ຈັດແຂ່ງຂັນກີລາບານເຕະ ຊີງຂັນເລຂາຄະນະບໍລິຫານງານ ຊປລ

984 03 ກ.ລ. 2019 ວົງຈອນກີລາ
ຈັດແຂ່ງຂັນກີລາບານເຕະ ຊີງຂັນເລຂາຄະນະບໍລິຫານງານ ຊປລ

    ວັນ​ທີ 28 ມິ­ຖຸ­ນາ 2019 ຢູ່​ສູນ​ກາງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ໄດ້​ຈັດ​ພິ­ທີ​ຖະ­ແຫຼງ​ຂ່າວ ແລະ ຈັບ​ສະ­ຫຼາກ​ແບ່ງ​ກຸ່ມ​ການ​ແຂ່ງ­ຂັນ​ກີ­ລາ​ບານ­ເຕະ​ຊີງ​ຂັນ ທ່ານ​ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ (ຊປລ) 2019 ໂດຍ​ເປັນ​ປະ­ທານ​ຂອງ​ທ່ານ ບຸນ​ຕາ ເທບ​ພະ​ວົງ ຮອງ​ເລ­ຂາ​ຄະ­ນະ​ບໍ­ລິ­ຫານ​ງານ ຊປລ ມີ​ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ​ກະ­ຊວງ ອົງ­ການ ລັດ​ວິ​ສາ​ຫະ​ກິດ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ການ​ແຂ່ງ­ຂັນ​ກີ­ລາ​ບານ­ເຕະ 11 ຄົນ ຊີງ​ຂັນ​ທ່ານ​ເລ­ຂາ​ຄະ­ນະ​ບໍ­ລິ­ຫານ​ງານ ຊປລ ຄັ້ງ​ນີ້ ເພື່ອ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ ວັນ​ຄ້າຍ​ວັນ​ເກີດ​ປະ­ທານ ສຸ​ພາ­ນຸ​ວົງ ຄົບ­ຮອບ 110 ປີ (13/7/1909-13/7/2019) ວັນ​ກຳ­ເນີດ​ກີ­ລາ​ລາວ ວັນ​ຍຶດ​ອຳ­ນາດ ຄົບ­ຮອບ 44 ປີ(23/8/1975-23/8/2019) ວັນ​ສ້າງ­ຕັ້ງ​ສູນ​ກາງ​ແນວ​ລາວ​ສ້າງ​ຊາດ ຄົບ­ຮອບ 69 ປີ (13/8/1950-13/8/2019) ທັງ​ເປັນ​ການ​ຕ້ອນ­ຮັບ​ກອງ​ປະ­ຊຸມ​ໃຫຍ່​ຜູ້​ແທນ​ຊາວ​ໜຸ່ມ​ທົ່ວ​ປະ­ເທດ ຄັ້ງ​ທີ VIII ເປັນ​ການ​ເຕົ້າ­ໂຮມ​ຄວາມ​ສາ­ມັກ­ຄີ​ລະ­ຫວ່າງ​ຄະ­ນະ​ຊາວ​ໜຸ່ມ​ບັນ­ດາ​ອົງ­ການ ກະ­ຊວງ ນະ­ຄອນ­ຫຼວງ​ວຽງ​ຈັນ ແລະ ແຂວງ ເພື່ອ​ພັດ­ທະ­ນາ​ບານ­ເຕະ​ໃຫ້​ມີ​ປະ­ສິດ­ທິ­ພາບ ແລະ ກ້າວ​ຂຶ້ນ​ໄປ​ເລື້ອຍໆ ເພື່ອ​ສ້າງ​ເງື່ອນ­ໄຂ​ໃຫ້​ຊາວ​ໜຸ່ມ ສະ­ມາ­ຊິກ​ຊາວ​ໜຸ່ມ ໄດ້​ມີ​ໂອ­ກາດ​ສະ­ແດງ​ຄວາມ​ສາ­ມາດ​ຂອງ​ຕົນ​ທາງ​ດ້ານ​ກີ­ລາ​ບານ­ເຕະ ແລະ ທັງ​ເປັນ​ການ​ອອກ­ກຳ­ລັງ​ກາຍ​ເພື່ອ​ສຸ­ຂະ­ພາບ.

    ການ​ແຂ່ງ­ຂັນ​ຄັ້ງ​ນີ້ ມີ​ທີມ​ຄະ­ນະ​ຊາວ​ໜຸ່ມ​ຈາກ​ກະ­ຊວງ​ຕ່າງໆ​ເຂົ້າ​ຮ່ວມ​ທັງ​ໝົດ 18 ທີມ ເຊິ່ງ​ລາ­ງວັນ​ຊະ­ນະ​ເລີດ​ຈະ​ໄດ້​ຮັບ​ເງິນ 10 ລ້ານ​ກີບ ພ້ອມ​ຂັນ​ໜຶ່ງ​ໜ່ວຍ​ມູນ​ຄ່າ 3 ລ້ານ​ກີບ ອັນ​ດັບ​ທີ 2 ໄດ້​ຮັບ​ເງິນ 7 ລ້ານ​ກີບ ພ້ອມ​ຫຼຽນ​ຄຳ 30 ຫຼຽນ ອັນ​ດັບ 3 ໄດ້​ເງິນ 5 ລ້ານ​ກີບ ພ້ອມ​ຫຼຽນ​ເງິນ 30 ຫຼຽນ ອັນ​ດັບ​ທີ 4 ໄດ້​ເງິນ 3 ລ້ານ​ກີບ ພ້ອມ​ຫຼຽນ​ທອງ 30 ຫຼຽນ ແລະ ຍັງ​ມີ​ລາ­ງວັນ​ອື່ນໆ ເຊິ່ງ​ການ​ແຂ່ງ­ຂັນ​ຈະ​ເລີ່ມ​ກາງ​ເດືອນ​ກໍ­ລະ­ກົດ​ນີ້​ເປັນ­ຕົ້ນ​ໄປ.

ຂ່າວທີ່ກ່ຽວຂ້ອງ