ເບິ່ງບ້ານເຂົາເອົາບົດຮຽນ 04-07-2019

380 04 ກ.ລ. 2019 ຫົວຂໍ້ຂ່າວອື່ນໆ

    ພົບ​ກັນ​ປະ­ຈຳ​ວັນ​ນີ້ ມີ​ເລື່ອງ​ເກົ່າໆ​ກ່ຽວ​ກັບ​ການ​ປະ­ຕິ​ຮູບ​ລະ­ບົບ​ການ​ສອບ­ເສັງ​ເອົາ​ໃບ​ຂັບ​ຂີ່​ທີ່ ສປ ຈີນ ແລະ ຂ່າວ​ກ່ຽວ​ກັບ​ການ​ອອກ​ກົດ­ໝາຍ ຫ້າມ​ໃຫ້​ເງິນ​ເດັກ​ຂໍ­ທານ​ທີ່​ປະ­ເທດ​ອູ​ກັນ​ດາ.

    ທີ່ ສປ ຈີນ: ກ່ອນ​ນີ້​ເກືອບ 5 ປີ ທາງ​ການ​ຈີນ ໄດ້​ປະ­ຕິ​ຮູບ​ລະ­ບົບ​ການ​ຮຽນ​ຂັບ​ລົດ ແລະ ສອບ­ເສັງ​ເອົາ​ໃບ​ຂັບ​ຂີ່ ແນ­ໃສ່​ກຳ­ຈັດ​ບັນ­ຫາ​ສໍ້​ລາດ​ບັງ​ຫຼວງ ແລະ ການ​ໃຫ້-ຮັບ​ສິນ​ບົນ ເຊິ່ງ​ກາຍ­ເປັນ​ພະ­ຍາດ​ຊຳ​ເຮື້ອ​ມາ​ເປັນ​ເວ­ລາ​ດົນ​ນານ.

    ການ​ສອບ­ເສັງ​ເອົາ​ໃບ​ຂັບ​ຂີ່​ກ່ອນ​ມີ​ການ​ປະ­ຕິ​ຮູບ​ນັ້ນ​ຮົກ­ເຮື້ອ ໄປ​ດ້ວຍ​ຂັ້ນ​ຕອນ​ທີ່​ມີ​ລັກ­ສະ­ນະ​ອາດ­ຍາ​ສິດ ເຊິ່ງ​ເປັນ​ຊະ​ນວນ​ກໍ່­ໃຫ້­ເກີດ​ມີ “ເງິນ​ກ້ອງ​ໂຕະ” ຫຼື ການ​ໃຫ້​ສິນ​ບົນ​ເພື່ອ​ແລກ​ເອົາ​ຄວາມ​ສະ­ດວກ​ສະ­ບາຍ ໃນ​ເວ­ລາ​ນັ້ນ ຜູ້​ຕ້ອງ­ການ​ໃບ​ອະ­ນຸ­ຍາດ​ຂັບ​ຂີ່​ຕ້ອງ​ໄດ້​ເຂົ້າ​ເຝິກ­ອົບ­ຮົມ ກ່ຽວ​ກັບ​ການ​ຂັບ​ລົດ​ເປັນ​ເວ­ລາ​ຢ່າງ​ໜ້ອຍ 64 ຊົ່ວ­ໂມງ ໃນ 4 ວິ­ຊາ​ທີ່​ຈຳ­ເປັນ ຄື: 2 ວິ­ຊາ​ທາງ​ດ້ານ​ທິດ​ສະ​ດີ ແລະ ອີກ 2 ວິ­ຊາ​ໃນ​ພາກ​ປະ­ຕິ­ບັດ​ຕົວ​ຈິງ ຄ່າ​ຮຽນ ແລະ ຄ່າ​ເຝິກ­ອົບ­ຮົມ​ນັ້ນ​ຢູ່​ລະ­ຫວ່າງ 5.000 ຢວນ (ເທົ່າ​ກັບ 815 ໂດ​ລາ​ສະ­ຫະ­ລັດ) ຫາ 10.000 ຢວນ.

    ຜູ້​ຕ້ອງ­ການ​ສອບ­ເສັງ​ເອົາ​ໃບ​ຂັບ​ຂີ່ ບໍ່​ສາ­ມາດ​ຈົດ​ທະ­ບຽນ​ສະ­ໝັກ​ດ້ວຍ​ຕົນ​ເອງ ແຕ່​ຕ້ອງ​ໄດ້​ມອບ​ໃຫ້​ທາງ​ໂຮງ­ຮຽນ​ເຝິກ­ອົບ­ຮົມ ປະ­ສານ​ງານ​ກັບ​ຫ້ອງ­ການ​ຄຸ້ມ​ຄອງ​ພາ­ຫາ​ນະ ເພື່ອ​ເຮັດ​ການ​ສອບ­ເສັງ ຈຸດ​ນີ້​ລະ​ເປັນ​ບ່ອນ​ກຳ­ເນີດ​ບັນ­ຫາ​ສໍ້​ລາດ​ບັງ​ຫຼວງ ແລະ ການ​ຕໍ່​ລອງ​ຜົນ​ປະ­ໂຫຍດ.

