ຂ່າວຫຼ້າສຸດ

ການ​ເຈລະຈາ NATO-ຣັດ​ເຊຍ ກ່ຽວ​ກັບ INF ບໍ່​​​ຄືບ​ໜ້າ

97 09 ກ.ລ. 2019 ຂ່າວຕ່າງປະເທດ
ການ​ເຈລະຈາ NATO-ຣັດ​ເຊຍ ກ່ຽວ​ກັບ INF ບໍ່​​​ຄືບ​ໜ້າ

     ທ່ານ ເຈນ ສະ​ໂຕ​ເຕນ​ເບີກ ເລຂາທິການ​ຂອງ​ອົງການ​ສົນທິສັນຍາ​ປ້ອງ​ກັນ​ອັດ​ລັງ​ຕິກ​ເໜືອ (NATO) ຖະແຫຼງ​ຕໍ່​ຜູ້​ສື່​ຂ່າວ ຫຼັງ​ການ​ປະຊຸມ​ສະພາ NATO-ຣັດ​ເຊຍ ຊຶ່ງ​ຈັດ​ຂຶ້ນ​ທີ່​ນະຄອນຫຼວງ​ບຣຸກ​ແຊນ (ປະເທດ​ແບນ​ຊິກ) ເມື່ອ​ວັນ​ທີ 5 ກໍລະກົດ​ນີ້​ວ່າ NATO ແລະ ຣັດ​ເຊຍ ບໍ່​ບັນລຸ​ຄວາມ​ຄືບ​ໜ້າທີ່​ສຳຄັນ ໃນ​ການ​ເຈລະຈາ ເພື່ອ​ກອບ​ກູ້​ສົນທິສັນຍາ ບັນດາ​ກອງ​ກຳລັງ​ນີວ​ເຄລຍ​ຂະໜາດ​ກາງ (INF).

    ທ່ານ ສະ​ໂຕ​ເຕນ​ເບີກ ເວົ້າ​ວ່າ ບໍ່​ມີ​ສິ່ງ​ບົ່ງ​ບອກ​ເຖິງ​ການ​ບຸກ​ທະລຸ​ຢູ່​ໃນ​ກອງ​ປະຊຸມ​ດັ່ງກ່າວ ຊຶ່ງ​ມີ​ບັນດາ​ນັກ​ການ​ທູດ ແລະ ເຈົ້າ​ໜ້າທີ່​ຂອງ​ສອງ​ຝ່າຍ​ເຂົ້າ​ຮ່ວມ. ໂອກາດ​ການ​ຊອກ​ຫາ​ວິທີ​ການ​ແກ້​ໄຂ “ນັບ​ມື້​ນັບ​ໜ້ອຍ​ລົງ” ແຕ່​ວ່າ NATO ຍັງ​ຄົງ​ບໍ່​ປະລະ​ຄວາມ​ພະຍາຍາມ ໃນ​ການ​ຈູງ​ໃຈ​ຣັດ​ເຊຍ ໃຫ້​ທຳລາຍ​ລູກ​ສອນ​ໄຟ​ເຄື່ອນ​ທີ່ SSC-8 ທີ່​ຍິງ​ຈາກ​ໜ້າດິນ ໂດຍ​ທີ່ NATO ເຫັນ​ວ່າ INF ນັ້ນ​ຫ້າມ​ພວກ​ລູກ​ສອນ​ໄຟ​ທີ່​ມີ​ຂະໜາດ​ຍິງ​ໄກ 500-5.500​ກມ.

    INF ໄດ້​ຮັບ​ການ​ລົງ​ນາມ​ໂດຍ ສ ອາ​ເມ​ຣິ​ກາ ແລະ  ສ ໂຊ​ວຽດ ເມື່ອ​ວັນ​ທີ 8 ທັນວາ ປີ 1987 ແລະ ມີ​ຜົນ​ບັງຄັບ​ໃຊ້​ຢ່າງ​ເປັນ​ທາງ​ການ ນັບ​ແຕ່​ວັນ​ທີ 1 ມິຖຸນາ ປີ 1988 ເປັນຕົ້ນ​ມາ. ຕາມ​ນັ້ນແລ້ວ ສອງ​ຝ່າຍ​ໃຫ້​ສັນຍາ​ວ່າ ບໍ່​ຜະລິດ ບໍ່​ທົດ​ລອງ ບໍ່​ຜັນ​ຂະຫຍາຍ​ລູກ​ສອນ​ໄຟ​ເຄື່ອນ​ທີ່​ເທິງ​ໜ້າດິນ ຂະໜາດ​ກາງ ແລະ ຂະໜາດ​ໃກ້ (ແຕ່ 500 - 5.500​ກມ).

    ສ ອາ​ເມ​ຣິ​ກາ ໄດ້​ຢຸດຕິ​ພັນທະ​ຂອງ​ຕົນ​ຢູ່​ໃນ INF ຢ່າງ​ເປັນ​ທາງ​ການ ນັບ​ແຕ່​ວັນ​ທີ 2 ກຸມພາ​ທີ່​ຜ່ານ​ມາ ໂດຍ​ກ່າວ​ຫາ​ຣັດ​ເຊຍ ວ່າ​ລະເມີດ​ສົນທິສັນຍາ​ດັ່ງກ່າວ ພ້ອມ​ທັງ​ເລີ່ມ​ຂະ​ບວນ​ການ​ຖອນ​ອອກ​ຈາກ INF ແກ່ຍາວ​ເປັນ​ເວລາ 6 ເດືອນ.

    ທາງ​ຝ່າຍ​ຣັດ​ເຊຍ ໄດ້​ປະຕິເສດ​ຕໍ່​ການ​ກ່າວ​ຫາ​ດັ່ງກ່າວ ໂດຍ​ໃຫ້​ທັດສະນະ​ວ່າ ສ ອາ​ເມ​ຣິ​ກາ​ນັ້ນ​ເອງ ທີ່​ເປັນ​ຝ່າຍ​ລະເມີດ INF. ຫຼັງ​ຈາກ​ນັ້ນ ມາ​ໃນ​ວັນ​ທີ 3 ກໍລະກົດ​ນີ້ ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ໄດ້​ໃຫ້​ສັດຕະຍາບັນ​ຕໍ່​ຮ່າງ​ກົດໝາຍ ວ່າ​ດ້ວຍ​ການ​ຢຸດຕິ​ສົນທິສັນຍາ​ດັ່ງກ່າວ.

ຂ່າວທີ່ກ່ຽວຂ້ອງ