ຂ່າວຫຼ້າສຸດ

ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ເພີ່ມຂຶ້ນ​ລະດັບ​ສູງ​ສຸດ​ໃນ​ຮອບ 5 ເດືອນ

216 05 ກ.ລ. 2019 ຂ່າວຕ່າງປະເທດ
ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ເພີ່ມຂຶ້ນ​ລະດັບ​ສູງ​ສຸດ​ໃນ​ຮອບ 5 ເດືອນ

    ຕົວ​ເລກ​ຢ່າງ​ເປັນ​ທາງ​ການ ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 3 ກໍລະກົດ​ນີ້ ໃຫ້​ຮູ້​ວ່າ ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ໄດ້​ເພີ່ມ​ຂຶ້ນ​ສູ່​ລະດັບ​ສູງ​ສຸດ​ໃນ​ຮອບ 5 ເດືອນ​ຜ່ານ​ມາ ໂດຍ​ມີ​ຂຶ້ນ​ໃນ​ເດືອນ​ພຶດສະພາ​ທີ່​ຜ່ານ​ມາ ໃນ​ເມື່ອ​ການ​ນຳ​ເຂົ້າ​ລົດຍົນ ບັນລຸ​ລະດັບ​ສູງ​ເປັນ​ປະຫວັດ​ການ.

    ບົດ​ລາຍ​ງານ​ຂອງ​ກະຊວງ​ການ​ຄ້າ ສ ອາ​ເມ​ຣິ​ກາ ໃຫ້​ຮູ້​ວ່າ ຂາດ​ດຸນ​ການ​ຄ້າ​ຂອງ​ປະເທດ​ນີ້ ໄດ້​ເພີ່ມ​ຂຶ້ນ 8,4% ຂຶ້ນ​ເປັນ 55,5 ຕື້​ໂດ​ລາ​ສະຫະລັດ (ເປັນ​ຕົວ​ເລກ​ທີ່​ໄດ້​ຮັບ​ການ​ດັດແກ້​ຕາມ​ລະດູ​ການ). ຕົວ​ເລກ​ດັ່ງກ່າວ ນັບ​ວ່າ​ສູງ​ກວ່າ​ການ​ຄາດ​ຄະເນ​ຂອງ​ບັນດາ​ນັກ​ວິໄຈ ທີ່​ມີ​ອອກ​ມາ​ກ່ອນ​ໜ້າ​ນັ້ນ ແລະ​ກໍ​ເປັນ​ລະດັບ​ເພີ່ມ​ຂຶ້ນ​ທີ່​ໃຫຍ່​ທີ່​ສຸດ ນັບ​ແຕ່​ເດືອນ​ທັນວາ​ປີ​ກາຍເປັນ​ຕົ້ນ​ມາ.

    ໃນ​ນັ້ນ ມູນ​ຄ່າ​ການ​ນຳ​ເຂົ້າ​ສິນຄ້າ ແລະ​ການ​ບໍລິການ ເພີ່ມ​ຂຶ້ນ 3,3% ຂຶ້ນ​ເປັນ 266,2 ຕື້​ໂດ​ລາ​ສະຫະລັດ ເປັນ​ລະດັບ​ເພີ່ມ​ຂຶ້ນ​ໃຫຍ່​ສຸດ ໃນ​ຮອບ​ກວ່າ​ສີ່​ປີ​ທີ່​ຜ່ານ​ມາ ຊຶ່ງ​ເປັນ​ຍ້ອນ​ວ່າ ຊາວ​ອາ​ເມ​ຣິ​ກັນ ຊື້​ລົດຍົນ ແລະ​ສິນຄ້າ​ໃຊ້​ສອຍ ເປັນ​ຈຳນວນ​ຫຼາຍ​ຂຶ້ນ. ໃນ​ຂະນະ​ດຽວ​ກັນ ການ​ສົ່ງ​ອອກ​ສິນຄ້າ​ກໍ​ເພີ່ມ​ຂຶ້ນ ແຕ່​ວ່າ​ຢູ່​ໃນ​ລະດັບ​ທີ່​ຊັກ​ຊ້າ​ກວ່າ​ເກົ່າ ຄື​ທີ່ 2% ເຖິງ​ວ່າ​ມູນ​ຄ່າ​ການ​ສົ່ງ​ອອກ​ສິນຄ້າ​ໃຊ້​ສອຍ​ໄດ້​ສ້າງ​ລະດັບ​ສະຖິຕິ​ທີ່ 18,1 ຕື້​ໂດ​ລາ​ສະຫະລັດ​ກໍ​ຕາມ.

    ໃນ 5 ເດືອນ​ຕົ້ນ​ປີ​ນີ້ ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ເພີ່ມ​ຂຶ້ນ 6,4% ຂຶ້ນ​ເປັນ 261,4 ຕື້​ໂດ​ລາ​ສະຫະລັດ. ແຕ່​ວ່າການ​ຂາດ​ດຸນ​ໃນ​ໄລຍະ​ເວລາ​ດຽວ​ກັນ​ນັ້ນ ທີ່​ມີ​ກັບ​ຈີນ​ພັດ​ຫຼຸດ​ລົງ 10,5%. ໃນ​ຂະນະ​ດຽວ​ກັນ ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ກັບ​ເມັກ​ຊິກ ເພີ່ມ​ຂຶ້ນ 35% ຂຶ້ນ​ເປັນ 40,4 ຕື້​ໂດ​ລາ​ສະຫະລັດ ພາຍ​ໃນ 5 ເດືອນ​ຕົ້ນ​ປີ​ນີ້. ສ່ວນ​ການ​ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ກັບ​ສະຫະພາບ​ເອີ​ຣົບ (EU)  ເພີ່ມ​ຂຶ້ນ​ທີ່​ລະດັບ 7,3% ຂຶ້ນ​ເປັນ  72,3 ຕື້​ໂດ​ລາ​ສະຫະລັດ.

ຂ່າວທີ່ກ່ຽວຂ້ອງ