ຂ່າວຫຼ້າສຸດ

ເຂດ​ວັດທະນະທຳ​ຄົນ​ພື້ນເມືອງ Budj Bim ໄດ້​ຮັບ​ການ​ຮັບຮອງ​ໃຫ້​ເປັນ​ມໍລະດົກ​ໂລກ

127 09 ກ.ລ. 2019 ຂ່າວຕ່າງປະເທດ
ເຂດ​ວັດທະນະທຳ​ຄົນ​ພື້ນເມືອງ Budj Bim ໄດ້​ຮັບ​ການ​ຮັບຮອງ​ໃຫ້​ເປັນ​ມໍລະດົກ​ໂລກ

   ອົງການ​ສຶກ​ສາ ວິທະຍາສາດ ແລະ ວັດທະນະທຳ ຂອງ​ສະຫະ​ປະຊາ​ຊາດ (UNESCO) ແຈ້ງ​ໃຫ້​ຮູ້ເມື່ອ​ວັນ​ທີ 6 ກໍລະກົດ​ນີ້ ວ່າ​ໄດ້​ນຳ​ເອົາ​ເຂດ​ຕັ້ງ​ຖິ່ນ​ຖານ ບຸດ ບິມ (Budj Bim) ຂອງ​ຊາວ​ພື້ນເມືອງ​ອົດ​ສະ​ຕຣາ​ລີ ເຂົ້າ​ໄປ​ໃນ​ບັນຊີ​ບັນດາ​ມໍລະດົກ​ໂລກ.

    ເຂດ​ວັດທະນະທຳ ບຸດ ບີມ ຕັ້ງ​ຢູ່​ໃນ​ເຂດ​ທິດຕາເວັນຕົກ​ສ່ຽງ​ໃຕ້ ອົດ​ສະ​ຕຣາ​ລີ ໄດ້​ຮັບ​ການ​ສ້າງຕັ້ງ​ໂດຍ​ອານາຈັກ ກຸນ​ດິດ​ມາ​ຣາ (Gunditjmara) ເມື່ອ​ກ່ອນ​ໜ້າ​ນີ້ 6.600 ປີ. ຮ່ອງຮອຍ​ທີ່​ຍັງ​ຄົງ​ຄ້າງ​ຢູ່​ເຂດ​ດັ່ງກ່າວ ປະກອບ​ມີ​ຄອງ​ຫີນ ອ່າງ​ທີ່​ສ້າງ​ຂຶ້ນ​ມາ​ເພື່ອ​ລ້ຽງ ແລະ ເກັບ​ກູ້​ອ່ຽນ ແລະ ເຂດ​ດິນ​ຕົມ ຫຼື ໜອງ​ນ້ຳ.  ຢູ່​ໃນ​ເຂດ​ດັ່ງກ່າວ ຍັງ​ມີ​ຮ່ອງຮອຍ​ທີ່​ພິສູດ​ກ່ຽວ​ກັບ​ເຮືອນ​ຫີນ ໂດຍ​ຜ່ານ​ນັ້ນ​ກໍ​ເຫັນ​ໄດ້​ວ່າ​ຄົນ​ພື້ນເມືອງ​ດັ່ງກ່າວ ບໍ່​ສະເພາະ​ແຕ່​ເປັນ​ຄົນ​ລ່າເນື້ອ ແລະ ລ້ຽງສັດ​ເລື່ອນລອຍ ຫຼື​ບໍ່​ມີ​ພາຫະນະ​ໃນ​ການ​ຜະລິດ​ສະບຽງ​ອາຫານ​ພຽງ​ຢ່າງ​ດຽວ​ເທົ່າ​ນັ້ນ.

    ຄະນະ​ກຳມະການ​ມໍລະດົກ​ໂລກ​ຂອງ UNESCO ໃຫ້​ຮູ້​ວ່າ ບຸດ ບີມ ໄດ້​ສະແດງ​ໃຫ້​ເຫັນ​ວ່າ​ອານາຈັກ Gunditjmara ພັດທະນາ​ໄດ້​ໜຶ່ງ​ໃນ​ຕາ​ນ່າງ​ການ​ເພາະ​ລ້ຽງ​ສິນ​ໃນ​ນ້ຳ​ທີ່​ໃຫຍ່​ທີ່​ສຸດ ແລະ ເກົ່າ​ແກ່​ທີ່​ສຸດ​ໃນ​ໂລກ. ລະບົບ​ຄອງ​ທີ່​ເຮັດ​ດ້ວຍ​ຫີນ ເຂື່ອນ ແລະ ອ່າງເກັບນ້ຳ ໄດ້​ຮັບ​ການ​ນຳ​ໃຊ້​ເພື່ອ​ຄວບ​ຄຸມ​ນ້ຳນອງ ເຮັດ​ໃຫ້​ເກີດ​ມີ​ໜອງ​ນ້ຳ ເພື່ອ​ລ້ຽງ ແລະ ເກັບ​ກູ້​ອ່ຽນ. ສິ່ງ​ດັ່ງກ່າວ​ໄດ້​ເປັນ​ການ​ຊ່ວຍ​ສ້າງ​ປຶກ​ແຜ່ນ​ເສດຖະກິດ ແລະ ສັງຄົມ ໃຫ້​ແກ່​ສະຫັດ​ສະ​ວັດ​ດັ່ງກ່າວ.

    ປັດຈຸບັນ​ນີ້ ຢູ່​ໃນ​ອົດ​ສະ​ຕຣາ​ລີ ຍັງ​ມີ​ພຽງ 750.000 ຄົນ ທີ່​ເປັນ​ລູກ​ຫຼານ​ຂອງ​ຄົນ​ພື້ນເມືອງ ໂດຍ​ກວມ​ເອົາ 3% ຂອງ​ຈຳນວນ​ປະຊາກອນ.

ຂ່າວທີ່ກ່ຽວຂ້ອງ