ສະ­ພາ​ແຫ່ງ​ຊາດ​ຝຣັ່ງ ຮັບ­ຮອງ​ກົດ­ໝາຍ​ວ່າ​ດ້ວຍ​ການ​ຫ້າມ​ພໍ່​ແມ່​ຕີ​ລູກ

139 08 ກ.ລ. 2019 ຂ່າວຕ່າງປະເທດ
ສະ­ພາ​ແຫ່ງ​ຊາດ​ຝຣັ່ງ ຮັບ­ຮອງ​ກົດ­ໝາຍ​ວ່າ​ດ້ວຍ​ການ​ຫ້າມ​ພໍ່​ແມ່​ຕີ​ລູກ

   ເມື່ອ​ວັນ​ທີ 2 ກໍ­ລະ­ກົດ​ທີ່​ຜ່ານ​ມາ ສະ­ພາ​ແຫ່ງ​ຊາດ​ຝຣັ່ງ ໄດ້​ຮັບ­ຮອງ​ມາດ​ຕະ­ການ​ໃໝ່ ຊຶ່ງ​ຕົ້ນ­ຕໍ​ເປັນ​ທາດ​ແທ້​ສັນ­ຍາ​ລັກ ຊຶ່ງ​ຕາມ​ນັ້ນ­ແລ້ວ ແມ່ນ​ຫ້າມ​ຜູ້​ເປັນ​ພໍ່​ແມ່​ຕີ​ລູກ ໃນ​ເມື່ອ​ວ່າ­ການ​ກະ­ທຳ​ນີ້​ຖືກ​ສະ­ຫະ​ປະ­ຊາ​ຊາດ​ກ່າວ​ປະ­ນາມ ແຕ່​ກໍ​ຍັງ​ມີ​ຢູ່​ທົ່ວ​ໄປ​ໃນ​ຝຣັ່ງ. ຈາກ​ການ​ດຳ­ເນີນ​ການ​ດັ່ງ­ກ່າວ ໄດ້​ເຮັດ​ໃຫ້​ຝຣັ່ງ ກາຍ­ເປັນ​ປະ­ເທດ​ທີ 55 ໃນ​ໂລກ ທີ່​ຫ້າມ​ການ​ທຸບ​ຕີ​ເດັກ­ນ້ອຍ.

    ສະ­ພາ​ສູງ​ຝຣັ່ງ ໄດ້​ຮັບ­ຮອງ​ຮ່າງ​ກົດ­ໝາຍ​ດັ່ງ­ກ່າວ ໃນ​ລະ­ຫວ່າງ​ການ​ລົງ​ຄະ­ແນນ​ສຽງ​ເທື່ອ​ສຸດ​ທ້າຍ. ເມື່ອ​ເດືອນ​ພະ­ຈິກ ປີ 2018 ບັນ­ດາ​ສະ­ມາ­ຊິກ​ລັດ​ຖະ​ສະ­ພາ​ຝຣັ່ງ ກໍ​ໄດ້​ເຫັນ​ດີ​ເປັນ​ເອ­ກະ­ສັນ​ກັນ ກັບ​ມາດ​ຕະ­ການ​ສະ­ກັດ​ກັ້ນ​ການ​ກະ­ທຳ​ຮຸນ​ແຮງ​ຕໍ່​ເດັກ­ນ້ອຍ​ດັ່ງ­ກ່າວ​ໄປ​ແລ້ວ.

    ນັບ​ແຕ່​ນີ້​ເປັນ­ຕົ້ນ​ໄປ ມາດ​ຕະ­ການ​ໃໝ່​ດັ່ງ­ກ່າວ ຈະ​ຖືກ​ບັນ­ຈຸ​ເຂົ້າ​ໃນ​ຊຸດ​ປະ­ມວນ​ກົດ­ໝາຍ​ແພ່ງ ແລະ ຈະ​ໄດ້​ອ່ານ​ຕໍ່­ໜ້າ​ບັນ­ດາ​ຄູ່​ທີ່​ສາ­ບານ​ຢູ່​ໃນ​ງານ​ແຕ່ງ­ດອງ. ແຕ່​ເຖິງ​ຢ່າງ­ໃດ​ກໍ​ຕາມ ກົດ­ໝາຍ​ໃໝ່​ນັ້ນ​ບໍ່​ໄດ້​ນຳ​ເອົາ​ມາດ​ຕະ­ການ​ປັບ​ໃໝ​ຕົວ​ຈິງ​ອອກ​ມາ ຕໍ່​ຜູ້​ທີ່​ເປັນ​ພໍ່​ແມ່​ທີ່​ກະ­ທຳ​ການ​ລະ­ເມີດ. ເປົ້າ​ໝາຍ​ຕົ້ນ­ຕໍ​ຂອງ​ຂໍ້­ຄວາມ​ໃນ​ກົດ­ໝາຍ​ນັ້ນ ຖືກ​ຖື​ວ່າ​ເພື່ອ​ເປັນ​ການ​ສົ່ງ­ເສີມ​ໃຫ້​ສັງ­ຄົມ​ປ່ຽນ­ແປງ​ການ​ກະ­ທຳ.

