ­ລີ​ຢູ່​ຫຼາຍ​ແຂວງ ແລະ ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ​ຢູ່​ເມືອງ​ຕຸ້ມ​ລານ ແຂວງ​ສາ­ລະ​ວັນ.

    ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໃຫ້​ຮູ້​ວ່າ: ໃນ 2-3 ປີ­ຜ່ານ­ມາ ຍ້ອນ​ມີ​ການ​ປ່ຽນ­ແປງ​ຂອງ​ດິນ​ຟ້າ​ອາ­ກາດ​ຢູ່​ໃນ​ໂລກ​ຢ່າງ​ຮ້າຍ​ແຮງ ຈຶ່ງ​ເຮັດ​ໃຫ້​ເກີດ​ມີ​ພະ­ຍາດ​ລະ­ບາດ​ຕ່າງໆ​ເກີດ​ຂຶ້ນ ເປັນ­ຕົ້ນ ການ​ລະ­ບາດ​ຂອງ​ຝູງ​ເຕັກ​ແຕນ​ໄມ້­ປ່ອງ​ໄດ້​ດຳ­ເນີນ​ມາ​ເປັນ​ເວ­ລາ 5 ປີ ຢູ່​ໃນ​ບັນ­ດາ​ແຂວງ​ພາກ​ເໜືອ​ສິ່ງ​ດັ່ງ­ກ່າວ​ນີ້ ຍັງ​ສືບ­ຕໍ່​ຂະ­ຫຍາຍ­ຕົວ​ໄປ​ສູ່​ບັນ­ດາ​ແຂວງ​ຊາຍ​ແດນ​ຕ່າງໆ ເຖິງ​ວ່າ​ພວກ​ເຮົາ​ມີ​ມາດ​ຕະ­ການ​ຕ່າງໆ​ຈຳ­ກັດ ເພື່ອ​ບໍ່​ໃຫ້​ຝູງ​ເຕັກ​ແຕນ​ມາ​ທຳ­ລາຍ​ຜົນ­ລະ­ປູກ​ຂອງ​ປະ­ຊາ­ຊົນ ແລະ ປີ 2019 ເນື້ອ­ທີ່​ສາ­ລີ​ຂອງ​ປະ­ຊາ­ຊົນ​ຫຼາຍ​ທ້ອງ­ຖິ່ນ ກໍ​ພວມ​ປະ­ສົບ​ບັນ­ຫາ​ຢ່າງ​ໜັກ­ໜ່ວງ​ທີ່​ສຸດ ເປັນ​ຝູງ​ບົ້ງ​ສາ­ລີ​ໄດ້​ທຳ­ລາຍ​ສາ­ລີ​ປີ​ທຳ​ອິດ​ເປັນ​ບໍ­ລິ­ເວນ​ກວ້າງ​ໃນ​ຂອບ​ເຂດ​ທົ່ວ​ປະ­ເທດ ປັດ­ຈຸ­ບັນ ຖື​ວ່າ​ເນື້ອ­ທີ່​ຜົນ​ຜະ­ລິດ​ສາ­ລີ​ທີ່​ຖືກ​ທຳ­ລາຍ​ໄປ​ແລ້ວ 4.000 ກວ່າ​ເຮັກ­ຕາ ໃນ​ທົ່ວ​ປະ­ເທດ ພືດ​ເສດ­ຖະ­ກິດ​ນີ້​ທີ່​ມີ​ຄວາມ​ໝາຍ​ສຳ­ຄັນ​ທີ່​ສຸດ ເພາະ​ມັນ​ເປັນ​ແຫຼ່ງ​ວັດ­ຖຸ​ດິບ​ໃຫ້​ແກ່​ການ​ຜະ­ລິດ​ຫົວ­ອາ­ຫານ​ສັດ ແລະ ເປັນ​ສິນ­ຄ້າ​ທີ່​ປະ­ຊາ­ຊົນ​ລາວ​ປູກ​ຢ່າງ​ຫຼວງ­ຫຼາຍ​ຢູ່​ໃນ​ທົ່ວ​ປະ­ເທດ ປັດ­ຈຸ­ບັນ ຂະ­ແໜງ​ກະ­ສິ­ກຳ ແລະ ປ່າ­ໄມ້ ໄດ້​ສຸມ​ທຶນ­ຮອນ ແລະ ກຳ­ລັງ​ແຮງ​ແຕ່ງ­ຕັ້ງ​ຄະ­ນະ​ກຳ­ມະ­ການ​ຊີ້​ນຳ​ລົງ​ຕິດ­ຕາມ​ຊຸກ­ຍູ້ ແລະ ຊ່ວຍ­ເຫຼືອ​ປະ­ຊາ­ຊົນ​ຜູ້​ປະ­ກອບ​ການ ແລະ ແນະ­ນຳ​ໃຫ້​ອົງ­ການ​ປົກ­ຄອງ​ທ້ອງ­ຖິ່ນ ຮ່ວມ​ກັນ​ສະ­ກັດ​ກັ້ນ​ແກ້​ໄຂ​ຝູງ​ບົ້ງ​ສາ­ລີ​ໃນ​ທົ່ວ​ປະ­ເທດ ປັດ­ຈຸ­ບັນ ກຳ­ລັງ​ປະ­ຕິ­ບັດ​ຢ່າງ​ຫ້າວ­ຫັນ​ຢູ່​ແຕ່​ລະ​ທ້ອງ­ຖິ່ນ.

ຂ່າວທີ່ກ່ຽວຂ້ອງ