ຂ່າວຫຼ້າສຸດ

ອິນ​ເດຍ ຮ່ວມ​ມື​ກັບ​ຣັດ​ເຊຍ ກ່ຽວ​ກັບ​ການບິນ​ອາ​ວະ​ກາດ

196 05 ກ.ລ. 2019 ຂ່າວຕ່າງປະເທດ
ອິນ​ເດຍ ຮ່ວມ​ມື​ກັບ​ຣັດ​ເຊຍ ກ່ຽວ​ກັບ​ການບິນ​ອາ​ວະ​ກາດ

    ແຫຼ່ງ​ຂ່າວ​ຈາກ ນີວ ແດນ​ລີ ໃຫ້​ຮູ້​ວ່າ ອົງການ​ຄົ້ນຄວ້າ​ອາ​ວະ​ກາດ​ຂອງ​ອິນ​ເດຍ (ISRO) ໄດ້​ເຊັນ​ສັນຍາ​ກັບ​ບໍລິສັດ Glavkosmos ທີ່​ຂຶ້ນ​ກັບ​ກຸ່ມ​ບໍລິສັດ Roscosmos ຂອງ​ຣັດ​ເຊຍ ກ່ຽວ​ກັບ​ການ​ໜູນ​ຊ່ວຍ​ໃນ​ຂະ​ບວນ​ການ​ຄັດ​ເລືອກ ບຳລຸງ​ສ້າງ ແລະ​ກວດກາ​ດ້ານ​ການ​ແພດ ຕໍ່​ບັນດາ​ນັກ​ບິນ​ຂອງ​ອິນ​ເດຍ ໃນ​ການ​ປະຕິບັດ​ຖ້ຽວ​ບິນ​ອາ​ວະ​ກາດ​ທຳ​ອິດ ທີ່​ມີ​ຄົນ​ບັງຄັບ​ບັນຊາ​ຂອງ​ອິນ​ເດຍ ໂດຍ​ມີ​ຊື່ວ່າ Gaganyaan.

    Glavkosmos ຈະ​ໃຫ້​ຄວາມ​ຊ່ວຍເຫຼືອ​ເປັນ​ທີ່​ປຶກສາ​ໃຫ້​ແກ່​ສູນ​ຖ້ຽວ​ບິນ​ອາ​ວະ​ກາດ​ທີ່​ມີ​ມະນຸດ​ຂັບ​ຂີ່ (HSFC) ຊຶ່ງ​ຂຶ້ນ​ກັບ ISRO ໃນ​ຂະ​ບວນ​ການ​ຄັດ​ເລືອກ​ຜູ້​ສະໝັກ​ເປັນ​ນັກ​ບິນ ດຳເນີນ​ການ​ກວດກາ​ດ້ານ​ການ​ແພດ ແລະ​ຝຶກ​ຊ້ອມ​ກ່ຽວ​ກັບ​ຖ້ຽວ​ບິນ​ອາ​ວະ​ກາດ ໃຫ້​ແກ່​ບັນດາ​ນັກ​ບິນ​ທີ່​ໄດ້​ຮັບ​ການ​ຄັດ​ເລືອກ.

    ທ່ານ ເຄ ຊີ​ວານ ປະທານ ISRO ໃຫ້​ຮູ້​ວ່າ ຄາດ​ວ່າ Gaganyaan ຈະ​ໄດ້​ຮັບ​ການ​ຍິງ​ສົ່ງ​ໃນ​ເດືອນ​ທັນວາ ປີ 2021 ແລະ​ມີ​ຄວາມ​ເປັນ​ໄປ​ໄດ້​ວ່າ ຈະ​ມີ​ນັກ​ບິນ​ອາ​ວະ​ກາດ​ເພດ​ຍິງ 1 ຄົນ ລວມ​ຢູ່​ນຳ. ການ​ຝຶກ​ຊ້ອມ​ໃນ​ໄລຍະ​ຕົ້ນ ຈະ​ມີ​ຂຶ້ນ​ຢູ່​ໃນ​ອິນ​ເດຍ ແຕ່​ວ່າ​ໄລຍະ​ຖັດ​ໄປ ແມ່ນ​ຈະ​ໄດ້​ປະຕິບັດ​ຢູ່​ຕ່າງປະເທດ ຊຶ່ງ​ມີ​ຄວາມ​ເປັນ​ໄປ​ໄດ້​ຫຼາຍ​ວ່າ​ຈະ​ແມ່ນ​ທີ່​ຣັດ​ເຊຍ. ຄ່າ​ໃຊ້​ຈ່າຍ​ໃຫ້​ແກ່​ໂຄງການ​ດັ່ງກ່າວ ຄາດ​ວ່າ​ຢູ່​ທີ່​ປະມານ 1,3 ຕື້​ໂດ​ລາ​ສະຫະລັດ. 

ຂ່າວທີ່ກ່ຽວຂ້ອງ