ເບີ່ງບ້ານເຂົາເອົາບົດຮຽນ 25-06-2019

873 27 ມິ.ຖ. 2019 ຫົວຂໍ້ຂ່າວອື່ນໆ

    ມື້ນີ້ ມີ​ສອງ​ເລື່ອງ​ມາ​ສະເໜີ ຄື:  ມາດ​ຕະການ​ລົງໂທດ​ຜູ້​ດື່ມ​ເຫຼົ້າ​ແລ້ວ​ຂັບ​ລົດ​ຢູ່​ອົດ​ສະ​ຕຣາ​ລີ ແລະ ເລື່ອງ​ທາງ​ການ​ອິນ​ໂດ​ເນ​ເຊຍ ປິດ​ອຸທິຍານ​ທ່ອງ​ທ່ຽວ ເພື່ອ​ຟັກ​ຟື້ນ​ມັງກອນ​ໂກ​ໂມ​ໂດ

ທີ່​ອົດ​ສະ​ຕຣາ​ລີ:  ມີ​ຂ່າວ​ທີ່​ຟັງ​ບໍ່​ມ່ວນ​ສຳລັບ​ພວກ​ດື່ມ​ແລ້ວ​ຂັບ ໃນ​ລັດ​ນິວ​ຊາວ​ແວວ​ຂອງ​ອົດ​ສະ​ຕຣາ​ລີ ເພາະວ່າ​ທາງ​ການ​ຂອງ​ລັດ​ນີ້​ໄດ້​ປະກາດ​ໃຊ້​ກົດ​ເຫຼັກ ເພື່ອ​ປັບໄໝ​ຜູ້​ດື່ມ​ເຫຼົ້າ​ແລ້ວ​ຂັບ​ລົດ ເຖິງ​ແມ່ນ​ວ່າ​ຜູ້ກ່ຽວ​ຈະ​ມີ​ລະດັບ​ຄວາມ​ເຂັ້ມ​ຂຸ້ນ​ຂອງ​ທາດ​ເຫຼົ້າ​ຕ່ຳ​ສຸດ​ກໍ​ຕາມ ມາດ​ຕະການ​ເດັດຂາດ​ທີ່​ວ່າ​ນີ້ ໄດ້​ປະກາດ​ໃຊ້​ນັບ​ແຕ່ ຄ່ຳ​ຄືນ​ຂອງ​ວັນ​ທີ 20 ພຶດສະພາ ປີ​ນີ້​ເປັນຕົ້ນ​ມາ ຈຳນວນ​ເງິນ​ປັບ​ໃໝ​ຕໍ່​ຜູ້​ລະເມີດ​ນັ້ນ​ສູງ​ເກືອບ​ຈຸ​ເມກ ຄື 561 ໂດ​ລາ​ອົດ​ສະ​ຕຣາ​ລີ ຖ້າ​ກວດ​ພົບ​ວ່າ​ຜູ້​ຂັບ​ຂີ່​ຄົນ​ໃດ​ມີ​ຄວາມ​ເຂັ້ມ​ຂຸ້ນ​ຂອງ​ທາດ​ເຫຼົ້າ​ໃນ​ຮ່າງກາຍ ພຽງ 0,05 ມີ​ລີກ​ຣາມ/ລິດ ມາດຕະຖານ​ຄວາມ​ເຂັ້ມ​ຂຸ້ນ​ນີ້​ໄດ້​ນຳ​ໃຊ້​ຢູ່​ລັດ​ນີ້​ມາ​ແລ້ວ ເປັນ​ເວລາ 38 ປີ ສິ່ງ​ທີ່​ໃໝ່ ກໍ​ຄື​ການ​ເພີ່ມ​ຈຳນວນ​ເງິນ​ປັບ​ໃໝ ນອກຈາກ​ການ​ລົງໂທດ​ດ້ວຍ​ຮູບ​ການ​ປັບ​ໃໝ​ແລ້ວ ຜູ້​ຂັບ​ຂີ່​ທີ່​ລະເມີດ​ກົດ ລະບຽບ​ເຫຼັກ​ນີ້​ແລ້ວ ຍັງ​ຈະ​ຖືກ ແຂວນ (ຢຶດ) ໃບ​ຂັບ​ຂີ່​ເປັນ​ເວລາ 3 ເດືອນ ອີກ​ດ້ວຍ.

