ເພາະກາຍແຫ່ງຊາດ ຈະຈັດແຂ່ງຂັນ 3 ລາຍການ ຊີງແຊັມທົ່ວປະເທດ

1.315 01 ກ.ລ. 2019 ວົງຈອນກີລາ
ເພາະກາຍແຫ່ງຊາດ ຈະຈັດແຂ່ງຂັນ 3 ລາຍການ ຊີງແຊັມທົ່ວປະເທດ

    ສະ­ຫະ­ພັນ​ເພາະ​ກາຍ​ແຫ່ງ​ຊາດ​ລາວ ຈະ​ຈັດ­ການ​ແຂ່ງ­ຂັນ​ເພາະ​ກາຍ​ຊີງ​ແຊັມ​ທົ່ວ​ປະ­ເທດ ປະ­ຈຳ​ປີ 2019 ຊີງ​ຂັນ​ທ່ານ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຂຶ້ນ​ວັນ​ທີ 24-26 ຕຸ­ລາ 2019 ຢູ່​ສະ­ໂມ­ສອນ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ໂດຍ​ມີ​ລາຍ­ການ​ງັດ​ກ້າມ​ແຮງ​ແຂນ​ຂວາ ຮຸ່ນ​ນ້ຳ­ໜັກ 65 ກິ​ໂລ 75 ກິ​ໂລ 75 ກິ​ໂລ​ທົ່ວ​ໄປ ແລະ ແຮງ​ແຂນ​ຊ້າຍ ຮຸ່ນ​ນ້ຳ­ໜັກ 65 ກິ​ໂລ 75 ກິ​ໂລ ແລະ 75 ກິ​ໂລ​ທົ່ວ​ໄປ ລາຍ­ການ​ເພາະ​ກາຍ​ຊາຍ ຮຸ່ນ​ນ້ຳ­ໜັກ​ບໍ່​ເກີນ 65 ກິ​ໂລ ບໍ່​ເກີນ 75 ກິ​ໂລ ແລະ ລາຍ­ການ​ຊາຍ-ຍິງ ຫຸ່ນ​ງາມ ປະ­ກອບ​ມີ ຊາຍ​ຫຸ່ນ​ງາມ ຄວາມ​ສູງ​ບໍ່​ເກີນ 170 ຊັງ​ຕີ​ແມັດ ແລະ ຊາຍ​ຫຸ່ນ​ງາມ ຄວາມ​ສູງ​ເກີນ 171 ຊັງ​ຕີ​ແມັດ ແລະ ຍິງ​ຫຸ່ນ​ງາມ​ທົ່ວ​ໄປ.

    ທ່ານ ຄຳ​ພະ​ໄພ​ວັນ ວົງ​ໄຊ ຮັກ­ສາ​ການ​ປະ­ທານ​ສະ­ຫະ­ພັນ​ເພາະ​ກາຍ​ແຫ່ງ​ຊາດ​ລາວ ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ຕົນ​ຮູ້­ສຶກ​ເປັນ​ກຽດ​ທີ່​ໄດ້​ຮັບ​ໃຊ້​ຊາດ ກໍ​ຄື​ປະ­ກອບ­ສ່ວນ​ໃນ​ການ​ສົ່ງ­ເສີມ ແລະ ພັດ­ທະ­ນາ​ວົງ​ການ​ກີ­ລາ​ເພາະ​ກາຍ​ລາວ ຕະ­ຫຼອດ​ໄລ­ຍະ​ທີ່​ສະ­ຫະ­ພັນ​ເພາະ​ກາຍ​ແຫ່ງ​ຊາດ​ລາວ​ສ້າງ­ຕັ້ງ​ຂຶ້ນ ພວກ​ເຮົາ​ສາ­ມາດ​ສ້າງ​ຜົນ­ງານ​ໃຫ້​ປະ­ເທດ​ຊາດ​ໄດ້​ຢ່າງ​ຫຼວງ­ຫຼາຍ ໂດຍ​ສະ­ເພາະ​ຜົນ­ງານ​ຫຼ້າ​ສຸດ ນັກ­ກີ­ລາ​ຍິງ​ລາວ ຍາດ​ໄດ້​ອັນ​ດັບ​ທີ 5 ລາຍ­ການ​ຊີງ​ແຊັມ​ອາ​ຊຽນ 2019 ຢູ່ ສ ມຽນ​ມາ ແຕ່​ໜ້າ​ເສຍ­ດາຍ ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ຢູ່​ປະ­ເທດ​ຟີ​ລິບ​ປິນ ທ້າຍ​ປີ​ນີ້ ບໍ່​ສາ­ມາດ​ເຂົ້າ​ຮ່ວມ​ໄດ້ ແຕ່​ຊີ­ເກມ ຄັ້ງ​ທີ 31 ຢູ່ ສສ ຫວຽດ­ນາມ ປີ 2021 ພວກ​ເຮົາ​ຈະ​ສູ້​ຊົນ​ເພື່ອ​ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ໃຫ້​ໄດ້.

    ຍັງ​ມີ​ເວ­ລາ​ອີກ 2 ປີ ພວກ​ເຮົາ​ພ້ອມ​ຈະ​ທຸ່ມ​ເທ​ທັງ​ສະ­ຕິ​ປັນ­ຍາ ແລະ ເຫື່ອ­ແຮງ ເພື່ອ​ໃຫ້​ສາ­ມາດ​ສ້າງ​ນັກ­ກີ­ລາ​ໃຫ້​ມີ​ຄຸນ​ນະ​ພາບ ໂດຍ​ເປົ້າ​ໝາຍ​ທຳ​ອິດ​ຄື​ການ​ຈັດ​ແຂ່ງ­ຂັນ​ເພາະ​ກາຍ​ຊີງ​ແຊັມ​ທົ່ວ​ປະ­ເທດ ປະ­ຈຳ​ປີ 2019 ຊີງ​ຂັນ​ທ່ານ​ລັດ­ຖະ­ມົນ­ຕີ​ກະ­ຊວງ ສສກ ເພື່ອ​ຄັດ​ເລືອກ​ນັກ­ກີ­ລາ​ທີມ​ຊາດ​ລາວ ຈາກ​ນັ້ນ ກໍ​ຈະ​ໄດ້​ນຳ­ພາ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ຢູ່​ພາຍ​ໃນ ແລະ ຕ່າງ­ປະ­ເທດ ໃຫ້​ໄດ້​ຫຼາຍ​ທີ່​ສຸດ ເພື່ອ​ຄັດ​ເລືອກ​ເອົາ​ນັກ­ກີ­ລາ​ເປົ້າ​ໝາຍ ກຽມ​ສົ່ງ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຊີງ​ແຊັມ​ໂລກ​ຢູ່ ສ ເກົາ­ຫຼີ ວັນ​ທີ 5-11 ພະ­ຈິກ 2019.

ຂ່າວທີ່ກ່ຽວຂ້ອງ