ປາ​ກິດ​ສະຖານ ໄດ້​ຮັບ​ຄວາມ​ເສຍ​ຫາຍ​ເກືອບ 100 ລ້ານ​ໂດ​ລາ ຈາກ​ການ​ປິດ​ນ່ານ​ຟ້າ

281 05 ກ.ລ. 2019 ຂ່າວຕ່າງປະເທດ
ປາ​ກິດ​ສະຖານ ໄດ້​ຮັບ​ຄວາມ​ເສຍ​ຫາຍ​ເກືອບ 100 ລ້ານ​ໂດ​ລາ ຈາກ​ການ​ປິດ​ນ່ານ​ຟ້າ

    ການ​ທີ່​ປາ​ກິດ​ສະຖານ​ປິດ​ນ່ານ​ຟ້າ ຫຼັງ​ຈາກ​ເກີດ​ຄວາມ​ເຄັ່ງ​ຕຶງ​ກັບ​ອິນ​ເດຍ ໃນ​ເລື່ອງ​ທີ່​ພົວພັນ​ເຖິງ​ເຫດການ​ວາງ​ລະເບີດ​ສະລະ​ຊີບ ຢູ່​ໃນ​ເຂດ​​ກັສ​ເມຍ ທີ່​ອິນ​ເດຍ​ຄວບ​ຄຸມ ຊຶ່ງ​ເກີດ​ຂຶ້ນ​ເມື່ອ​ເດືອນ​ກຸມພາ​ທີ່​ຜ່ານ​ມາ ໄດ້​ເປັນ​ຜົນ​ກະທົບ​ຕໍ່​ການບິນ​ເກືອບ 400 ຖ້ຽວ/ວັນ ແລະ ​ເຮັດ​ໃຫ້​ເກີດ​ຄວາມ​ເສຍ​ຫາຍ​ເປັນ​ມູນ​ຄ່າ​ເກືອບ 100 ລ້ານ​ໂດ​ລາ​ສະຫະລັດ ໃຫ້​ແກ່​ປາ​ກິດ​ສະຖານ.

     ເວບ​ໄຊ Hindustan Times ມີ​ຂ່າວ​ອອກ​ມາ​ເມື່ອ​ວັນ​ທີ 3 ກໍລະກົດ​ນີ້​ວ່າ ຈາກ​ການ​ຄົ້ນຄວ້າ​ຢ່າງ​ເລິກເຊິ່ງ ກ່ຽວ​ກັບ​ການເຄື່ອນໄຫວ​ຂອງ​ບັນດາ​ບໍລິສັດ​ການບິນ​ຂອງ​ປາ​ກິດ​ສະຖານ ແລະ ​ຂອງ​ຕ່າງປະເທດ ນັບ​ແຕ່​ເດືອນ​ກຸມພາ ຫາ​ເດືອນ​ມິຖຸນາ ປີ 2019 ເຫັນ​ວ່າ​ມີ​ປະມານ 400 ຖ້ຽວ​ບິນ/ວັນ ໄດ້​ຮັບ​ຜົນ​ກະທົບ​ຍ້ອນ​ການ​ທີ່​ປາ​ກິດ​ສະຖານ​ປິດ​ນ່ານ​ຟ້າ.

     ມາດ​ຕະການ​ດັ່ງກ່າວ ເຮັດ​ໃຫ້​ເວລາ​ຂອງ​ການ​ປະຕິບັດ​ຖ້ຽວ​ບິນ​ຖືກ​ແກ່ຍາວ ຍ້ອນ​ວ່າ​ເຮືອບິນ​ຕ້ອງ​ໄດ້​ບິນ​ອ້ອມ​ຮອບ​ຜ່ານ​ເຂດ​ທ້ອງຟ້າ​ຂອງ​ປາ​ກິດ​ສະຖານ ປະກອບ​ກັບ​ຄ່າ​ໃຊ້​ຈ່າຍ​ໃຫ້​ແກ່​ເຊື້ອ​ໄຟ ການເຄື່ອນໄຫວ ແລະ ​ການ​ສ້ອມ​ບຳລຸງ ຕ່າງ​ກໍ​ເພີ່ມ​ຂຶ້ນ ໃນ​ຂະນະ​ດຽວ​ກັນ ຄ່າ​ແຮງ​ງານ​ໃຫ້​ແກ່​ຈຸ​ບິນ​ກໍ​ສູງ​ກວ່າ.

