ເບີ່ງບ້ານເຂົາເອົາບົດຮຽນ 26-06-2019

957 27 ມິ.ຖ. 2019 ຫົວຂໍ້ຂ່າວອື່ນໆ

 

ຄໍ​ລຳ​ປະຈຳ​ວັນ​ນີ້ ຂໍ​ເລີ່ມ​ຈາກ​ມາດ​ຕະການ​ຄວບ​ຄຸມ​ຍົນ​ບໍ່​ມີ​ຄົນ​ຂັບ ຢູ່​ຍີ່ປຸ່ນ ແລະ ເລື່ອງ ມາ​ເລ​ເຊຍ ກວດກາ ແລະ ປ້ອງ​ກັນ​ການ​ແຕ່ງດອງ​ເພື່ອ “ຊື້​ຄວາມ​ສະດວກ“

    ທີ່​ຍີ່ປຸ່ນ: ນັບ​ແຕ່​ເດືອນ​ມິຖຸນາ​ປີ​ນີ້​ເປັນຕົ້ນ​ມາ ຍີ່ປຸ່ນ​ໄດ້​ເລີ່ມ​ບັງຄັບ​ໃຊ້​ກົດໝາຍ​ຄວບ​ຄຸມ​ຍົນ​ບໍ່​ມີ​ຄົນ​ຂັບ ທຸກ​ຊະນິດ ນີ້​ເອີ້ນ​ວ່າ: ໂດຼນ (Drone) ເຊິ່ງ​ກ່ອນ​ອື່ນ​ແມ່ນ​ເພື່ອ​ປ້ອງ​ກັນ​ການ​ໂຈມ​ຕີ​ແບບ​ກໍ່​ການ​ຮ້າຍ ໃນ​ໄລຍະ​ມະ​ຫະ​ກຳ​ກີລາ​ໂອ​ລິມ​ປິກ ແລະ ກີລາ ປາ​ຣາ​ລິມ​ປິກ (ສຳລັບ​ນັກກີລາ​ພິການ) ທີ່​ປະເທດ​ນີ້​ຈະ​ເປັນ​ເຈົ້າພາບ​ຈັດ​ໃນ​ປີ 2020 ນອກຈາກ​ນີ້ ກົດໝາຍ​ຍັງ​ຈະ​ເຮັດ​ໜ້າທີ່​ປ້ອງ​ກັນ​ຄວາມ​ໝັ້ນຄົງ​ຂອງ​ຊາດ ບໍ່​ໃຫ້​ມີ ການ​ນຳ​ໃຊ້​ໂດຼນ ເພື່ອ​ເປົ້າ​ໝາຍ​ໂຈມ​ຕີ ຫຼື​ກໍ່​ຄວາມ​ບໍ່​ສະຫງົບ​ພາຍ​ໃນ​ສັງຄົມ ຂ່າວ​ບອກ​ວ່າ: ໃນ​ປີ 2015 ໄດ້​ມີ​ກໍລະນີ​ຊາຍ​ຄົນ​ໜຶ່ງ​ໃຊ້​ໂດຼນ ບັນຈຸ​ຂວດ​ຂີ້​ຊາຍ​ປົນ​ເປື້ອນ​ລັງສີ ບິນ​ໄປ​ຈອດ​ຢູ່​ຫຼັງຄາ​ຕຶກ​ຫ້ອງ​ວ່າ ການ​ນາຍົກລັດຖະມົນຕີ ທີ່​ນະຄອນຫຼວງ​ໂຕ​ກຽວ ຊາຍ​ຜູ້​ກໍ່​ເຫດ​ໄດ້​ຖືກ​ສານ​ຕັດສິນ​ຈຳ​ຄຸກ​ເປັນ​ເວລາ 2 ປີ ເວົ້າ​ໄດ້​ວ່າ: ເຫດການ​ໃນ​ຄັ້ງ​ນັ້ນ​ໄດ້​ເລັ່ງ​ທວງ​ໃຫ້​ມີ​ກົດໝາຍ​ຄວບ​ຄຸມ​ຍົນ​ແບບ​ບໍ່​ມີ​ຄົນ​ຂັບ​ສະບັບ​ປັດຈຸບັນ ກົດໝາຍ​ອອກ​ໃໝ່​ສະບັບ​ນີ້ ກຳນົດ​ຫ້າມ​ໂດຼນ​ບິນ​ຜ່ານ​ສະຖານທີ່​ສຳຄັນ​ທາງ​ລັດ​ຖະ​ການ ແລະ ຄວາມ​ໝັ້ນ ຄົງ ເຊັ່ນ: ລາຊະ​ວັງ​ເຈົ້າ​ຈັກກະພັດ ສຳນັກງານ​ນາຍົກລັດຖະມົນຕີ ບັນດາ​ໂຮງງານ​ໄຟຟ້າ​ພະລັງ​ນິວ​ເຄຼຍ ສະຖານທີ່​ທາງ​ທະຫານ​ຍີ່ປຸ່ນ ແລະ ກອງ​ກຳລັງ​ຂອງ ສ ອາ​ເມ​ຣິ​ກາ ປະຈຳ​ຍີ່ປຸ່ນ ສຳລັບ​ໄລຍະ​ມະ​ຫະ​ກຳ ກີລາ​ໂອ​ລິມ​ປິກ-ປາ​ຣາ​ລິມ​ປິກ​ນັ້ນ ກໍ​ໄດ້​ກຳນົດ​ຫ້າມ​ໂດຼນ​ບິນ​ຜ່ານ​ສະຖານທີ່​ແຂ່ງຂັນ​ກີລາ ແລະ ເຂດ​ອ້ອມແອ້ມ​ສະໜາມ​ບິນ​ສຳຄັນ​ຕ່າງໆ ແຕ່​ກໍ​ມີ​ລະ​ນີ​ຍົກເວັ້ນ​ສຳລັບ​ໂດຼນ ຂອງ​ອົງການ​ສື່​ມວນ​ຊົນ​ທີ່​ເຮັດ​ໜ້າທີ່​ບັນທຶກ​ພາບ​ການ​ແຂ່ງຂັນ​ກີລາ.

