ກຸ່ມ​ມື​ປືນ​ຮູ​ຕີ ໃຊ້​ເຮືອບິນ​ແບບ​ບໍ່​ມີ​ຄົນ​ຂັບ ໂຈມ​ຕີ​ສະໜາມ​ບິນ​ຂອງ​ອາ​ຣາ​ບີ ຊາ​ອຸ​ດິດ

88 09 ກ.ລ. 2019 ຂ່າວຕ່າງປະເທດ
 ກຸ່ມ​ມື​ປືນ​ຮູ​ຕີ ໃຊ້​ເຮືອບິນ​ແບບ​ບໍ່​ມີ​ຄົນ​ຂັບ ໂຈມ​ຕີ​ສະໜາມ​ບິນ​ຂອງ​ອາ​ຣາ​ບີ ຊາ​ອຸ​ດິດ

     ໂທລະພາບ​ຊ່ອງ Al-Masirah TV ຂອງ​ກຸ່ມ​ມື​ປືນ​ຮູ​ຕີ (Houthi) ຢູ່​ໃນ​ເຢ​ແມນ ລາຍ​ງານ​ຂ່າວ​ອອກ​ມາ​ເມື່ອ​ວັນ​ທີ 6 ກໍລະກົດ​ນີ້​ວ່າ ກອງ​ກຳລັງ​ຂອງ​ຮູ​ຕີ ໄດ້​ຜັນ​ຂະຫຍາຍ​ການ​ໂຈມ​ຕີ​ດ້ວຍ​ເຮືອບິນ​ແບບ​ບໍ່​ມີ​ຄົນ​ຂັບ ໂດຍ​ແນໃສ່​ອາຄານ​ເກັບ​ມ້ຽນ​ເຮືອບິນ ແລະ ພື້ນຖານ​ການ​ທະຫານ ຢູ່​ໃນ​ບໍລິເວນ​ສະໜາມ​ບິນ ຈີ​ຊານ (ພາກ​ໃຕ້​ອາ​ຣາ​ບີ ຊາ​ອຸ​ດິດ).

      ປັດຈຸບັນ​ນີ້ ທາງ​ການ​ອາ​ຣາ​ບີ ຊາ​ອຸ​ດິດ ຍັງ​ບໍ່​ໄດ້​ຢັ້ງຢືນ​ກ່ຽວ​ກັບ​ການ​ໂຈມ​ຕີ​ດັ່ງກ່າວ ແຕ່​ວ່າ​ໂທລະພາບ​ຊ່ອງ​ດັ່ງກ່າວ​ເວົ້າ​ວ່າ ໃນ​ໄລຍະ​ຫຼັງໆ​ມາ​ນີ້ ກອງ​ກຳລັງ​ຮູ​ຕີ ໄດ້​ປະຕິບັດ​ການ​ໂຈມ​ຕີ​ຢ່າງ​ຕໍ່​ເນື່ອງ ໃສ່​ເປົ້າ​ໝາຍ​ຕ່າງໆ​ໃນ​ອາ​ຣາ​ບີ ຊາ​ອຸ​ດິດ.

     ກ່ອນ​ໜ້າ​ນັ້ນ ກອງ​ກຳລັງ​ຮູ​ຕີ ກໍ​ໄດ້​ກ່າວ​ຍອມຮັບ​ເມື່ອ​ວັນ​ທີ 4 ກໍລະກົດ​ວ່າ ໄດ້​ດຳເນີນ​ການ​ໂຈມ​ຕີ​ຕິດຕໍ່​ກັນ​ເປັນ​ເທື່ອ​ທີ​ສອງ ໂດຍ​ແນໃສ່​ສະໜາມ​ບິນ ​ອ​ບາ (Abha) ຂອງ ອາ​ຣາ​ບີ ຊາ​ອຸ​ດິດ.

   ເມື່ອ​ວັນ​ທີ 12 ມິຖຸນາ​ທີ່​ຜ່ານ​ມາ ມີ​ສາມັນ​ຊົນ​ໄດ້​ຮັບ​ບາດ​ເຈັບ​​​ຢ່າງ​ໜ້ອຍ 26 ຄົນ ຈາກ​ເຫດການ​ຍິງ​ລູກ​ສອນ​ໄຟ​ໃສ່​ສະໜາມ​ບິນ ອາ​ບາ. ຕໍ່​ມາ ໃນ​ວັນ​ທີ 23 ມິຖຸນາ ກໍ​ມີ​ຊາວ​ຊີ​ຣີ ເສຍ​ຊີວິດ 1 ຄົນ ແລະ ມີ​ສາມັນ​ຊົນ​ໄດ້​ຮັບ​ບາດເຈັບ 21 ຄົນ ຈາກ​ການ​ໂຈມ​ຕີ​ສະໜາມ​ບິນ​ດັ່ງກ່າວ​ເຊັ່ນ​ກັນ. ເມື່ອ​ວັນ​ທີ 2 ກໍລະກົດ​ທີ່​ຜ່ານ​ມາ ມີ​ຜູ້​ໄດ້​ຮັບ​ບາດເຈັບ 9 ຄົນ ຈາກ​ການ​ໂຈມ​ຕີ​ຂອງ​ກອງ​ກຳລັງ​ຮູ​ຕີ ທີ່​ແນໃສ່​ສະໜາມ​ບິນ ອາ​ບາ.

ຂ່າວທີ່ກ່ຽວຂ້ອງ