ເບີ່ງບ້ານເຂົາເອົາບົດຮຽນ 02-07-2019

341 02 ກ.ລ. 2019 ຫົວຂໍ້ຂ່າວອື່ນໆ

    ພົບ​ກັນ​ປະ­ຈຳ​ວັນ​ນີ້ ມີ​ຂ່າວ​ກ່ຽວ​ກັບ​ກົດ­ໝາຍ​ລົງ­ໂທດ​ຜູ້​ຂັບ​ຂີ່​ລົດ ໃນ​ອາ­ການ​ມຶນ­ເມົາ​ທີ່​ຫວຽດ­ນາມ ເລື່ອງ​ກົດ­ໝາຍ​ອະ­ນຸ­ຍາດ​ໃຫ້​ຄົນ​ເຈັບ​ມີ​ສິດ ຂໍ​ປິດ​ຊິ­ວິດ​ຕົນ​ເອງ​ຢູ່​ອົດ​ສະ​ຕຣາ​ລີ ແລະ ຂ່າວ​ການ​ປັບ​ໃໝ​ແຮງ​ງານ​ຜິດ​ກົດ­ໝາຍ​ຢູ່​ໄທ.

    ທີ່ ສສ ຫວຽດ­ນາມ: ຂ່າວ​ຈາກ​ຫວຽດ­ນາມ​ໃນ​ກາງ​ເດືອນ​ມິ­ຖຸ­ນາ​ປີ​ນີ້ ໃຫ້​ຮູ້​ວ່າ: ສະ­ພາ​ແຫ່ງ​ຊາດ​ຫວຽດ­ນາມ ໄດ້​ລົງ­ມະ­ຕິ​ຮັບ­ຮອງ​ເອົາ​ກົດ­ໝາຍ​ສະ­ກັດ​ກັ້ນ​ຜົນ​ຮ້າຍ ທີ່​ເປັນ​ອັນ­ຕະ­ລາຍ​ຮ້າຍ​ແຮງ​ຈາກ​ສະ­ພາບ​ເມົາ​ເຫຼົ້າ​ແລ້ວ​ຂັບ​ລົດ ກົດ­ໝາຍ​ດັ່ງ­ກ່າວ ໄດ້​ຮັບ​ຄະ­ແນນ​ສຽງ​ສະ­ໜັບ­ສະ­ໜູນ​ເປັນ​ຈຳ­ນວນ 450 ສຽງ ຈາກ​ທີ່​ມີ​ທັງ​ໝົດ 480 ສຽງ ກົດ­ໝາຍ​ສະ­ບັບ​ເດັດ­ຂາດ​ນີ້ ໄດ້​ກຳ­ນົດ​ຢ່າງ​ຈະ​ແຈ້ງ­ວ່າ​ນັກ​ຂັບ​ຂີ່​ທີ່​ກວດ​ພົບ​ວ່າ​ມີ​ທາດ​ເຫຼົ້າ​ໃນ​ຮ່າງ­ກາຍ ໃນ​ຈຳ­ນວນ​ຫຼາຍ ຫຼື ໜ້ອຍ​ກໍ​ຕາມ ກໍ​ລ້ວນ​ແຕ່​ຈະ​ຖືກ​ຢຶດ ແລະ ລຶ­ບລ້າງ​ໃບ​ຂັບ​ຂີ່​ຂອງ​ຜູ້­ກ່ຽວ​ໂດຍ​ທັນ­ທີ​ໂລດ.

    ສະ­ຫຼຸບ​ຄວາມ​ແລ້ວ ພາຍ​ໃຕ້​ກົດ­ໝາຍ​ນີ້​ຜູ້​ຂັບ​ຂີ່​ບໍ່​ວ່າ​ຈະ​ບັນ­ຊາ​ພວງ­ມາ­ໄລ ຫຼື ເຂົາ​ລົດ​ກໍ​ຕ້ອງ​ງົດ​ເຫຼົ້າ 100% ຈຶ່ງ​ຈະ​ບໍ່​ຖືກ​ຢຶດ ແລະ ລຶ­ບລ້າງ​ໃບ​ຂັບ​ຂີ່.

