ຂ່າວຫຼ້າສຸດ

ບັນດາ​ປະເທດ​ສະມາຊິກ AU ເປີດ​ຕົວ​ເຂດ​ການ​ຄ້າ​ເສລີ​ອາ​ຟະ​ຣິກ​ກາ

121 09 ກ.ລ. 2019 ຂ່າວຕ່າງປະເທດ
ບັນດາ​ປະເທດ​ສະມາຊິກ AU ເປີດ​ຕົວ​ເຂດ​ການ​ຄ້າ​ເສລີ​ອາ​ຟະ​ຣິກ​ກາ

   ກອງ​ປະຊຸມ​ສຸດ​ຍອດ​ຂອງ​ສະຫະພາບ​ອາ​ຟະ​ຣິກ​ກາ (AU) ໄດ້​ຈັດ​ຂຶ້ນ​ເມື່ອ​ວັນ​ທີ 7 ກໍລະກົດ​ນີ້ ທີ່​ນະຄອນຫຼວງ ເນຍ​ເມ ຂອງ​ປະເທດ​ນີ​ເຊ ໂດຍ​ມີ​ຜູ້​ແທນ ແລະ ແຂກ​ຮັບ​ເຊີນ ເຂົ້າ​ຮ່ວມ​ປະມານ 4.500 ຄົນ ໃນ​ນັ້ນ​ມີ​ປະມຸກ​ລັດ 32 ທ່ານ ແລະ ລັດຖະມົນຕີ 100 ກວ່າ​ທ່ານ.

ຢູ່​ໃນ​ກອງ​ປະຊຸມ​ດັ່ງກ່າວ ບັນດາ​ປະເທດ​ສະມາຊິກ AU ໄດ້​ເປີດ​ຕົວ​ເຂດ​ການ​ຄ້າ​ເສລີ​ທະວີບ​ອາ​ຟະ​ຣິກ​ກາ (AfCFTA) ຢ່າງ​ເປັນ​ທາງ​ການ ແລະ ຖື​ວ່າ​ນີ້​ເປັນ​ບາດກ້າວ​ເພື່ອ “ສັນຕິພາບ ແລະ ຄວາມ​ຈະເລີນ​ຮຸ່ງເຮືອງ​ຢູ່​ໃນ​ທະວີບ​ອາ​ຟະ​ຣິກ​ກາ” ຫັນ​ເອົາ​ທະວີບ​ນີ້​ໃຫ້​ກາຍເປັນ “ພູມ​ພາບ​ທາງ​ດ້ານ​ການ​ຄ້າ​ທີ່​ໃຫຍ່​ທີ່​ສຸດ​ໃນ​ໂລກ” ທີ່​ລວມ​ເຂົ້າກັນ​ແລ້ວ ມີ​ປະຊາກອນ​ປະມານ 1,2 ຕື້​ຄົນ.

    ປະທານາທິບໍດີ​ນີ​ເຊ ມາ​ຮາ​ມາ​ດູ ອິ​​ສ​ຊູ​ຟູ ກ່າວ​ຢືນຢັນ​ຕໍ່​ວາລະ​ໄຂ​ປະຊຸມ​ດັ່ງກ່າວ​ວ່າ ການ​ທີ່ AfCFTA ມີ​ຜົນ​ບັງຄັບ​ໃຊ້ ນັບ​ວ່າ​ເປັນ​ເຫດການ​ທີ່​ສຳຄັນ​ທີ່​ສຸດ​ສຳລັບ​ທະວີບ​ອາ​ຟະ​ຣິກ​ກາ ນັບ​ແຕ່​ໄດ້​ສ້າງຕັ້ງ​ອົງການ​ເອກະ​ພາບ​ອາ​ຟະ​ຣິກ​ກາ (OAU) ເມື່ອ​ປີ 1963 ແລະ ຫຼັງ​ຈາກ​ນັ້ນ​ກໍ​ກາຍ​ມາ​ເປັນ AU ໃນ​ທຸກ​ວັນ​ນີ້. ໃນ​ກອງ​ປະຊຸມ​ນີ້ ການ​ນຳ​ຂອງ​ບັນດາ​ປະເທດ​ສະມາຊິກ AU ໄດ້​ເປັນ​ເອກະ​ພາບ​ກັນ​ກ່ຽວ​ກັບ​ເຄື່ອງມື​ການເຄື່ອນໄຫວ​ຂອງ AfCFTA ອັນ​ປະກອບ​ດ້ວຍ​ລະບົບ​ການ​ຊຳລະ​ດີ​ຈີ​ຕາ​​ລ ປະຕູ​ຂໍ້​ມູນ​ການ​ຕິດຕາມ​ກວດກາ ຫຼັກ​ເກນ​ກ່ຽວ​ກັບ​ຕົ້ນ​ທາງ ແລະ ອື່ນໆ. ຄາດ​ວ່າ AfCFTA ຈະ​ເຂົ້າ​ສູ່​ການເຄື່ອນໄຫວ ນັບ​ແຕ່​ວັນ​ທີ 1 ກໍລະກົດ ປີ 2020 ເປັນຕົ້ນ​ໄປ.

    ຈາກ​ການ​ທີ່​ມີ 4 ປະເທດ​ໃໝ່ ແຈ້ງ​ໃຫ້​ຮູ້​ຢ່າງ​ເປັນ​ທາງ​ການ​ເມື່ອ​ວັນ​ທີ 7 ກໍລະກົດ​ນີ້ ກ່ຽວ​ກັບ​ການ​ເຂົ້າ​ຮ່ວມ AfCFTA ເຮັດ​ໃຫ້​ຍອດ​ປະເທດ​ສະມາຊິກ​ຂອງ​ອົງການ​ດັ່ງກ່າວ ເພີ່ມ​ຂຶ້ນ​ເປັນ 54/55 ປະເທດ ທີ່​ເປັນ​ສະມາຊິກ AU. ປັດຈຸບັນ​ນີ້ ມີ 27 ປະເທດ ທີ່​ໄດ້​ໃຫ້​ສັດຕະຍາບັນ  AfCFTA ແລະ ຍັງ​ມີ​ພຽງ​ປະເທດ​ດຽວ​ຄື ເອ​ຣິ​ທຣີ ທີ່​ຍັງ​ບໍ່​ທັນ​ເຂົ້າ​ຮ່ວມ AfCFTA ເຖິງ​ວ່າ​ປະເທດ​ນີ້​ໄດ້​ປະກາດ​ເຖິງ​ຄວາມ​ພ້ອມ​ແລ້ວ​ກໍ​ຕາມ. ຄາດ​ວ່າ AfCFTA ຈະ​ມີ​ສຳນັກງານ​ໃຫຍ່​ຕັ້ງ​ຢູ່​ໃນ​ນະຄອນຫຼວງ ອາ​ກຣາ ຂອງ​ປະເທດ ກາ​ນາ.

ຂ່າວທີ່ກ່ຽວຂ້ອງ