     ຂ່າວ​ໃຫ້​ຮູ້​ອີ​ກວ່າ ຜົນ​ກະທົບ​ໂດຍ​ກົງ​ອີກ​ປະການ​ໜຶ່ງ ກໍ​ແມ່ນ​ການ​ທີ່​ອົງການ​ການບິນ​ພົນ​ລະ​ເຮືອນ​ຂອງ​ປາ​ກິດ​ສະຖານ (CAA) ມີ​ລາຍ​ຮັບ​ຫຼຸດ​ລົງ​ຈາກ​ການ​ບໍລິການ​ພາ​ທາງ​ຖ້ຽວ​ບິນ ແລະ ​ຄ່າ​ໃຊ້​ຈ່າຍ​ໃນ​ສະໜາມ​ບິນ ທີ່​ມີ​ຕໍ່​ບັນດາ​ເຮືອບິນ​ທີ່​ບິນ​ຢູ່​ເທິງ​ເຂດ​ທ້ອງຟ້າ ຫຼື​ບິນ​ລົງ​ຈອດ​ໃນ​ປາ​ກິດ​ສະຖານ.

     ເຮືອບິນ Boeing 737 ລຳ​ໜຶ່ງ ທີ່​ບິນ​ຜ່ານ​ເຂດ​ທ້ອງຟ້າ​ຂອງ​ປາ​ກິດ​ສະຖານ ແມ່ນ​ຕ້ອງ​ໄດ້​ຈ່າຍ​ປະມານ 580 ໂດ​ລາ​ສະຫະລັດ ແລະ ​ຄ່າ​ໃຊ້​ຈ່າຍ​ນີ້​ຈະ​ສູງ​ຂຶ້ນ ສຳລັບ​ເຮືອບິນ​ທີ່​ມີ​ຂະໜາດ​ໃຫຍ່​ກວ່າ​ນັ້ນ. ດັ່ງນັ້ນ ເມື່ອ​ໄລ່​ໂດຍ​ສະເລ່ຍ​ແລ້ວ CAA ໄດ້​ຮັບ​ຄວາມ​ເສຍ​ຫາຍ​ປະມານ 232.000 ໂດ​ລາ​ສະຫະລັດ/ວັນ ຈາກ​ຄ່າ​ບິນ​ຜ່ານ​ເຂດ​ທ້ອງຟ້າ. ຖ້າ​ຫາ​ກວ່າ​ບວກ​ຄ່າ​ພາ​ທາງ​ຖ້ຽວ​ບິນ ການບິນ​ລົງ​ຈອດ ແລະ ​ເດີ່ນ​ຈອດ​ເຮືອບິນ ເຂົ້າ​ໄປ​ອີກ ກໍ​ຈະ​ເຮັດ​ໃຫ້​ຄວາມ​ເສຍ​ຫາຍ​ນັ້ນ​ຕົກ​ເປັນ​ປະມານ 300.000 ໂດ​ລາ​ສະຫະລັດ/ວັນ.

    ໃນ​ຂະນະ​ດຽວ​ກັນ ບໍລິສັດ​ການບິນ​ສາກົນ​ປາ​ກິດ​ສະຖານ (PIA) ກໍ​ໄດ້​ຮັບ​ຄວາມ​ເສຍ​ຫາຍ 460.000 ໂດ​ລາ​ສະຫະລັດ/ວັນ ຍ້ອນ​ຢຸດ​ການບິນ ໄປ​ຍັງ​ປາຍທາງ​ທີ່​ຕ່າງປະເທດ ປະກອບ​ກັບ​ຄ່າ​ໃຊ້​ຈ່າຍ​ໃຫ້​ແກ່​ເຊື້ອ​ໄຟ ແລະ ​ການເຄື່ອນໄຫວ​ເພີ່ມ​ຂຶ້ນ ຍ້ອນ​ວ່າ​ເວລາ​ບິນ​ແກ່ຍາວ.

ດັ່ງນັ້ນ ຍອດ​ຄວາມ​ເສຍ​ຫາຍ​ຂອງ CAA ແລະ PIA ຢູ່​ທີ່​ປະມານ 760.000 ໂດ​ລາ​ສະຫະລັດ/ວັນ ເຮັດ​ໃຫ້​ປາ​ກິດ​ສະຖານ ສູນ​ເສຍ​ລາຍ​ຮັບ​ໄປ​ປະມານ 100 ລ້ານ​ໂດ​ລາ​ສະຫະລັດ ນັບ​ແຕ່​ເວລາ​ທີ່​ປາ​ກິດ​ສະຖານ ປະກາດ​ໃຊ້​ມາດ​ຕະການ​ຈຳກັດ​ນ່ານ​ຟ້າ​ເປັນຕົ້ນ​ມາ.

ຂ່າວທີ່ກ່ຽວຂ້ອງ