    ທີ່ ອົດ​ສະ​ຕຣາ​ລີ: ນີ້​ເປັນ​ຂ່າວ​ອ່າວ​ເກົ່າ (ໜັງ­ສື­ພິມ​ຜູ້​ແທນ​ປະ­ຊາ­ຊົນ​ລາຍ​ອາ­ທິດ ສະ­ບັບ​ກາງ​ເດືອນ​ທັນ­ວາ ປີ 2017) ທີ່​ໃຫ້​ຮູ້​ວ່າ: ລັດ​ວິກ​ຕໍ​ເຣຍ​ຂອງ​ອົດ​ສະ​ຕຣາ​ລີ ໄດ້​ຮັບ­ຮອງ​ເອົາ​ກົດ­ໝາຍ​ອະ­ນຸ­ຍາດ ໃຫ້​ຄົນ​ເຈັບ​ປ່ວຍ​ໄລ­ຍະ​ສຸດ​ທ້າຍ​ມີ​ສິດ​ຂໍ​ປິດ​ຊີ­ວິດ​ຕົນ​ເອງ​ລົງ​ໄດ້ ຖື​ໄດ້​ວ່າ ວິກ​ຕໍ​ເຣຍ ເປັນ​ລັດ​ທຳ​ອິດ​ຂອງ​ອົດ​ສະ​ຕຣາ​ລີ ທີ່​ອະ­ນຸ­ຍາດ​ໃຫ້​ແພດ​ໝໍ​ປະ­ຕິ­ບັດ​ຕາມ​ຄຳ​ຂໍ​ຮ້ອງ​ຂອງ​ຄົນ​ເຈັບ ເພື່ອ​ໜີ​ຄວາມ​ທຸກ­ທໍ­ລະ­ມານ​ທີ່​ບໍ່​ສາ­ມາດ​ປິ່ນ­ປົວ​ໃຫ້​ຫາຍ​ໄດ້.

    ກົດ­ໝາຍ​ໄດ້​ລະ­ບຸ​ແຈ້ງ­ວ່າ: ແພດ​ສາ­ມາດ​ຊ່ວຍ​ຄົນ​ເຈັບ​ປິດ​ຊີ­ວິດ​ລົງ​ໄດ້​ໃນ​ເງື່ອນ­ໄຂ​ດັ່ງ­ນີ້ ຄື: ຄົນ​ເຈັບ​ຕ້ອງ​ມີ​ອາ­ຍຸ​ຕ່ຳ​ສຸດ​ບໍ່​ຫຼຸດ 18 ປີ ຕ້ອງ​ມີ​ອາ­ການ​ເຈັບ​ປວດ​ຢ່າງ​ໜັກ­ໜ່ວງ​ທີ່​ສຸດ ແລະ ສາ­ມາດ​ມີ​ຊີ­ວິດ​ຢູ່​ໄດ້​ບໍ່​ຮອດ 6 ເດືອນ ກ່ອນ​ຈະ​ເສຍ​ຊີ­ວິດ ສ່ວນ​ຄົນ​ເຈັບ​ທີ່​ມີ​ເງື່ອນ­ໄຂ​ຂໍ​ສະ­ໝັກ​ຕາຍ​ນັ້ນ ກໍ​ຕ້ອງ​ສົ່ງ​ໃບ​ສະ­ເໜີ​ເຖິງ​ແພດ​ທີ່​ກ່ຽວ­ຂ້ອງ​ປະ­ຈຳ​ຢູ່​ໂຮງ­ພະ­ຍາ­ບານ ຫຼັງ​ຈາກ​ນັ້ນ 10 ວັນ ຈຶ່ງ​ສາ­ມາດ​ໃຊ້​ຢາ​ປິດ​ຊີ­ວິດ​ຂອງ​ຕົນ​ດ້ວຍ​ການ​ສີດ​ຢາ​ເຂົ້າ​ຮ່າງ­ກາຍ​ຕົນ​ດ້ວຍ​ຕົນ​ເອງ ໃນ​ກໍ­ລະ­ນີ​ບໍ່​ສາ­ມາດ​ສີດ​ເອງ​ໄດ້ ແພດ​ກໍ​ຈະ​ຊ່ວຍ​ສີດ​ໃຫ້.

