ມວຍສາກົນ ກຽມຄັດເລືອກນັກກີລາຮ່ວມຊີເກມ

1.359 09 ກ.ລ. 2019 ວົງຈອນກີລາ
ມວຍສາກົນ ກຽມຄັດເລືອກນັກກີລາຮ່ວມຊີເກມ

    ທ່ານ ສົມ​ພອນ ມະ­ນີ​ຄຳ ເລ­ຂາ­ທິ­ການ​ສະ­ຫະ­ພັນ​ມວຍ​ສາ­ກົນ​ແຫ່ງ​ຊາດ​ລາວ ໃຫ້​ສຳ­ພາດ​ຕໍ່​ສື່​ມວນ​ຊົນ ໃນ​ວັນ​ທີ 2 ກໍ­ລະ­ກົດ 2019 ຜ່ານ​ມາ​ວ່າ: ສະ­ຫະ­ພັນ​ມວຍ​ສາ­ກົນ​ແຫ່ງ​ຊາດ​ລາວ ພວກ​ເຮົາ​ພ້ອມ​ແລ້ວ​ຈະ​ຈັດ­ການ​ແຂ່ງ­ຂັນ​ມວຍ​ສາ­ກົນ ຊີງ​ແຊັມ​ທົ່ວ​ປະ­ເທດ ຄັ້ງ​ທີ Xlll ຊີງ​ຂັນ​ທ່ານ​ປະ­ທານ​ສະ­ຫະ­ພັນ​ມວຍ​ສາ­ກົນ​ແຫ່ງ​ຊາດ​ລາວ ປະ­ຈຳ​ປີ 2019 ລະ­ຫວ່າງ​ວັນ​ທີ 9-11 ສິງ­ຫາ​ນີ້ ທີ່​ສູນ​ການ​ຄ້າ ລາວ-ໄອ​ເຕັກ ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ເພື່ອ​ເປັນ​ການ​ເລືອກ­ເຟັ້ນ​ຫາ 4 ສຸດ​ຍອດ​ນັກ​ຊົກ​ທີມ​ຊາດ​ລາວ ເພື່ອ​ກຽມ​ສົ່ງ​ເຂົ້າ​ຮ່ວມ​ລ່າ​ຫຼຽນ​ຄຳ ໃນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ ຮັບ​ກຽດ​ເປັນ​ເຈົ້າ­ພາບ ໃນ​ທ້າຍ​ປີ 2019.

    ນອກ­ຈາກ​ນີ້ ກໍ​ເພື່ອ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ ວັນ​ລັດ​ຖະ​ທຳ​ມະ­ນູນ​ແຫ່ງ​ຊາດ (15 ສິງ­ຫາ 2019) ອີກ​ດ້ານ​ໜຶ່ງ ກໍ​ເພື່ອ​ເປີດ​ໂອ­ກາດ​ໃຫ້​ນັກ­ກີ­ລາ​ມວຍ​ສາ­ກົນ ບັນ­ດາ​ສະ­ໂມ­ສອນ​ຂອບ​ເຂດ​ທົ່ວ​ປະ­ເທດ ໄດ້​ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ ສາ­ມາດ​ຍົກ​ລະ­ດັບ​ຕົນ​ເອງ​ເຂົ້າ​ຮ່ວມ​ການ​ແຂ່ງ­ຂັນ​ມວຍ​ສາ­ກົນ ລາຍ­ການ​ຕ່າງໆ​ຂອງ​ສະ­ມາ­ຄົມ​ມວຍ​ສາ­ກົນ​ອາ­ຊີບ ແລະ ສະ­ມາ­ຄົມ​ມວຍ​ສາ­ກົນ​ນາໆຊາດ ຈະ​ຈັດ​ຂຶ້ນ​ໃນ­ຕໍ່­ໜ້າ ດັ່ງ­ນັ້ນ ຈຶ່ງ​ໄດ້​ແຈ້ງ​ມາ​ຍັງ​ບັນ­ດາ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ນະ­ຄອນ­ຫຼວງ​ວຽງ​ຈັນ ແລະ 17 ແຂວງ ຕະ­ຫຼອດ​ຮອດ​ບັນ­ດາ​ສະ­ໂມ­ສອນ​ຕ່າງໆ ສົ່ງ​ນັກ­ກີ­ລາ​ເຂົ້າ​ຮ່ວມ​ການ​ແຂ່ງ­ຂັນ​ໃນ​ຄັ້ງ​ນີ້​ດ້ວຍ ໂດຍ​ຈະ​ມີ 18 ລາຍ­ການ ໃນ​ນັ້ນ ຮຸ່ນ​ທົ່ວ​ໄປ​ຍິງ​ມີ 4 ລາຍ­ການ ຮຸ່ນ​ທົ່ວ​ໄປ​ຊາຍ ມີ 6 ລາຍ­ການ ແລະ ຮຸ່ນ​ເຍົາ­ວະ​ຊົນ​ຍິງ 4 ລາຍ­ການ ແລະ ຮຸ່ນ​ເຍົາ­ວະ​ຊົນ​ຊາຍ 4 ລາຍ­ການ.

    ສຳ­ລັບ​ລາຍ­ການ​ແຂ່ງ­ຂັນ ຮຸ່ນ​ເຍົາ­ວະ​ຊົນ​ຊາຍ-ຍິງ ອາ­ຍຸ 14-17 ປີ ມີ 4 ຮຸ່ນ ປະ­ກອບ​ມີ ຮຸ່ນ​ນ້ຳ­ໜັກ 46-48 ກິ​ໂລ 48-50 ກິ​ໂລ 52-54 ກິ​ໂລ ແລະ ຮຸ່ນ​ນ້ຳ­ໜັກ 56-60 ກິ​ໂລ ສ່ວນ​ຮຸ່ນ​ທົ່ວ​ໄປ​ຊາຍ ມີ 6 ລາຍ­ການ ປະ­ກອບ​ມີ ຮຸ່ນ​ນ້ຳ­ໜັກ 49 ກິ​ໂລ ຮຸ່ນ 52 ກິ​ໂລ ຮຸ່ນ 56 ກິ​ໂລ ຮຸ່ນ 60 ກິ​ໂລ ຮຸ່ນ 64 ກິ​ໂລ ແລະ ຮຸ່ນ 69 ກິ​ໂລ ແລະ ສ່ວນ​ຮຸ່ນ​ທົ່ວ​ໄປ​ຍິງ ມີ 4 ລາຍ­ການ ຮຸ່ນ​ນ້ຳ­ໜັກ 48 ກິ​ໂລ ຮຸ່ນ 51 ກິ​ໂລ ຮຸ່ນ 54 ກິ​ໂລ ແລະ ຮຸ່ນ​ນ້ຳ­ໜັກ 57-60 ກິ​ໂລ ໃນ​ນັ້ນ ນັກ­ກີ­ລາ​ແຕ່​ລະ​ແຂວງ​ຕ້ອງ​ເດີນ­ທາງ​ມາ​ເຖິງ ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 7 ສິງ­ຫາ 2019 ເປັນ­ຕົ້ນ​ໄປ.

ຂ່າວທີ່ກ່ຽວຂ້ອງ