    ກົດ­ໝາຍ​ອາ­ຍາ​ຂອງ​ຝຣັ່ງ ກໍ​ໄດ້​ຫ້າມ​ການ​ກະ­ທຳ​ຮຸນ​ແຮງ​ຕໍ່​ເດັກ­ນ້ອຍ​ຢູ່​ແລ້ວ. ແຕ່​ວ່າ ເມື່ອ​ສະ­ຕະ­ວັດ​ທີ 19 ການ​ນິ​ຍາມ​ກ່ຽວ​ກັບ​ຂອບ​ເຂດ​ສິດ​ຂອງ​ພໍ່​ແມ່ ຢູ່​ໃນ​ກົດ­ໝາຍ​ແພ່ງ​ຂອງ​ຝຣັ່ງ ໄດ້​ເພີ່ມ​ເຕີມ​ເອ­ກະ­ສານ​ຊ້ອນ​ທ້າຍ ທີ່​ເປັນ​ການ​ອະ­ນຸ­ຍາດ​ໃຫ້​ພໍ່​ແມ່ “ລົງ­ໂທດ” ຕໍ່​ລູກ​ຫຼານ. ບັນ­ດາ​ລັດ­ຖະ­ບານ​ຊຸດ​ກ່ອນໆ ຂອງ​ປະ­ທາ­ນາ­ທິ­ບໍ­ດີ​ຝຣັ່ງ ເອມ​ມາ​ນູ​ແອ​ລ ມາກ​ຣົງ ໄດ້​ພະ­ຍາ­ຍາມ​ນຳ​ເອົາ​ມາດ​ຕະ­ການ​ສະ­ກັດ​ກັ້ນ​ການ​ກະ­ທຳ​ຮຸນ​ແຮງ​ດັ່ງ­ກ່າວ​ອອກ​ມາ ແຕ່​ກໍ​ພົບ​ກັບ​ການ​ຄັດ­ຄ້ານ​ຢ່າງ​ແຮງ​ຈາກ​ຝ່າຍ​ອະ­ນຸ­ລັກ​ນິ­ຍົມ. ໃນ​ຊຸມ​ປີ​ທີ່​ຜ່ານ​ມາ ບັນ­ດາ​ສະ­ມາ­ຊິກ​ລັດ​ຖະ​ສະ­ພາ​ຈາກ​ຝ່າຍ​ອະ­ນຸ­ລັກ​ນິ­ຍົມ ໄດ້​ມີ​ທັດ­ສະ­ນະ​ທີ່​ນຸ່ມ​ນວນ​ກວ່າ​ເກົ່າ ຕໍ່​ບັນ­ຫາ​ດັ່ງ­ກ່າວ.

    ມູນ​ນິ­ທິ​ປົກ​ປ້ອງ​ເດັກ­ນ້ອຍ​ຂອງ​ຝຣັ່ງ ໃຫ້​ຮູ້​ວ່າ 85% ຂອງ​ຈຳ­ນວນ​ຜູ້​ປົກ­ຄອງ​ເດັກ­ນ້ອຍ​ໃນ​ຝຣັ່ງ ຍອມ­ຮັບ​ເຖິງ​ການ​ຕີ​ລູກ. ໃນ​ປີ 2015 ສະ­ພາ​ເອີ​ຣົບ ໄດ້​ຕິ­ຕຽນ​ຝຣັ່ງ ວ່າ​ບໍ່​ນຳ​ເອົາ​ກົດ­ໝາຍ​ວ່າ​ດ້ວຍ​ການ​ຫ້າມ​ຕີ​ເດັກ­ນ້ອຍ​ອອກ​ມາ ຄື​ກັນ​ກັບ​ປະ­ເທດ​ເອີ​ຣົບ​ອື່ນໆ. ຫຼັງ​ຈາກ​ນັ້ນ​ໜຶ່ງ​ປີ ຄະ­ນະ​ກຳ­ມະ­ການ​ຂອງ​ສະ​ປະ­ຊາ​ຊາດ ກ່ຽວ​ກັບ​ສິດ­ທິ​ຂອງ​ເດັກ­ນ້ອຍ ກໍ​ໄດ້​ເລັ່ງ​ທວງ​ໃຫ້​ຝຣັ່ງ ປະ­ກາດ​ໃຊ້​ຄຳ​ສັ່ງ​ຫ້າມ​ຕີ​ເດັກ­ນ້ອຍ ພາຍ​ໃຕ້​ທຸກໆ​ຮູບ​ການ.

ຂ່າວທີ່ກ່ຽວຂ້ອງ