     ທີ່​ອິນ​ໂດ​ເນ​ເຊຍ: ມີ​ຂ່າວ​ແຕ່​ຕົ້ນ​ປີ​ນີ້​ວ່າ ທາງ​ການ​ອິນ​ໂດ​ເນ​ເຊຍ​ໄດ້​ສັ່ງ​ປິດ​ອຸດ​ທິ​ຍານ​ແຫ່ງ​ຊາດ ມັງກອນ ໂກ​ໂມ​ໂດ ເພື່ອ​ອະນຸ​ຮັກ​ສັດ​ປະເພດ​ນີ້​ໃຫ້​ຍືນ​ຍົງ ມັງກອນ​ໂກ​ໂມ​ໂດ ເປັນ​ສັດ​ເລືອ​ຄານ​ສຸດ​ແສນ​ປະຫຼາດ​ທີ່​ຍັງ​ເຫຼືອ​ຢູ່​ອິນ​ໂດ​ເນ​ເຊຍ​ບ່ອນ​ດຽວ​ໃນ​ໂລກ ວ່າ​ກັນ​ວ່າ ມັງກອນ​ຊະນິດ​ນີ້ (KOmodo dragon)ສືບ​ສາຍ​ພັນ​ມາ​ແຕ່​ຍຸກ​ໄດ​ໂນ​ເສົາ​ພຸ້ນ ມັນ​ມີ​ນ້ຳໜັກ​ໂຕ​ຮອດ 150 ກິ​ໂລ ຍາວ 3-4 ແມັດ ແລະ ສາມາດ​ກິນ​ອາຫານ ພາບ​ດຽວ ທີ່​ມີ​ນ້ຳໜັກ​ປະມານ 80% ຂອງ​ນ້ຳໜັກ​ໂຕ​ຂອງ​ມັນ ເຫດຜົນ​ທີ່​ຕ້ອງ​ປິດ​ບໍລິການ​ບໍ່​ໃຫ້​ນັກ​ທ່ອງ​ທ່ຽວ ເຂົ້າ​ຊົມ​ອຸດ​ທິ​ຍານ​ມັງກອນ ໂກ​ໂມ​ໂດ ຍ້ອນ​ວ່າ ໃນ​ໄລຍະ​ຫຼັງໆ​ມາ​ນີ້ ໂກ​ໂມ​ໂດ ຊຸດ​ເກີດ​ໃໝ່​ນັ້ນ ມີ​ຕົນ​ໂຕ​ນ້ອຍ ຈ່ອຍ​ຜອມ ບໍ່​ໄດ້​ຂະໜາດ​ມາດຕະຖານ​ເດີມ ເຊິ່ງ​ທາງ​ຄະນະ​ຮັບຜິດຊອບ​ອຸດ​ທິ​ຍານ​ບອກ​ວ່າ ມີ​ສາເຫດ ມາ​ຈາກ​ການ​ຂາດແຄນ​ອາຫານ ອາຫານ​ຕົ້ນຕໍ​ຂອງ​ມັງກອນ​ໂກ​ໂມ​ໂດ ແມ່ນ​ຊີ້ນ​ກວາງ ແຕ່​ເນື່ອງ​ຈາ​ກວ່າ ໄດ້​ມີ​ຂະ​ບວນ​ລັກລອບ​ລ່າ​ກວາງ​ຊະຊາຍ ຈຶ່ງ​ເຮັດ​ໃຫ້​ພົນລະເມືອງ​ກວາງ​ບົກ​ແຫ້ງ​ລົງ ເປັນ​ຜົນ​ໃຫ້​ຂາດ​ຊີ້ນ​ກວາງ ມາ​ລ້ຽງ​ມັງກອນ​ໂກ​ໂມ​ໂດ​ໃນ​ໄລຍະ​ປິດ​ໃຫ້​ບໍລິການ​ນີ້ ທາງ​ຄະນະ​ຮັບຜິດຊອບ​ອຸດ​ທິ​ຍານ​ຈະ​ໄດ້​ປັບປຸງ​ສະພາບ​ແວດ​ລ້ອມ​ທີ່ຢູ່​ຂອງ​ມັງກອນ​ຄືນໃໝ່ ຄື ຕ້ອງ​ຮັບປະກັນ​ໃຫ້​ມີ​ຊີ້ນ​ກວາງ​ພຽງພໍ ເພາະວ່າ​ຖ້າ​ຫາກ​ຍັງ​ມີ​ບັນຫາ​ຂາດແຄນ​ອາຫານ ນອກຈາກ​ບັນດາ​ມັງກອນ​ໂກ​ໂມ​ໂດ​ເກີດ​ໃໝ່ ຈະ​ບໍ່​ໃຫຍ່​ໄດ້​ຊັດ​ສ່ວນ​ເດີມ​ແລ້ວ ພວກ​ມັນ​ຍັງ​ອາດ​ກິນ​ກັນ​ເອງ​ເປັນ​ອາຫານ ຖ້າ​ເປັນ​ຄື​ແນວ​ນັ້ນແລ້ວ ມັງກອນ​ທີ່​ມີ​ຢູ່​ແຫ່ງ​ດຽວ​ໃນ​ໂລກ ກໍ​ຈະ​ສູນພັນ​ໄປ​ຢ່າງ​ອັດຕະໂນມັດ ການ​ອະນຸ​ຮັກ​ພັນ​ສັດ ພັນ​ພືດ​ທີ່​ຫາ​ຍາກ​ນັ້ນ ມັນ​ມີ​ຕ່ອງ​ໂສ້​ຕິດ​ພັນ​ກັບ​ການ ປົກ​ປັກ​ຮັກສາ​ສິ່ງແວດລ້ອມ ແລະ ຊີວະ​ນາໆພັນ ໂດຍ​ລວມ​ນີ້ ຄື​ບົດຮຽນ​ຈາກ​ອິນ​ໂດ​ເນ​ເຊຍ.

ຂ່າວທີ່ກ່ຽວຂ້ອງ