    ຜ່ານ​ການ​ສອບ​ສວນ ທາງ​ຫ້ອງ­ການ​ກະ­ຊວງ​ຄຸ້ມ​ຄອງ​ການ​ຈະ­ລາ­ຈອນ​ຈີນ​ໄດ້​ພົບ​ວ່າ ມີ​ກໍ­ລະ­ນີ​ເຈົ້າ​ໜ້າ­ທີ່​ຕຳ­ຫຼວດ​ໄດ້​ສວຍ​ໃຊ້​ສິດ​ອຳ­ນາດ ເພື່ອ​ຊ່ວຍ​ໃຫ້​ຜູ້​ສອບ­ເສັງ​ໃບ​ຂັບ​ຂີ່​ສອບ​ຜ່ານ ແລະ ອອກ​ໃບ​ອະ­ນຸ­ຍາດ​ຂັບ​ຂີ່​ແບບ​ຜິດ​ກົດ­ໝາຍ ເພື່ອ​ແລກ​ເອົາ​ສິນ​ບົນ​ກ້ອນ​ໃຫຍ່ໆ ພາຍ​ໃຕ້​ແຜນ​ປະ­ຕິ​ຮູບ​ໃນ​ປັດ­ຈຸ­ບັນ ຜູ້​ຕ້ອງ­ການ​ໃບ​ອະ­ນຸ­ຍາດ​ຂັບ​ຂີ່​ສາ­ມາດ​ຊອກ​ບົດ­ຮຽນ ແລະ ປະ­ສົບ​ການ​ກ່ຽວ​ກັບ​ການ​ຂັບ​ຂີ່​ດ້ວຍ​ຕົນ​ເອງ ແລະ ລົງ­ທະ­ບຽນ​ສະ­ໝັກ​ສອບ­ເສັງ​ດ້ວຍ​ຕົນ​ເອງ.

    ທ່ານ ຮວງ​ມິງ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ (ໃນ​ເວ­ລາ​ນັ້ນ) ໄດ້​ເວົ້າ​ກ່ຽວ​ກັບ​ບັນ­ຫາ​ນີ້​ວ່າ: ພວກ​ເຮົາ​ຕ້ອງ​ຖອດ​ຖອນ​ບົດ­ຮຽນ ຈາກ​ກໍ­ລະ­ນີ​ບັນ­ຫາ​ສໍ້​ລາດ​ບັງ​ຫຼວງ ແລະ ວ່າ​ທາງ​ການ​ຈີນ​ຈະ​ນຳ​ໃຊ້​ມາດ​ຕະ­ການ​ເດັດ­ຂາດ ເພື່ອ​ຫຼຸດ­ຜ່ອນ​ຂັ້ນ​ຕອນ ບັນ­ຫາ​ຊ່ອງ​ຫວ່າງ​ຕ່າງໆ​ໃນ​ລະ­ບົບ​ການ​ຮຽນ ເພື່ອ​ສອບ­ເສັງ​ເອົາ​ໃບ​ຂັບ​ຂີ່ ແນ­ໃສ່​ກຳ­ຈັດ​ບັນ­ຫາ​ສໍ້​ລາດ​ບັງ​ຫຼວງ​ແຕ່​ຕົ້ນ​ເຫດ​ໃຫ້​ມີ​ປະ­ສິດ­ທິ­ພາບ​ສູງ.

    ຂ່າວ​ບອກ​ວ່າ: ແຜນ​ປະ­ຕິ​ຮູບ​ນີ້​ໄດ້​ຮັບ​ສຽງ​ສະ­ໜັບ­ສະ­ໜູນ​ຈາກ​ທົ່ວ​ສັງ­ຄົມ ແຕ່​ກໍ​ມີ​ຜູ້​ກັງ­ວົນ​ໃຈ​ວ່າ ຖ້າ​ແຕ່­ລະ­ຄົນ​ທີ່​ຕ້ອງ­ການ​ໃບ​ຂັບ​ຂີ່​ຊອກ​ຫາ​ບົດ­ຮຽນ ແລະ ປະ­ສົບ​ການ​ເອົາ​ເອງ​ແລ້ວ ຈະ​ເອົາ​ລົດ​ແຕ່​ໃສ​ມາ​ເຝິກ​ຂັບ?.