     ທີ່​ມາ​ເລ​ເຊຍ: ເຫດການ​ນີ້​ເກີດ​ຂຶ້ນ​ແຕ່​ເດືອນ​ມັງກອນ​ປີ​ນີ້ ຢູ່​ມາ​ເລ​ເຊຍ ແຕ່​ຄວນ​ເບິ່ງ​ໄວ້​ເປັນ​ບົດຮຽນ ເພາະ​ເປັນ​ບັນຫາ​ຫຼອກ​ລວງ​ທີ່​ແຜ່​ລະບາດ​ຫຼາຍ​ພໍ​ສົມຄວນ ແລະ ຢູ່​ບ້ານ​ເຮົາ​ກໍ​ມີ ຕົວຢ່າງ: ເລື່ອງ​ມີ​ຢູ່​ວ່າ ເຈົ້າ​ໜ້າທີ່​ກວດກາ​ຄົນ​ເຂົ້າ​ເມືອງ​ໄດ້​ຕິດຕາມ​ກຸ່ມ​ຜູ້​ຊາຍ ສັນຊາດ​ປາ​ກິດ​ສະຖານ ທີ່​ແຕ່ງດອງ​ກັບ​ຍິງ ມາ​ເລ​ເຊຍ ພຽງ​ເພື່ອ​ໃຫ້​ໄດ້​ມີ​ໂອກາດ​ຢູ່​ເຄື່ອນ​ໄຫວ​ທຸລະ​ກິດ​ດົນໆ ທາງ​ການ​ມາ​ເລ​ເຊຍ​ເອີ້ນ​ການ​ແຕ່ງດອງ ລັກສະນະ​ນີ້​ວ່າ: ການ​ແຕ່ງດອງ​ເພື່ອ “ຊື້​ຄວາມ​ສະດວກ“ ທ່ານ ອາຊາ ອັບ​ດູນ​ຮາ​ມິດ ອຳນວຍ​ການ​ຫ້ອງ ການ​ກວດກາ​ຄົນ​ເຂົ້າ​ເມືອງ​ໄດ້​ໃຫ້​ຮູ້​ໃນ​ເວລາ​ນັ້ນ​ວ່າ ຜ່ານ​ມາ​ທາງ​ຫ້ອງການ​ໄດ້​ກວດ​ພົບ​ວ່າ ມີ​ຊາຍ​ຊາວ​ປາ​ກິດ​ສະຖານ ຈຳນວນ 400 ຄົນ ໄດ້​ແຕ່ງດອງ​ກັບ​ຍິງ​ມາ​ເລ​ເຊຍ ຢູ່​ລັດ ເກ​ລັນ​ຕັນ ແລະ ສາມາດ​ຢຶດ ເອກະສານ​ເດີນທາງ​ຈຳນວນ 10-15 ສະບັບ ຂອງ​ຊາຍ​ປາ​ກິດ​ສະຖານ ທີ່​ມີ​ໃບຢັ້ງຢືນ​ການ​ແຕ່ງດອງ​ພຽງ​ຊື່ ແຕ່​ໃນ​ຕົວ​ຈິງ​ພວກ​ເຂົາ​ບໍ່​ໄດ້​ຢູ່​ນຳ​ຝ່າຍ​ເປັນ​ເມຍ ທ່ານ​ຜູ້ອຳນວຍການ​ຍັງ​ໃຫ້​ຮູ້​ວ່າ: ມັນ​ເປັນ​ເລື່ອງ ຜິດ​ປົກກະຕິ​ທີ່​ຜູ້​ຊາຍ​ເຫຼົ່າ​ນີ້ ເຊິ່ງ​ມີ​ອາຍຸ​ລະຫວ່າງ 20-30 ປີ ແຕ່​ຍ້ອນ​ແຕ່ງ​ເອົາ​ແມ່ຍິງ​ອາຍຸ​ແກ່​ກວ່າ 50 ປີ ມາ​ເປັນ​ເມຍ ນີ້​ມັນ​ຊີ້​ອອກ​ວ່າ​ພວກ​ເຂົາ​ແຕ່ງດອງ​ເພື່ອ​ປົກ​ປິດ​ແຜນ​ຕ້ອງການ​ຢູ່​ເຄື່ອນ​ໄຫວ​ທຸລະ​ກິດ​ໃຫ້​ໄດ້ ດົນໆ ຊາຍ​ປາ​ກິດ​ສະຖານ ໃນ​ລັດ​ກາລັນ​ຕັນ​ຂອງ​ມາ​ເລ​ເຊຍ​ນັ້ນ ດຳເນີນ​ທຸລະ​ກິດ​ຂາຍຍ່ອຍ​ເຄື່ອງນຸ່ງ​ຫົ່ມ ເຄື່ອງໃຊ້​ສອຍ ແລະ ຜ້າ​ພົມ​ເປັນ​ສ່ວຍ​ໃຫຍ່ ໃນຕໍ່ໜ້າ ທາງ​ຫ້ອງການ​ກວດກາ​ຄົນ​ເຂົ້າ​ເມືອງ​ຈະ​ຄວບ​ຄຸມ ຢ່າງ​ເຄັ່ງ​ຄັດ ຢູ່ 3 ດ່ານ ເພື່ອ​ກຳ​ຈັດການ​ລັກລອບ​ເຂົ້າ​ເມືອງ​ຢ່າງ​ຜິດ​ກົດໝາຍ​ຂອງ​ຄົນ​ຕ່າງປະເທດ.

           

           

           

 

ຂ່າວທີ່ກ່ຽວຂ້ອງ