    ເງື່ອນ­ໄຂ​ຈຳ­ເປັນ​ອື່ນໆ​ຕື່ມ​ສຳ­ລັບ​ຄົນ​ເຈັບ​ທີ່​ສະ­ໝັກ​ຕາຍ​ນັ້ນ ກໍ​ຄື ຜູ້­ກ່ຽວ​ຕ້ອງ​ມີ​ສະ­ຕິ​ສົມ­ບູນ​ເປັນ​ປົກ­ກະ­ຕິ​ທຸກ​ປະ­ການ ແລະ ຕ້ອງ​ຜ່ານ​ການ​ຍື່ນ​ຄຳ​ຮ້ອງ​ຂໍ​ຕາຍ​ເປັນ​ຈຳ­ນວນ 3 ຄັ້ງ​ຕໍ່​ແພດ​ທີ່​ຮັບ​ໜ້າ­ທີ່​ສະ­ເພາະ​ເລື່ອງ​ນີ້ ກົດ­ໝາຍ​ນີ້​ໄດ້​ປະ​ເຊີນ​ກັບ​ກະ­ແສ​ຄັດ­ຄ້ານ​ຈຳ­ນວນ​ໜຶ່ງ ຈາກ​ຜູ້​ທີ່​ເຫັນ​ວ່າ​ຄວນ​ປິ່ນ­ປົວ​ຄົນ​ເຈັບ​ຈົນ​ຮອດ​ວິ­ນາ­ທີ​ສຸດ​ທ້າຍ ແລະ ວ່າ​ກົດ­ໝາຍ​ອາດ​ມີ​ຊ່ອງ​ຫວ່າງ​ໃຫ້​ຄົນ​ເຈັບ​ຄິດ​ປິດ​ຊີ­ວິດ​ຕົນ​ເອງ​ໄວ​ເກີນ​ຄວນ ເມື່ອ​ເຫັນ​ວ່າ​ບໍ່​ສາ­ມາດ​ປິ່ນ­ປົວ​ໃຫ້​ຫາຍ​ໄດ້ ເຊິ່ງ​ຂັດ​ກັບ​ສິດ­ທິ​ຄົນ​ເຈັບ​ໄລ­ຍະ​ສຸດ​ທ້າຍ ໃນ​ການ​ຮັບ​ການ​ປິ່ນ­ປົວ​ຢ່າງ​ເຕັມ​ຄວາມ​ສາ­ມາດ ຕາມ​ອາ­ການ​ຈົນ​ເຖິງ​ທີ່​ສຸດ ກົດ­ໝາຍ​ນີ້ ຈະ​ມີ​ຜົນ​ບັງ­ຄັບ​ໃຊ້​ນັບ​ແຕ່​ກາງ​ປີ 2019 ນີ້​ເປັນ­ຕົ້ນ​ໄປ.

    ທີ່ ປະ­ເທດ​ໄທ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 21 ມິ­ຖຸ­ນາ 2019 ໄດ້​ໃຫ້​ຮູ້​ກ່ຽວ​ກັບ​ການ​ປັບ​ໃໝ​ແຮງ​ງານ​ຕ່າງ­ປະ­ເທດ ທີ່​ເຂົ້າ​ໄປ​ເຮັດ​ວຽກ​ແບບ​ຜິດ​ກົດ­ໝາຍ​ຢູ່​ໄທ ພ້ອມ​ດ້ວຍ​ນາຍ​ຈ້າງ​ຜູ້​ຮັບ­ຜິດ­ຊອບ​ແຮງ​ງານ​ເຫຼົ່າ​ນີ້​ວ່າ: ໃນ​ໄລ­ຍະ 12 ເດືອນ​ຜ່ານ​ມາ ທາງ​ການ​ໄທ​ສາ­ມາດ​ປັບ​ໃໝ​ໄດ້​ເງິນ​ຈຳ­ນວນ​ທັງ​ໝົດ ປະ­ມານ 41 ລ້ານ​ບາດ ໄດ້​ສຳ­ເລັດ​ການ​ກວດ­ກາ​ແຮງ​ງານ​ຕ່າງ­ປະ­ເທດ​ທັງ​ໝົດ 417.546 ຄົນ ໃນ​ນັ້ນ​ພົບ​ວ່າ 6.647 ຄົນ ອອກ­ແຮງ​ງານ​ແບບ​ຜິດ​ກົດ­ໝາຍ ເຊິ່ງ​ມີ­ແຮງ​ງານ​ມຽນ​ມາ 4.250 ຄົນ ກຳ­ປູ­ເຈຍ 1.050 ຄົນ ລາວ 665 ຄົນ ຫວຽດ­ນາມ 349 ຄົນ ແລະ ຊາດ​ອື່ນໆ​ອີກ 333 ຄົນ ແລະ ໄດ້​ສົ່ງ​ກັບ​ຄືນ​ປະ­ເທດ​ເດີມ 6.529 ຄົນ.

ຂ່າວທີ່ກ່ຽວຂ້ອງ