ຮ້ານ​ຄ້າ​ຕ່າງໆ​ຂອງ Uniqlo ຈະ​ຫັນ​ໄປ​ສູ່​ການ​ໃຊ້​ຖົງ​ເຈ້ຍ

148 08 ກ.ລ. 2019 ຂ່າວຕ່າງປະເທດ
ຮ້ານ​ຄ້າ​ຕ່າງໆ​ຂອງ Uniqlo ຈະ​ຫັນ​ໄປ​ສູ່​ການ​ໃຊ້​ຖົງ​ເຈ້ຍ

   Fast Retailing Co., ຊຶ່ງ​ຜູ້​ຄອບ​ຄອງ​ກາ​ໝາຍ​ການ​ຄ້າ​ເສື້ອ​ຜ້າ​ອາ­ພອນ Uniqlo ແຈ້ງ​ໃຫ້​ຮູ້­ເມື່ອ​ວັນ​ທີ 3 ກໍ­ລະ­ກົດ​ທີ່​ຜ່ານ​ມາ​ວ່າ ຖົງ​ທີ່​ຮັບ​ໃຊ້​ໃຫ້​ແກ່​ການ­ເຄື່ອນ­ໄຫວ​ຊື້​ສິນ­ຄ້າ ຈະ​ໄດ້​ຫັນ​ຈາກ​ວັດ­ຖຸ​ຢາງ (ພລາ​ສ​ຕິກ) ໄປ​ເປັນ​ວັດ­ຖຸ​ເຈ້ຍ ນັບ​ແຕ່​ເດືອນ​ກັນ­ຍາ​ໜ້າ​ນີ້​ເປັນ­ຕົ້ນ​ໄປ ແລະ ກໍ​ຈະ​ເລີ່ມ​ການ​ຄິດ­ໄລ່​ຄ່າ​ໃຊ້​ຈ່າຍ​ຕໍ່​ຖົງ​ເຈ້ຍ​ນັ້ນ.

    ການ­ເຄື່ອນ­ໄຫວ​ດັ່ງ­ກ່າວ​ຂອງ Fast Retailing ໄດ້​ຮັບ​ການ​ຕີ​ລາ­ຄາ ວ່າ​ແມ່ນ​ເພື່ອ​ປະ­ກອບ­ສ່ວນ​ເຂົ້າ​ໃນ​ຄວາມ​ພະ­ຍາ­ຍາມ​ຂອງ​ທົ່ວ​ໂລກ ເພື່ອ​ແກ້​ໄຂ​ໜຶ່ງ​ໃນ​ບັນ­ດາ​ບັນ­ຫາ​ດ້ານ​ສິ່ງ­ແວ­ດລ້ອມ ທີ່​ເປັນ​ເລື່ອງ​ຮີບ​ດ່ວນ​ທີ່​ສຸດ​ໃນ​ປັດ­ຈຸ­ບັນ​ນີ້.

    ຕາມ​ແຜນ­ການ​ແລ້ວ Fast Retailing ໄດ້​ວາງ​ຄາດ­ໝາຍ​ຫຼຸດ­ຜ່ອນ​ປະ­ລິ­ມານ​ຢາງ ທີ່​ນຳ​ໃຊ້​ໃຫ້​ແກ່​ຖົງ​ໃສ່​ສິນ­ຄ້າ ແລະ ການ​ຫຸ້ມ​ຫໍ່ ຢູ່​ໃນ​ບັນ­ດາ​ຮ້ານ​ຄ້າ​ຂອງ​ກຸ່ມ​ບໍ­ລິ­ສັດ​ດັ່ງ­ກ່າວ​ໃນ​ທົ່ວ​ໂລກ​ລົງ 85% ຫຼື​ເທົ່າ​ກັບ​ປະ­ມານ 7.800 ໂຕນ/ປີ ພາຍ​ໃນ​ທ້າຍ​ປີ 2020.