    ທີ່ ອູ​ກັນ​ດາ: ໃນ​ເດືອນ​ພຶດ­ສະ­ພາ​ປີ​ນີ້ ເຈົ້າ​ຄອງ​ນະ­ຄອນ­ຫຼວງ​ກຳ​ປາ​ລາ ປະ­ເທດ​ອູ​ກັນ​ດາ ໃນ​ທະ­ວີບ​ອາ​ຟຣິ​ກາ ໄດ້​ອອກ​ກົດ­ໝາຍ​ຫ້າມ​ເອົາ​ເງິນ​ໃຫ້​ຄົນ​ຂໍ­ທານ ທີ່​ເປັນ​ເດັກ­ນ້ອຍ​ຕາມ​ຖະ­ໜົນ ຖ້າ​ໃຜ​ລະ­ເມີດ​ຈະ​ຖືກ​ປັບ​ໃໝ​ເປັນ​ເງິນ 11 ໂດ​ລາ​ສະ­ຫະ­ລັດ​ຕໍ່​ຄັ້ງ ຫຼື ຖືກ​ໂທດ​ຈຳ​ຄຸກ​ສູງ​ສຸດ 6 ເດືອນ ຈຸດ­ປະ­ສົງ​ຂອງ​ກົດ­ໝາຍ​ນີ້​ແມ່ນ ເພື່ອ​ປ້ອງ​ກັນ​ບໍ່​ໃຫ້​ມີ​ການ​ສະ­ແຫວງ­ຫາ​ຜົນ​ປະ­ໂຫຍດ ຈາກ​ການ​ຄ້າ​ມະ­ນຸດ​ດ້ວຍ​ຮູບ​ການ​ຂູດ​ຮີດ​ຕໍ່​ເດັກ.

    ຕາມ​ສະ­ຖິ­ຕິ​ທາງ​ການ ເດັກ­ນ້ອຍ​ອູ​ກັນ​ດາ​ອາ­ຍຸ​ແຕ່ 7-17 ປີ ທີ່​ບໍ່​ມີ​ທີ່­ຢູ່​ອາ­ໄສ​ເປັນ​ຫຼັກ​ແຫຼ່ງ​ນັ້ນ ມີ​ປະ­ມານ 15 ພັນ​ຄົນ​ໃນ​ທົ່ວ​ປະ­ເທດ ເດັກ­ນ້ອຍ​ເຫຼົ່າ​ນີ້​ມີ​ຄວາມ​ສ່ຽງ​ສູງ ທີ່​ຈະ​ຕົກ​ເປັນ​ເຫຍື່ອ​ການ​ຄ້າ​ມະ­ນຸດ ດ້ວຍ​ວິ­ທີ​ບັງ­ຄັບ​ໃຫ້​ເປັນ​ຂໍ­ທານ ໃຫ້​ບໍ­ລິ­ການ​ທາງ​ເພດ ຫຼື ເປັນ​ເຄື່ອງ­ມື​ກໍ່​ອາ​ຊະ​ຍາ​ກຳ​ຕ່າງໆ ໂດຍ​ມີ​ຫົວ​ໂປ່​ບັນ­ຊາ​ຢູ່​ທາງ​ເບື້ອງ​ຫຼັງ ການ​ໃຫ້​ເງິນ​ແກ່​ເດັກ​ຂໍ­ທານ​ນັ້ນ ຈະ​ເປັນ​ການ​ສົ່ງ­ເສີມ​ໃຫ້​ມີ​ການ​ຄ້າ​ເດັກ­ນ້ອຍ​ເພີ່ມ​ຂຶ້ນ ພ້ອມ​ດຽວ​ກັນ​ນີ້ ທາງ​ການ​ອູ​ກັນ​ດາ ກໍ​ຍັງ​ມີ​ແຜນ​ອອກ​ກົດ­ໝາຍ​ຫ້າມ​ເຊົ່າ​ທີ່​ພັກ ເພື່ອ​ໃຊ້​ເປັນ​ບ່ອນ​ຄ້າ​ມະ­ນຸດ ແລະ ຄ້າ​ປະ­ເວ­ນີ​ເດັກ ໃນ​ເບື້ອງ​ຕົ້ນ ກົດ­ໝາຍ​ຫ້າມ​ໃຫ້​ເງິນ​ເດັກ​ຂໍ­ທານ​ນີ້ ມີ​ຜົນ​ສັກ­ສິດ​ສະ­ເພາະ​ໃນ​ນະ­ຄອນ­ຫຼວງ​ກຳ​ປາ​ລາ ເທົ່າ​ນັ້ນ.

ຂ່າວທີ່ກ່ຽວຂ້ອງ