ສານ​ລັດ​ຖະ​ທຳ​ມະນູນ​ອິນ​ໂດ​ເນ​ເຊຍ ຢືນຢັນ​ຜົນ​ການ​ເລືອກ​ຕັ້ງ​ປະທານາທິບໍດີ

274 02 ກ.ລ. 2019 ຂ່າວຕ່າງປະເທດ
ສານ​ລັດ​ຖະ​ທຳ​ມະນູນ​ອິນ​ໂດ​ເນ​ເຊຍ ຢືນຢັນ​ຜົນ​ການ​ເລືອກ​ຕັ້ງ​ປະທານາທິບໍດີ

   ຕາມ​ຂ່າວສານ​ຊີນ​ຮວາ ເມື່ອ​ຕອນ​ຄ່ຳ​ວັນ​ທີ 27 ມິຖຸນາ​ທີ່​ຜ່ານ​ມາ ສານ​ລັດ​ຖະ​ທຳ​ມະນູນ​ອິນ​ໂດ​ເນ​ເຊຍ ໄດ້​ຕອບ​ໂຕ້​ຄຳ​ຮ້ອງ​ຟ້ອງ​ທັງ​ໝົດ​ຂອງ​ທ່ານ ພຣາ​ໂບ​ໂວ ຊຸ​ບຽນ​ໂຕ ຜູ້​ປະ​ລາ​ໄຊ​ໃນ​ການ​ເລືອກ​ຕັ້ງ​ປະທານາທິບໍດີ​ອິນ​ໂດ​ເນ​ເຊຍ ປີ 2019 ແລະ ​ຢືນຢັນ​ວ່າ ທ່ານ​ໂຈ​ໂກ ວິ​ໂດ​ໂດ ປະທານາທິບໍດີ​ຄົນ​ປັດຈຸບັນ ເປັນ​ຜູ້​ໄດ້​ຮັບ​ໄຊຊະນະ​ໃນ​ການ​ເລືອກ​ຕັ້ງ​ຄັ້ງ​ນີ້.

    ອິນ​ໂດ​ເນ​ເຊຍ ໄດ້​ຈັດການ​ເລືອກ​ຕັ້ງ​ປະທານາທິບໍດີ ໃນ​ວັນ​ທີ 17 ເມສາ ຜ່ານ​ມາ ມາ​ໃນ​ວັນ​ທີ 21 ພຶດສະພາ ຄະນະ​ກຳມະການ​ການ​ເລືອກ​ຕັ້ງ​ອິນ​ໂດ​ເນ​ເຊຍ ປະກາດ​ວ່າ​ທ່ານ​ໂຈ​ໂກ ວິ​ໂດ​ໂດ ໄດ້​ຮັບ​ໄຊຊະນະ​ໃນ​ການ​ເລືອກ​ຕັ້ງ​ດັ່ງກ່າວ ແຕ່​ທິມ​ງານ​ເລືອກ​ຕັ້ງ​ຂອງ​ທ່ານ ພຣາ​ໂບ​ໂວ ຊູ​ບຽນ​ໂຕ ເຫັນ​ວ່າ ການ​ເລືອກ​ຕັ້ງ​ມີ​ການ​ສໍ້​ໂກງ ແລະ ​ບໍ່​ຍຸຕິ​ທຳ. ວັນ​ທີ 24 ພຶດສະພາ ທ່ານ ພຣາ​ໂບ​ໂວ ຊູ​ບຽນ​ໂຕ ໄດ້​ຟ້ອງ​ຕໍ່​ສານ​ລັດ​ຖະ​ທຳ​ມະ​ນຸນ​ຢ່າງ​ເປັນ​ທາງ​ການ ກ່ຽວ​ກັບ​ຜົນ​ການ​ເລືອກ​ຕັ້ງ ໂດຍ​ຮຽກຮ້ອງ​ໃຫ້​ສານ​ຕັດສິນ​ວ່າ​ຜົນ​ການ​ເລືອກ​ຕັ້ງ​ນັ້ນ ບໍ່​ມີ​ຜົນ​ສັກສິດ.

    ຫຼັງ​ຈາກ​ທີ່​ມີ​ການ​ຕັດສິນ​ດັ່ງກ່າວ​ອອກ​ມາ ທ່ານ ປຣາ​ໂບ​ໂວ ຊູ​ບຽນ​ໂຕ ຖະແຫຼງ​ວ່າ​ທ່ານ​ຈະ​ເຄົາລົບ ຕໍ່​ການ​ຕັດສິນ​ຂອງ​ສານ​ລັດ​ຖະ​ທຳ​ມະນູນ ພ້ອມ​ກັນ​ນັ້ນ​ທ່ານ​ກໍ​ໄດ້​ຮຽກຮ້ອງ ໄປ​ຍັງ​ຜູ້​ທີ່​ໃຫ້ການ​ສະໜັບສະໜູນ​ຕົນ​ເອງ ວ່າ​ໃຫ້​ເບິ່ງ​ໄປ​ທີ່​ອະນາຄົດ​ດ້ວຍ​ຄວາມ​ເຕັມ​ໃຈ ແລະ ​ໝັ້ນ​ໃຈ. ທ່ານ ປຣາ​ໂບ​ໂວ ຊູ​ບຽນ​ໂຕ ກ່າວ​ເນັ້ນ​ວ່າ “ຍາມ​ໃດ​ກໍ​ຕ້ອງ​ຄິດ​ເຖິງ​ຜົນ​ປະໂຫຍດ​ທີ່​ໃຫຍ່​ກວ່າ ນັ້ນ​ກໍ​ຄື​ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ປະເທດ ແລະ​ ຂອງ​ລັດ”.

ຂ່າວທີ່ກ່ຽວຂ້ອງ