ນັບ​ແຕ່​ວັນ​ທີ 1 ກັນ­ຍາ​ປີ​ນີ້​ເປັນ­ຕົ້ນ​ໄປ ຮ້ານ​ຄ້າ​ຕ່າງໆ​ຂອງ Fast Retailing ຢູ່​ໃນ​ຍີ່­ປຸ່ນ ແລະ ຢູ່​ໃນ​ປະ­ເທດ​ອື່ນໆ ທີ່​ເຄີຍ​ໃຊ້​ຖົງ​ຢາງ​ນັ້ນ ຈະ​ໄດ້​ຫັນ​ໄປ​ສູ່​ການ​ໃຊ້​ຖົງ​ເຈ້ຍ​ທີ່​ຜະ­ລິດ​ຄືນ­ໃໝ່ ແລະ ວັດ​ສະ​ດຸ​ອື່ນໆ ທີ່​ເປັນ​ມິດ​ກັບ​ສິ່ງ­ແວ­ດລ້ອມ. ຮ້ານ​ຄ້າ​ຕ່າງໆ ຂອງ Fast Retailing ຢູ່​ໃນ​ປະ­ເທດ​ຕ່າງໆ ທີ່​ໄດ້​ໃຊ້​ຖົງ​ເຈ້ຍ​ຢູ່​ແລ້ວ ເຊັ່ນ​ຢູ່​ໃນ​ເອີ​ຣົບ ກໍ​ຈະ​ໄດ້​ເລີ່ມ​ໃຊ້​ຖົງ​ເຈ້ຍ​ທີ່​ເປັນ​ມິດ​ກັບ​ສິ່ງ­ແວ­ດລ້ອມ. ບໍ­ລິ­ສັດ​ດັ່ງ­ກ່າວ ຈະ​ໄດ້​ຄິດ­ໄລ່​ຄ່າ​ຊື້​ຖົງ ພາຍ​ໃນ​ເດືອນ​ກັນ­ຍາ​ໜ້າ​ນີ້ ຫຼື​ບໍ່​ກໍ​ຊ້າ​ກວ່າ​ນັ້ນ ສຳ­ລັບ​ບັນ­ດາ​ຮ້ານ​ຄ້າ Uniqlo ແລະ  GU ຢູ່​ຕ່າງ­ປະ­ເທດ ຕົວ­ຢ່າງ​ວ່າ​ຢູ່​ໃນ​ເອີ​ຣົບ ອາ​ເມ​ຣິ​ກາ​ເໜືອ ແລະ ສ ເກົາ­ຫຼີ.

    ຢູ່​ໃນ​ຍີ່­ປຸ່ນ ຜູ້​ຊື້​ສິນ­ຄ້າ​ຈະ​ຖືກ​ຄິດ­ໄລ່​ຄ່າ​ໃຊ້​ຈ່າຍ 10 ເຢນ (ເທົ່າ​ກັບ 0,09 ໂດ​ລາ​ສະ­ຫະ­ລັດ) ບວກ​ກັບ​ພາ­ສີ​ຂອງ​ຖົງ​ແຕ່​ລະ​ໜ່ວຍ ນັບ​ແຕ່​ວັນ​ທີ 14 ມັງ­ກອນ 2020 ເປັນ­ຕົ້ນ​ໄປ.

ປັດ­ຈຸ­ບັນ​ນີ້ Fast Retailing ບໍ­ລິ­ຫານ​ຮ້ານ​ຄ້າ​ຢູ່ 3.500 ກວ່າ​ແຫ່ງ ໃນ​ທົ່ວ​ໂລກ ອັນ​ລວມ​ເຖິງ​ຮ້ານ​ຄ້າ Uniqlo ປະ­ມານ 2.100 ແຫ່ງ ໄລ່​ມາ​ຮອດ​ທ້າຍ​ເດືອນ​ກຸມ­ພາ​ທີ່​ຜ່ານ​ມາ.

ຂ່າວທີ່ກ່ຽວຂ້ອງ