ເບີ່ງບ້ານເຂົາເອົາບົດຮຽນ 27-06-2019

907 27 ມິ.ຖ. 2019 ຫົວຂໍ້ຂ່າວອື່ນໆ

 ຄໍ​ລຳ​ປະຈຳ​ວັນ​ນີ້ ຂໍ​ເລີ່ມ​ຈາກ​ຂ່າວ ມະຕິ​ສະພາ ນະຄອນ​ຊານ​ຟຼານ​ຊິ​ສະ​ໂກ ສ ອາ​ເມ​ຣິ​ກາ ທີ່​ຫ້າມ​ການ​ໃຊ້​ເຕັກ​ໂນ​ໂລ​ຊີ​ຈົດ​ຈຳ​ໃບ​ໜ້າ ແລະ ເລື່ອງ​ບັນຫາ​ແຮງ​ງານ​ຟິ​ລິບ​ປິນ ທີ່ ກູ​ເວດ

     ທີ່ ສ ອາ​ເມ​ຣິ​ກາ: ມີ​ຂ່າວ​ຈາກ​ນະຄອນ​ຊານ​ຟຼານ​ຊິ​ສະ​ໂກ ສ ອາ​ເມ​ຣິ​ກາ ວ່າ ສະມາຊິກ​ສະພາ​ຂອງ​ນະຄອນ​ນີ້ ໄດ້​ລົງມະຕິ​ດ້ວຍ​ຄະແນນ 8 ສຽງ​ເຫັນ​ດີ 1 ສຽງ​ຄັດຄ້ານ ແລະ ບໍ່​ອອກສຽງ 2 ສຽງ ເພື່ອ​ຫ້າມ​ໜ່ວຍ​ງານ​ທີ່​ກ່ຽວຂ້ອງ​ນຳ​ໃຊ້​ເຕັກ​ໂນ​ໂລ​ຊີ​ຈື່​ຈຳ​ໃບ​ໜ້າ (ໜັງສືພິມ​ລາວ​ພັດທະນາ ວັນ​ທີ 17 ພຶດສະພາ 2019) ເຫດຜົນ​ທີ່​ນຳໄປ​ສູ່​ການ​ລົງມະຕິ​ຫ້າມ​ໃຊ້​ເຕັກ​ໂນ​ໂລ​ຊີ​ດັ່ງກ່າວ ແມ່ນ​ຍ້ອນ​ວ່າ ເຕັກ​ໂນ​ໂລ​ຊີ​ນີ້​ຍັງ​ຂາດ​ຄວາມ​ແມ່ນ​ຢຳ ແລະ ຄວາມ​ໜ້າ​ເຊື່ອ​ຖື ໂດຍ​ສະເພາະ​ແມ່ນ​ເວລາ​ໃຊ້​ກັບ​ແມ່ຍິງ ແລະ ຜູ້​ທີ່​ມີ​ສີ​ຜິວ​ເຂັ້ມ ນອກຈາກ​ນັ້ນ ມາດ​ຕະການ​ຈື່​ຈຳ​ໃບ​ໜ້າ ຍັງ​ເປັນ​ການ​ລະເມີດ​ຄວາມ​ເປັນ​ສ່ວນ​ຕົວ ແລະ ສິດ​ເສລີພາບ​ຂອງ​ບຸກຄົນ​ໂດຍ​ບໍ່​ຈຳເປັນ  ສ່ວນ​ກຸ່ມ​ທີ່​ສະໜັບສະໜູນ​ໃຫ້​ນຳ​ໃຊ້​ເຕັກ​ໂນ​ໂລ​ຊີ​ຈື່​ຈຳ​ໃບ​ໜ້າ​ນັ້ນ ເຫັນ​ວ່າ​ເຕັກ​ໂນ​ໂລ​ຊີ​ນີ້​ຈະ​ຊ່ວຍ​ຮັບປະກັນ​ຄວາມ​ປອດ​ໄພ​ຂອງ​ສັງຄົມ ແລະ ປະຊາຊົນ ແລະ ເປັນ​ປະໂຫຍດ​ສຳລັບ​ການ​ປາບ​ປາມ​ອາ​ຊະ​ຍາ​ກຳ​ຕ່າງໆ ຂ່າວ​ບອກ​ວ່າ: ເພື່ອ​ໃຫ້​ມະຕິ​ຂອງ​ສະພາ​ນະຄອນ​ກາຍເປັນ​ກົດໝາຍ​ບັງຄັບ​ໃຊ້​ໄດ້​ນັ້ນ ຕ້ອງ​ໄດ້​ຜ່ານ​ການ​ລົງມະຕິ​ເປັນ​ຄັ້ງ​ທີ 2 ແນວໃດ​ກໍ​ດີ ກົດໝາຍ​ຈະ​ກຳນົດ​ຂໍ້​ຍົກເວັ້ນ​ການ​ນຳ​ໃຊ້​ເຕັກ​ໂນ​ໂລ​ຊີ​ຈື່​ຈຳ​ໃບ​ໜ້າ ທີ່​ມີ​ເປົ້າ​ໝາຍ​ຮັກສາ​ຄວາມ​ປອດ​ໄພ​ຕາມ​ສະໜາມ​ບິນ ແລະ ດ່ານ​ທ່າເຮືອ ເພາະ​ເປັນ​ຂອບ​ເຂດ​ຄວາມ​ຮັບຜິດຊອບ​ຂອງ​ລັດຖະບານ​ກາງ ບໍ່​ແມ່ນ​ຂອງ​ລັດຖະບານ​ທ້ອງຖິ່ນ ການ​ລົງມະຕິ​ຂອງ​ສະພາ​ນະຄອນ+ຊານ​ຟຼານ​ຊິ​ສະ​ໂກ​ຄັ້ງ​ນີ້ ສະແດງ​ໃຫ້​ເຫັນ​ຄວາມ​ເອົາໃຈໃສ່​ຂອງ​ທາງ​ການ​ນະຄອນ​ນີ້ ໃນ​ການ​ຮັບ​ຟັງ​ຄວາມ​ຄິດ​ຄຳ​ເຫັນ​ຂອງ​ຊຸມ​ຊົນ.

