ຂ່າວຫຼ້າສຸດ

ເປີດ​ນຳ​ໃຊ້​ລະບົບ​ພາສີ​ປະຕູ​ດຽວ​ແຫ່ງ​ຊາດ

825 26 ມິ.ຖ. 2019 ຂ່າວໜ້າ​ໜຶ່ງ
ເປີດ​ນຳ​ໃຊ້​ລະບົບ​ພາສີ​ປະຕູ​ດຽວ​ແຫ່ງ​ຊາດ

    ພິທີ​ເປີດ​ນຳ​ໃຊ້​ລະບົບ​ແຈ້ງ​ພາສີ​ປະຕູ​ດຽວ​ແຫ່ງ​ຊາດ (LNSW) ຢູ່​ສາງ​ຊີ​ວາຍ​ທ່າ​ນາ​ແລ້ງ ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 24 ມິຖຸນາ ຜ່ານ​ມາ ໂດຍ​ມີ​ທ່ານ ບຸນ​ໂຈມ ອຸບົນ​ປະເສີດ ຮອງ​ລັດຖະມົນຕີ​ກະຊວງ​ການ​ເງິນ ມີ​ບັນດາ​ຫົວໜ້າ-ຮອງ​ຫົວໜ້າ​ກົມ​ພາສີ ຕາງໜ້າ​ທະນາຄານ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ເອ​ລີ ຊາ​ວາ​ຢາ ປະທານ​ບໍລິສັດ​ບີ​ໂຣ​ເວີ​ຣິ​​ຕັສ (ບີ​ວັກ) ກ່າວ​ວ່າ: ​ສປປ ລາວ ໄດ້​ມີ​ຄວາມ​ພ້ອມ​ເປີດ​ນຳ​ໃຊ້​ລະບົບ​ແຈ້ງ​ພາສີ​ປະຕູ​ດຽວ​ແຫ່ງ​ຊາດ ການ​ເປີດ​ນຳ​ໃຊ້​ລະບົບ​ນີ້ ເປັນ​ຂີດ​ໝາຍ​ສຳຄັນ​ດ້ານ​ຍຸດ​ທະ​ສາດ​ການ​ນຳ​ໃຊ້​ລະບົບ​ເອ​ເລັກ​ໂຕຣ​ນິກ ເພື່ອ​ຫັນ​ເປັນ​ທັນ​ສະໄໝ​ຂອງ​ລັດຖະບານ​ລາວ ເພື່ອ​ສ້າງ ແລະ ປັບປຸງ​ໃຫ້​ລະບົບ​ການ​ບໍລິການ​ຂອງ​ລັດ ແກ່​ປະຊາຊົນ​ພາຍ​ໃນ​ປະເທດ​ມີ​ຄວາມ​ໂປ່ງ​ໃສ ແລະ ມີ​ປະ​ສິດທິ​ຜົນ ລະບົບ LNSW ເປັນ​ລະບົບ​ເອ​ເລັກ​ໂຕຣ​ນິກ​ທີ່​ຊ່ວຍ​ອຳນວຍ​ຄວາມ​ສະດວກ​ໃຫ້​ພາກ​ລັດ ແລະ ເອກະ​ຊົນ ໄດ້​ມີ​ການ​ແລກປ່ຽນ​ຂໍ້​ມູນ​ຂ່າວສານ​ທີ່​ປອດ​ໄພ ແລະ ເປັນ​ລະບົບ​ທີ່​ອຳນວຍ​ຄວາມ​ສະດວກ​ໃຫ້​ຂະ​ບວນ​ການ​ຂົນສົ່ງ​ທີ່​ກ່ຽວຂ້ອງ ໂດຍ​ຜ່ານ​ການ​ປ້ອນ​ຂໍ້​ມູນ​ລົງ​ໄວ້​ໃນ​ຈຸດ​ດຽວ ລະບົບ​ນີ້​ຈະ​ຖືກ​ນຳ​ໃຊ້​ໃນ​ການ​ບໍລິຫານ​ຈັດການ​ວຽກ​ງານ​ການ​ນຳ​ເຂົ້າ ສົ່ງ​ອອກ ແລະ ການ​ຂົນສົ່ງ​ສິນຄ້າ​ຢູ່​ດ່ານ​ພາສີ​ສາກົນ ແລະ ສະໜາມ​ບິນ​ສາກົນ​ຕ່າງໆ ເຊິ່ງ​ຈະ​ເລີ່ມ​ຕົ້ນ​ຈັດ​ຕັ້ງ​ປະຕິບັດ​ໃນ​ການ​ນຳ​ເຂົ້າ​ພາຫະນະ​ຢູ່​ດ່ານ​ພາສີ​ທ່າ​ນາ​ແລ້ງ​ກ່ອນ ເຊິ່ງ​ບໍ່​ພຽງ​ແຕ່​ນຳ​ໃຊ້​ເພື່ອ​ອຳນວຍ​ຄວາມ​ສະດວກ​ໃຫ້ການ​ດຳເນີນ​ວຽກ​ງານ​ການ​ຄ້າ ແຕ່​ສາມາດ​ນຳ​ໃຊ້​ໃນ​ການ​ຕິດຕາມ​ທຸກ​ການ​ນຳ​ເຂົ້າ-ສົ່ງ​ອອກ​ສິນຄ້າ ແລະ ການ​ຂົນສົ່ງ​ຕະຫຼອດ 24 ຊົ່ວໂມງ.

    ປັດຈຸບັນ ມີ​ການ​ລົງທະບຽນ​ຜູ້ນຳ​ໃຊ້​ພາກ​ເອກະ​ຊົນ​ແລ້ວ 186 ລະຫັດ ແລະ ພາກ​ລັດ 298 ລະຫັດ ຜູ້​ໃຊ້​ພາກ​ເອກະ​ຊົນ​ຈາກ 37 ບໍລິສັດ​ນຳ​ເຂົ້າ​ໄດ້​ຮັບ​ການ​ເຝິກອົບຮົມ ການ​ນຳ​ໃຊ້​ລະບົບ​ເປັນ​ທີ່​ຮຽບ​ຮ້ອຍ​ແລ້ວ ແລະ ເພື່ອ​ໃຫ້​ຜູ້ນຳ​ໃຊ້​ສາມາດ​ນຳ​ໃຊ້​ໄດ້​ດີ​ຂຶ້ນ ພວກ​ເຮົາ​ມີ​ສູນ​ບໍລິການ​ໃຫ້ການ​ຊ່ວຍເຫຼືອ​ການ​ນຳ​ໃຊ້​ລະບົບ ໂດຍ​ຜ່ານ​ອີ​ເມວ ໂທລະສັບ ອິນ​ເຕີ​ເນັດ ແລະ ການ​ເຂົ້າ​ມາ​ສອບ​ຖາມ​ຂໍ້​ມູນ​ຢູ່​ທີ່​ບໍລິສັດ​ພັດທະນາ​ລະບົບ ແຈ້ງ​ພາສີ​ປະຕູ​ດຽວ​ແຫ່ງ​ຊາດ ເຊິ່ງ​ຜົນສຳເລັດ​ຄັ້ງ​ນີ້ ຍ້ອນ​ການ​ຊີ້​ນຳ-ນຳພາ​ຈາກ​ຄະນະ​ນຳ​ກະຊວງ​ການ​ເງິນ ກະຊວງ​ອຸດສາຫະກຳ-ການ​ຄ້າ ແລະ ກະຊວງ​ໂຍທາ​ທິ​ການ ແລະ ຂົນສົ່ງ.

ຂ່າວທີ່ກ່ຽວຂ້ອງ