ເບີ່ງບ້ານເຂົາເອົາບົດຮຽນ 03-07-2019

332 03 ກ.ລ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ກ່ຽວ​ກັບ​ນະ­ໂຍ­ບາຍ​ຂອງ​ຈີນ ໃນ​ການ​ລຶ­ບລ້າງ​ຄວາມ­ທຸກ​ຍາກ​ໃຫ້​ຜູ້​ເສຍ​ອົງ­ຄະ ແລະ ເລື່ອງ​ກະ­ແສ​ຄັດ­ຄ້ານ​ຂໍ້​ກຳ­ນົດ​ຫ້າມ​ແມ່­ຍິງ​ໃສ່​ເກີບ​ສົ້ນ​ສູງ​ທີ່​ຍີ່­ປຸ່ນ.

    ທີ່ ສປ ຈີນ: ເປົ້າ​ໝາຍ​ລຶ­ບລ້າງ​ຄວາມ­ທຸກ​ຍາກ​ໃນ ສປ ຈີນ ນັ້ນ ໄດ້​ເອົາ­ໃຈ­ໃສ່​ເປັນ​ພິ­ເສດ​ສຳ­ລັບ​ຄົນ​ພິ­ການ ໂດຍ​ໄດ້​ກຳ­ນົດ​ການ​ລຶ­ບລ້າງ​ຄວາມ­ທຸກ​ຍາກ​ສຳ­ລັບ​ຄົນ​ເສຍ​ອົງ­ຄະ ເຂົ້າ​ໃນ​ນະ­ໂຍ­ບາຍ​ລວມ​ແຫ່ງ​ຊາດ ສປ ຈີນ ມີ​ຄົນ​ເສຍ​ອົງ­ຄະ​ທັງ​ໝົດ ຈຳ­ນວນ 85 ລ້ານ​ຄົນ ເຊິ່ງ​ເປັນ​ຈຳ­ນວນ​ຫຼາຍ​ກວ່າ​ປະ­ເທດ​ອື່ນໆ ເລີ່ມ​ແຕ່​ປີ 2016 ຄົນ​ເສຍ​ອົງ­ຄະ​ຈຳ­ນວນ 20 ລ້ານ​ຄົນ ໄດ້​ຮັບ​ຜົນ​ປະ­ໂຫຍດ​ຈາກ​ໂຄງ­ການ​ລຶ­ບລ້າງ​ຄວາມ­ທຸກ​ຍາກ ອັນ​ໄດ້​ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ພວກ​ເຂົາ​ດີ​ຂຶ້ນ.

    ສະ­ຖິ­ຕິ​ທາງ​ການ​ຂອງ​ຈີນ​ຊີ້​ບອກ​ວ່າ: ຈຳ­ນວນ​ຄົນ​ພິ­ການ​ທີ່­ຢູ່​ໃນ​ສະ­ພາບ​ທຸກ​ຍາກ​ໄດ້​ຫຼຸດ​ລົງ​ເຫຼືອ​ພຽງ 1,7 ລ້ານ​ຄົນ ໃນ​ທ້າຍ​ປີ 2018 ຈາກ​ເກືອບ 6 ລ້ານ​ຄົນ ໃນ​ປີ 2014 ມາດ​ຕະ­ການ​ປົດ​ປ່ອຍ​ຄົນ​ພິ­ການ​ອອກ​ຈາກ​ຄວາມ­ທຸກ​ຍາກ​ນັ້ນ ລວມ​ມີ​ການ​ຊ່ວຍ­ເຫຼືອ​ດ້ານ​ການ​ເງິນ​ສຳ­ລັບ​ຜູ້​ທີ່​ມີ​ບັນ­ຫາ​ດ້ານ​ການ​ເງິນ ແລະ ການ​ຊ່ວຍ­ເຫຼືອ​ເບິ່ງ­ແຍງ​ສຸ­ຂະ­ພາບ​ສຳ­ລັບ​ຜູ້​ເສຍ​ອົງ­ຄະ​ຂັ້ນ​ໜັກ­ໜ່ວງ ນະ­ໂຍ­ບາຍ​ດ້ານ​ສະ­ຫວັດ­ດີ​ການ​ສຳ­ລັບ​ຄົນ​ພິ­ການ​ໃນ ສປ ຈີນ ນັ້ນ ເນັ້ນ​ໃສ່​ຄວາມ​ໝັ້ນ­ຄົງ​ດ້ານ​ສັງ­ຄົມ ການ​ພັກ​ຟື້ນ ການ​ເບິ່ງ­ແຍງ​ສຸ­ຂະ­ພາບ ແລະ ການ​ສະ­ໜອງ​ທີ່­ຢູ່​ອາ­ໄສ.

