ກະສິກອນ​ໃນ​ເອີ​ຣົບ ບໍ່​ເຫັນ​ພ້ອມ​ກັບ​ຂໍ້​ຕົກລົງ​ການ​ຄ້າ EU-MERCOSUR

279 02 ກ.ລ. 2019 ຂ່າວຕ່າງປະເທດ
  ກະສິກອນ​ໃນ​ເອີ​ຣົບ ບໍ່​ເຫັນ​ພ້ອມ​ກັບ​ຂໍ້​ຕົກລົງ​ການ​ຄ້າ EU-MERCOSUR

   ຫຼັງ​ຈາກ​ທີ່​ກຸ່ມ​ຕະຫຼາດ​ຮ່ວມ​ອາ​ເມ​ຣິ​ກາ​ໃຕ້ (MERCOSUR) ທີ່​ປະກອບ​ມີ ບຣາ​ຊີ​​ລ ອາກ​ຊັງ​ຕິນ ປາ​ຣາ​ໄກວ ແລະ​ ອູ​ຣູ​ໄກວ ແລະ ​ສະຫະພາບ​ເອ​ຣົບ (EU) ລົງ​ນາມ​ຂໍ້​ຕົກລົງ​ການ​ຄ້າ​ແບບ​ສອງ​ຝ່າຍ​ເປັນ​ຄັ້ງ​ປະຫວັດສາດ​ເມື່ອ​ວັນ​ທີ 28 ມິຖຸນາ​ທີ່​ຜ່ານ​ມາ​ແລ້ວ ມາ​ໃນ​ວັນ​ທີ 29 ມິຖຸນາ ບັນດາ​ກະສິກອນ​ໃນ​ເອີ​ຣົບ ແລະ​ ນັກ​ເຄື່ອນ​ໄຫວ​ເພື່ອ​ສິ່ງແວດລ້ອມ​ຢູ່​ໃນ​ເອີ​ຣົບ ກໍ​ໄດ້​ກ່າວ​ຄັດຄ້ານ​ຕໍ່​ຂໍ້​ຕົກລົງ​ດັ່ງກ່າວ ໂດຍ​ເຫັນ​ວ່າ​ເອກະສານ​ນີ້ ຈະ​ນຳໄປ​ສູ່​ສະພາບ​ການ​ແກ້ງ​ແຍ່ງ​ທີ່​ບໍ່​ຍຸຕິ​ທຳ ພ້ອມ​ທັງ​ເກີດ​ຜົນ​ຮ້າຍ​ຕາມ​ຫຼັງ​ຢ່າງ​ຮ້າຍ​ແຮງ.

    ທ່ານ ເພກ​ກາ ເພ​ໂຊ​ເນນ ເລຂາທິການ​ຂອງ​ສະຫະພັນ​ກຳມະບານ Copa-Cogeca ຊຶ່ງ​ເປັນ​ຕົວ​ແທນ​ໃຫ້​ແກ່​ກະສິກອນ 23 ລ້ານ​ຄົນ​ທົ່ວ​ເອີ​ຣົບ ລົງ​ພິມ​ຂໍ້ຄວາມ​ຜ່ານ​ສື່​ສັງຄົມ Twitter  ວ່າ​ຂໍ້​ຕົກລົງ​ນີ້ ຈະ​ເຂົ້າ​ສູ່​ໜ້າ​ປະຫວັດສາດ ຄື​ກັບ​ວ່າ​ເປັນ​ເວລາ​ທີ່​ມືດ​ມົນ. ທ່ານ ເພກ​ກາ ເພ​ໂຊ​ເນນ ເຫັນ​ວ່າ​ຂໍ້​ຕົກລົງ​ດັ່ງກ່າວ ຈະ​ສົ່ງເສີມ​ນະໂຍບາຍ​ການ​ຄ້າ​ມາດຖານ​ຊ້ອນ ແລະ​ເຮັດ​ໃຫ້​ຊ່ອງ​ຫວ່າງ​ກວ້າງ​ອອກ ລະຫວ່າງ​ສິ່ງ​ທີ່​ກະສິກອນ​ເອີ​ຣົບ​ຕ້ອງການ ກັບ​ສິ່ງ​ທີ່​ບັນດາ​ຜູ້​ຜະລິດ​ຢູ່​ໃນ MERCOSUR ໃຫ້ການ​ຍອມຮັບ.

    ກ່ອນ​ໜ້າ​ນັ້ນ ເມື່ອ​ວັນ​ທີ 28 ມິຖຸນາ​ທີ່​ຜ່ານ​ມາ EU ແລະ MERCOSUR ໄດ້​ລົງ​ນາມ​ຂໍ້​ຕົກລົງ​ການ​ຄ້າ​ເສລີ ເປັນ​ການ​ສິ້ນ​ສຸດ​ຂະ​ບວນ​ການ​ເຈລະຈາ​ທີ່​ພົບ​ທາງ​ຕັນ ເປັນ​ເວລາ​ເກືອບ 2 ທົດ​ສະ​ວັດ​ທີ່​ຜ່ານ​ມາ. ຂໍ້​ຕົກລົງ​ນີ້ ຈະ​ຊ່ວຍ​ໃຫ້​ສິນຄ້າ​ຂອງ​ສອງ​ຝ່າຍ ເຊື່ອມ​ໂຍງ​ເຂົ້າ​ໄປ​ໃນ​ຕະຫຼາດ​ໜຶ່ງ​ທີ່​ໃຫຍ່​ຫຼວງ ໂດຍ​ມີ​ປະຊາກອນ 800 ລ້ານ​ຄົນ ກວມ​ເອົາ 1/4 ຂອງ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ໂລກ. EU ໃຫ້​ຮູ້​ວ່າ​ເອກະສານ​ດັ່ງກ່າວ  ຈະ​ເຮັດ​ໃຫ້​ບັນດາ​ບໍລິສັດ​ຂອງ​ເອີ​ຣົບ ຫຼີກເວັ້ນ​ພາສີ​ໄດ້​ກວ່າ 4 ຕື້​ເອີ​ໂຣ (ເທົ່າ​ກັບ 4,5 ຕື້​ໂດ​ລາ​ສະຫະລັດ) ໃນ​ແຕ່​ລະ​ປີ.

    ມູນ​ຄ່າ​ການ​ແລກປ່ຽນ​ການ​ຄ້າ​ລະຫວ່າງ EU ກັບ MERCOSUR ໃນ​ປີ 2018 ບັນລຸ​ປະມານ 100 ຕື້​ໂດ​ລາ​ສະຫະລັດ ແລະ​ ຄາດ​ວ່າ​ຈະ​ເພີ່ມ​ຂຶ້ນ​ຢ່າງ​ແຮງ ຫຼັງ​ຈາກ​ທີ່​ຂໍ້​ຕົກລົງ​ດັ່ງກ່າວ ມີ​ຜົນ​ບັງຄັບ​ໃຊ້.

ຂ່າວທີ່ກ່ຽວຂ້ອງ