DHL ຫ້ອງການແຫ່ງການເຄື່ອນທີ່

584 09 ກ.ລ. 2019 ຫົວຂໍ້ຂ່າວອື່ນໆ

    “DHL” ຫຼື “ແດວ​ຊີ ຮິວ​ບຼົມ​ແອນ​ລິນ (Dalsey Hillblom and Lynn)” ເປັນ​ບໍ­ລິ­ສັດ​ເຢຍ​ລະ​ມັນ ທີ່​ໃຫ້​ບໍ­ລິ­ການ​ທາງ​ດ້ານ​ຂົນ­ສົ່ງ ແລະ ໂລ​ຈິ​ສ​ຕິກສ໌ ໂດຍ​ມີ​ການ​ຂົນ­ສົ່ງ​ຫຼາຍ​ຢ່າງ​ຕັ້ງ­ແຕ່​ການ​ຂົນ­ສົ່ງ​ເອ­ກະ­ສານ ຈົດ­ໝາຍ ລວມ​ໄປ​ເຖິງ​ຕູ້​ຄອນ​ເທນ​ເນີ ໂດຍ​ມີ​ຫ້ອງ­ການ​ກະ­ຈາຍ​ຢູ່​ຫຼາຍ​ແຫ່ງ​ທົ່ວ​ໂລກ ຊຶ່ງ​ປີ​ທີ່​ຜ່ານ​ມາ “DHL” ເປິດ​ສຳ­ນັກ­ງານ​ແຫ່ງ​ໃໝ່​ໃນ​ເມືອງ​ວາກ​ໂຊ​ວີ ເມືອງ​ຫຼວງ​ຂອງ​ໂປ​ໂລຍ.

    ການ​ອອກ​ແບບ​ຫ້ອງ­ການ​ແຫ່ງ​ນີ້ ເນັ້ນ​ຄວາມ​ສະ­ຫງ່າ​ງາມ ແຕ່​ໃນ​ຂະ­ນະ​ດຽວ​ກັນ ບໍ­ລິ­ສັດ​ກໍ​ຕ້ອງ­ການ​ໃຫ້​ພະ­ນັກ­ງານ​ຮູ້­ສຶກ​ເຖິງ​ຄວາມ​ເປັນ​ກັນ​ເອງ ແລະ ສະ­ດວກ​ສະ­ບາຍ ຈຶ່ງ​ໃຊ້​ການ​ຕົບ­ແຕ່ງ​ຮູບ​ແບບ ລອຟທ໌ (Loft) ທີ່​ເນັ້ນ​ຄວາມ​ກວ້າງ​ຂອງ​ຫ້ອງ​ເພ­ດານ​ສູງ ແລະ ປະ­ຕູ​ປ່ອງ­ຢ້ຽມ​ຂະ­ໜາດ​ໃຫຍ່ ລວມ​ເຖິງ​ສະ­ແດງ​ໃຫ້​ເຫັນ​ສີ​ທີ່­ແທ້​ຈິງ​ຂອງ​ຊີ­ມັງ ແລະ ດິນ­ຈີ່ ສີ​ຂອງ​ເຟີ​ນີ​ເຈີ ເຊັ່ນ: ຕູ້​ຕິດ​ຝາ ໂຕ໊ະ ແລະ ຕັ່ງ­ອີ້ ຊຶ່ງ​ຈະ​ເປັນ​ສີ­ດຳ ເພື່ອ​ໃຫ້​ຄວາມ​ຮູ້­ສຶກ​ສຸ­ຂຸມ ແຕ່​ສາ­ມາດ​ເຂົ້າ​ກັບ​ພື້ນ​ຊີ­ມັງ​ເປືອຍ​ຂັດ​ມັນ ແລະ ພົມ​ສີ​ເທົາ​ຢ່າງ​ເໝາະ​ສົມ.

    ສິ່ງ​ສະ­ດຸດ​ຕາ​ເມື່ອ​ຍ່າງ​ເຂົ້າ​ມາ​ໃນ​ຫ້ອງ­ການ​ແຫ່ງ​ນີ້ ຄື: ພາບ​ທີ່​ຕິດ­ຕາມ​ກຳ­ແພງ​ຫ້ອງ​ຕ່າງໆ ຊຶ່ງ​ເປັນ​ຮູບ​ເມືອງ​ສຳ­ຄັນໆ​ທີ່ DHL ໃຫ້​ບໍ­ລິ­ການ ຈົນ​ເຮັດ​ໃຫ້​ຮູ້­ສຶກ​ວ່າ­ການ​ເຮັດ​ວຽກ​ທີ່​ນີ້​ເຊື່ອມ​ໂຍງ​ກັບ​ໂລກ​ທັງ​ໜ່ວຍ​ເລີຍ.

    ຂົງ­ເຂດ​ທີ່​ຖື​ວ່າ​ເປັນ​ຈຸດ​ລວມ​ຂອງ​ພະ­ນັກ­ງານ​ທີ່​ນີ້ ເອີ້ນ​ໄດ້​ວ່າ​ເປັນ “ຂົງ­ເຂດ​ຄາ​ເຟ່” ຊຶ່ງ​ພະ­ນັກ­ງານ​ສາ­ມາດ​ມາ​ນັ່ງ​ດື່ມ​ເຄື່ອງ​ດື່ມ​ເບົາໆ ຫຼື ອາ­ຫານ ພ້ອມ​ກັບ​ໂອ້​ລົມ​ແລກ­ປ່ຽນ​ຄວາມ​ຄິດ​ເຫັນ​ເປັນ​ຢ່າງ​ດີ.

    ນອກ­ຈາກ​ນັ້ນ ພາຍ​ໃນ​ຫ້ອງ­ການ​ຍັງ​ມີ​ບ່ອນ​ນັ່ງ​ໂຕ໊ະ ຕັ່ງ­ອີ້​ຫຼາຍ​ຈຸດ​ທີ່​ພະ­ນັກ­ງານ​ສາ­ມາດ​ມາ​ນັ່ງ​ເຮັດ​ວຽກ​ປ່ຽນ​ບັນ­ຍາ­ກາດ ບໍ່​ໃຫ້​ຮູ້­ສຶກ​ເບື່ອ​ໜ່າຍ​ຈາກ​ການ​ນັ່ງ​ເຮັດ​ວຽກ​ທີ່​ໂຕ໊ະ​ເດີມໆ​ເປັນ​ປະ­ຈຳ ເພາະ DHL ເຊື່ອ​ວ່າ ການ​ເຄື່ອນ​ທີ່​ລະ­ຫວ່າງ​ການ​ເຮັດ​ວຽກ​ເຮັດ​ໃຫ້​ພະ­ນັກ­ງານ​ເກີດ​ຄວາມ​ຄິດ​ສ້າງ­ສັນ ແລະ ມີ​ຄວາມ­ສຸກ​ໃນ​ການ​ເຮັດ​ວຽກ​ຫຼາຍ​ຂຶ້ນ ອັນ​ສອດ­ຄ່ອງ​ກັບ​ພັນ­ທະ​ກິດ​ຂອງ​ບໍ­ລິ­ສັດ ທີ່​ຕ້ອງ​ເຄື່ອນ​ຍ້າຍ​ສິ່ງ​ຕ່າງໆ​ຈາກ​ບ່ອນ​ໜຶ່ງ​ໄປ​ອີກ​ບ່ອນ​ໜຶ່ງ​ຢູ່​ສະ­ເໝີ.

ຂ່າວທີ່ກ່ຽວຂ້ອງ