      ທີ່​ຟິ​ລິບ​ປິນ: ການ​ສົ່ງ​ອອກແຮງ​ງານ ສູ່​ຕະຫຼາດ​ແຮງ​ງານ​ໂລກ ແມ່ນ​ນະໂຍບາຍ​ສຳຄັນ​ໜຶ່ງ​ຂອງ ຟິ​ລິບ​ປິນ ເພື່ອ​ນຳ​ເຂົ້າ​ເງິນຕາ​ຕ່າງປະເທດ ກໍ​ຄື ເພື່ອ​ປັບປຸງ​ຊີວິດ​ການ​ເປັນ​ຢູ່​ທາງ​ດ້ານ​ເສດຖະກິດ​ຂອງ​ຊາວ ຜູ້​ອອກແຮງ​ງານ​ຟິ​ລິບ​ປິນ ແຕ່​ພ້ອມ​ດຽວ​ກັນ​ນັ້ນ ທາງ​ການ​ຂອງ​ປະເທດ​ນີ້​ກໍ​ໄດ້​ເອົາໃຈໃສ່​ຕິດຕາມ​ສະພາບ ການເຄື່ອນໄຫວ​ອອກແຮງ​ງານ​ຂອງ​ຊາວ​ຟິ​ລິບ​ປິນ​ຢູ່​ຕ່າງປະເທດ ແນໃສ່​ຮັບປະກັນ​ສິດ ແລະ ຜົນ​ປະໂຫຍດ​ຂອງ​ພວກ​ເຂົາເຈົ້າ​ບໍ່​ໃຫ້​ຕົກ​ເປັນ​ເຫຍື່ອ​ການ​ຂູດ​ຮີດ​ແຮງ​ງານ ກໍ​ຄື ການ​ເອົາ​ລັດ​ເອົາ​ປຽບ​ຈາກ​ນາຍ​ຈ້າງ​ຕ່າງປະເທດ ແຮງ​ງານ​ຟິ​ລິບ​ປິນ​ທີ່​ສົ່ງ​ອອກ ສ່ວນ​ໃຫຍ່​ແມ່ນ​ເຮັດ​ວຽກ​ເປັນ​ຄົນ​ໃຊ້​ພາຍ​ໃນ​ຄົວ​ເຮືອນ ເຊິ່ງ​ມີ​ຄວາມ​ສ່ຽງ​ສູງ​ໃນ​ການ​ຖືກ​ຂູດ​ຮີດ​ຈາກ​ນາຍ​ຈ້າງ ຕົວຢ່າງ: ກໍລະນີ​ທີ່​ເກີດ​ຂຶ້ນ​ກັບ​ແຮງ​ງານ​ຟິ​ລິບ​ປິນ ທີ່​ປະເທດ​ກູ​ເວດ ຄື ມີ​ຄົນ​ໃຊ້​ຍິງ​ຟິ​ລິບ​ປິນ​ຄົນ​ໜຶ່ງ​ຖືກ​ຂ້າ​ຕາຍ​ໃນ​ເວລາ​ເຮັດ​ວຽກ ເຫດການ​ຄັ້ງ​ນີ້ ເປັນ​ຊະ​ນວນ ໃຫ້​ປະທານາທິບໍດີ​ຟິ​ລິບ​ປິນ​ໄດ້​ອອກ​ຄຳ​ສັ່ງ ໃນ​ວັນ​ທີ 29 ເມສາ ປີ 2018 ຫ້າມ​ສົ່ງ​ອອກແຮງ​ງານ​ຟິ​ລິບ​ປິນ​ໄປ​ກູ​ເວດ​ເປັນ​ການ​ຊົ່ວຄາວ ແຮງ​ງານ​ຟິ​ລິບ​ປິນ​ທີ່​ເຮັດ​ວຽກ​ຢູ່​ປະເທດ​ກູ​ເວດ​ນັ້ນ ມີ​ປະມານ 220.000 ຄົນ ໃນ​ນັ້ນ ເກືອບ 60% ເຮັດ​ວຽກ​ເປັນ​ຄົນ​ໃຊ້​ປະຈຳ​ຄົວ​ເຮືອນ ທາງ​ເບື້ອງ​ປະເທດ​ກູ​ເວດ​ເອງ ກໍ​ສະແດງ​ຄວາມ​ບໍ່​ພໍໃຈ​ທີ່​ມີ​ກໍລະນີ​ພະນັກງານ​ສະຖານທູດ​ຟິ​ລິບ​ປິນ​ຢູ່​ກູ​ເວດ ໄດ້​ຊ່ວຍ​ແຮງ​ງານ​ຟິ​ລິບ​ປິນ​ໂຕນ​ໜີ​ຈາກ​ນາຍ​ຈ້າງ ເຊິ່ງ​ຖື​ວ່າ​ເປັນ​ການ​ສວຍ​ໃຊ້​ສິດທິ​ຂອງ​ສະຖານທູດ​ໄປ​ໃນ​ທາງ​ທີ່​ຜິດພາດ.

ຂ່າວທີ່ກ່ຽວຂ້ອງ