    ທີ່ ຍີ່­ປຸ່ນ: ມີ​ຂ່າວ​ຫວ່າງ​ບໍ່​ດົນ​ມາ​ນີ້​ວ່າ: ໄດ້​ເກີດ​ມີ​ຂະ​ບວນ​ຮຽກ­ຮ້ອງ​ໃຫ້​ລັດ­ຖະ­ບານ​ຍີ່­ປຸ່ນ ຍົກ­ເລີກ​ຂໍ້​ກຳ­ນົດ​ຫ້າມ​ແມ່­ຍິງ​ໃສ່​ເກີບ​ສົ້ນ​ສູງ​ເວ­ລາ​ເຮັດ​ວຽກ ກ່ອນ​ໜ້າ​ນັ້ນ ທາງ​ການ​ຍີ່­ປຸ່ນ​ໄດ້​ອອກ​ຂໍ້​ກຳ­ນົດ​ໃຫ້​ບັນ­ດາ​ບໍ­ລິ­ສັດ​ຕ່າງໆ ຫ້າມ​ພະ­ນັກ­ງານ​ຍິງ​ໃສ່​ເກີບ​ສົ້ນ​ສູງ​ໄປ​ເຮັດ​ວຽກ ໂດຍ​ອ້າງ​ເຫດ­ຜົນ​ວ່າ: ເກີບ​ສົ້ນ​ສູງໆ​ຈະ​ສົ່ງ​ຜົນ​ກະ­ທົບ​ຕໍ່​ສຸ­ຂະ­ພາບ​ຂອງ​ແມ່­ຍິງ.

    ແນວ­ໃດ​ກໍ​ດີ ຂໍ້​ກຳ­ນົດ​ດັ່ງ­ກ່າວ​ໄດ້​ຖືກ​ກະ­ແສ​ຄັດ­ຄ້ານ​ຄືນ​ຈາກ​ສັງ­ຄົມ ໂດຍ​ມີ​ຜູ້​ອ້າງ​ວ່າ​ບໍ່​ຄວນ​ໃຫ້​ແມ່­ຍິງ​ໃສ່​ເກີບ​ສົ້ນ​ແປໆ​ໄປ​ການ ແລະ ວ່າ​ແມ່­ຍິງ​ໃສ່​ເກີບ​ສົ້ນ​ບາງໆ​ນັ້ນ​ເບິ່ງ​ເປັນ­ຕາ​ໜ້າ​ເບື່ອ ຂ່າວ​ບອກ​ວ່າ: ຜູ້​ຄັດ­ຄ້ານ​ຂໍ້​ກຳ­ນົດ​ດັ່ງ­ກ່າວ ຈຳ­ນວນ 18.556 ຄົນ ໄດ້​ລົງ​ລາຍ​ເຊັນ​ໃສ່​ໜັງ­ສື​ຄັດ­ຄ້ານ​ສົ່ງ​ເຖິງ​ກະ­ຊວງ​ສາ­ທາ­ລະ­ນະ​ສຸກ ແລະ ກະ­ຊວງ​ແຮງ​ງານ-ສະ­ຫວັດ­ດີ​ການ​ສັງ­ຄົມ ເພື່ອ​ໃຫ້​ມີ​ຄຳ​ສັ່ງ​ຍົກ­ເລີກ​ຂໍ້​ຫ້າມ​ດັ່ງ­ກ່າວ.

    ມາດ​ຕະ­ການ​ຫ້າມ​ພະ­ນັກ­ງານ​ຍິງ​ໃສ່​ເກີບ​ສົ້ນ​ສູງ ເວ­ລາ​ເຄື່ອນ​ໄຫວ​ປະ­ຕິ­ບັດ​ໜ້າ­ທີ່​ນັ້ນ ໄດ້​ປະ­ຕິ­ບັດ​ກັນ​ແບບ​ສະ­ໝັກ​ໃຈ​ຢູ່​ບາງ​ປະ­ເທດ ເຊັ່ນ: ກາ​ນາ​ດາ ສຳ­ລັບ​ຢູ່ ຟິ​ລິບ​ປິນ ນັ້ນ ທາງ​ການ​ເຄີຍ​ໄດ້​ອອກ​ຄຳ​ສັ່ງ​ຫ້າມ​ບັນ­ດາ​ບໍ­ລິ­ສັດ ຫ້າງ​ຮ້ານ​ຕ່າງໆ ບັງ­ຄັບ​ໃຫ້​ພະ­ນັກ­ງານ​ຍິງ​ໃສ່​ເກີບ​ສົ້ນ​ສູງ​ເວ­ລາ​ເຄື່ອນ​ໄຫວ​ປະ­ຕິ­ບັດ​ໜ້າ­ທີ່ ໂດຍ​ສະ­ເພາະ​ແມ່ນ​ພະ­ນັກ­ງານ​ທີ່​ຕ້ອງ​ໄດ້​ຢືນ​ເຮັດ​ວຽກ​ເປັນ​ເວ­ລາ​ດົນ ເຊັ່ນ: ພະ­ນັກ­ງານ​ຕ້ອນ­ຮັບ​ຢູ່​ຕາມ​ໂຮງ­ແຮມ ກໍ​ຄື ພະ­ນັກ­ງານ​ໃນ​ຂະ­ແໜງ​ພິ­ການ ການ​ໃສ່​ເກີບ​ສົ້ນ​ສູງ​ເວ­ລາ​ເຮັດ​ວຽກ​ທີ່​ຕ້ອງ​ໄດ້​ຢືນ ຫຼື ຍ່າງ​ໄປ​ມາ​ດົນໆ​ນັ້ນ ຈະ​ສົ່ງ​ຜົນ​ກະ­ທົບ​ບໍ່​ດີ​ຕໍ່​ສຸ­ຂະ­ພາບ​ຂອງ​ແມ່­ຍິງ.

ຂ່າວທີ່ກ່ຽວຂ້ອງ