ສ້າງ ​ສປປ ລາວ ໃຫ້​ບັນລຸ​ປັດ​ໄຈ​ພື້ນຖານ​ໃນ​ການ​ຫັນ​ເປັນ​ດີ​ຈີ​ຕອນ​ຢ່າງຮອບດ້ານ

663 26 ມິ.ຖ. 2019 ຂ່າວໜ້າ​ໜຶ່ງ
ສ້າງ ​ສປປ ລາວ ໃຫ້​ບັນລຸ​ປັດ​ໄຈ​ພື້ນຖານ​ໃນ​ການ​ຫັນ​ເປັນ​ດີ​ຈີ​ຕອນ​ຢ່າງຮອບດ້ານ

    ກະຊວງ​ໄປສະນີ ໂທລະ​ຄົມມະນາຄົມ ແລະ ການ​ສື່ສານ (​ປທສ) ຮ່ວມ​ກັບ​ສະມາຄົມ​ການ​ຄ້າ​ໄອ​ຊີ​ທີ ລາວ ເປີດ​ງານ​ວາງສະແດງ​ເຕັກ​ໂນ​ໂລ​ຊີ​ສື່ສານ​ຂໍ້​ມູນ​ຂ່າວສານ ປະຈຳ​ປີ 2019 (Lao ICT EXPO 2019) ພາຍ​ໃຕ້​ຄຳ​ຂວັນ “ສ້າງ ແລະ ສົ່ງເສີມ​ການ​ຫັນ​ເປັນ​ດີ​ຈີ​ຕອນ​ໃນ​ລາວ” ຂຶ້ນ​ວັນ​ທີ 25 ມິຖຸນາ 2019 ຢູ່​ໂຮງແຮມ​ດອນ​ຈັນ​ພຣາ​ເລດ ໂດຍ​ມີ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ທ່ານ ທັນ​ສະໄໝ ກົມ​ມະ​ສິດ ລັດຖະມົນຕີ​ກະຊວງ ​ປທສ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ທັນ​ສະໄໝ ກົມ​ມະ​ສິດ ກ່າວ​ວ່າ: Lao ICT EXPO 2019 ຈະ​ດຳເນີນ​ແຕ່​ວັນ​ທີ 26-30 ມິຖຸນາ 2019 ໂດຍ​ມີ​ຫ້ອງ​ວາງສະແດງ​ຫຼາຍ​ກວ່າ 54 ຫ້ອງ ຈາກ​ຜູ້​ປະກອບ​ການ​ດ້ານ​ໂທລະ​ຄົມມະນາຄົມ-ໄອ​ຊີ​ທີ ພາຍ​ໃນ ແລະ ຕ່າງປະເທດ ທີ່​ໄດ້​ນຳ​ເອົາ​ຜະລິດ​ຕະ​ພັນ​ອອກ​ໃໝ່ ແລະ ທັນ​ສະໄໝ ກ່ຽວ​ກັບ​ລະບົບ​ສື່ສານ​ໂທລະ​ຄົມ ລະບົບ​ໂປ​ແກຣມ​ຮັບ​ໃຊ້​ການ​ຫັນ​ເປັນ​ດີ​ຈີ​ຕອນ ລະບົບ​ການ​ປ້ອງ​ກັນ​ຄວາມ​ປອດ​ໄພ​ດ້ານ​ໄຊ​ເບີ ເຄື່ອງ​ອຸປະກອນ ແລະ ໄອ​ຊີ​ທີ​ຕ່າງໆ ພ້ອມ​ນີ້ ກໍ​ມີ​ການວາງສະແດງ​ຂອງ​ບັນດາ​ກະຊວງ ອົງການ ບໍລິສັດ ກ່ຽວ​ກັບ​ຜົນສຳເລັດ​ຂອງ​ການ​ນຳ​ໃຊ້​ໄອ​ຊີ​ທີ ໃນ​ວຽກ​ງານ​ຕ່າງໆ ພາຍ​ໃນ​ງານ​ຍັງ​ຈະ​ມີ​ສຳ​ມະ​ນາ​ລະດັບ​ສາກົນ ກອງ​ປະຊຸມ​ປຶກສາ​ຫາລື​ການ​ຮ່ວມ​ມື​ພັດທະນາ​ໄອ​ຊີ​ທີ ຂອງ​ປະເທດ​ລຸ່ມ​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ ແລະ ສຳ​ມະ​ນາ​ວິຊາ​ການ​ສະເພາະ​ດ້ານ ເຊັ່ນ: ການ​ບໍລິຫານ​ລັດ​ດ້ວຍ​ເອ​ເລັກ​ໂຕຣ​ນິກ ການ​ນຳ​ໃຊ້​ໄອ​ຊີ​ທີ​ໃນ​ຂະແໜງ​ສຶກ​ສາ ຂະແໜງການ​ເງິນ ບັນຫາ​ຄວາມ​ປອດ​ໄພ​ຂອງ​ສື່​ສັງຄົມ​ອອນ​ລາຍ ການ​ຄ້າ ແລະ ການ​ດຳເນີນ​ທຸລະ​ກິດ​ດ້ານ​ໄອ​ຊີ​ທີ ເຊິ່ງ​ເປັນ​ເວທີ​ສຳຄັນ​ໃນ​ການ​ສ້າງ​ໂອກາດ​ໃຫ້​ຜູ້​ປະກອບ​ການ ຜູ້​ຜະລິດ ຜູ້​ບໍລິການ ຜູ້​ຊົມໃຊ້ ແລະ ຜູ້​ຄຸ້ມ​ຄອງ​ໄອ​ຊີ​ທີ ໄດ້​ພົບ​ປະ​ແລກປ່ຽນ​ບົດຮຽນ ຄວາມ​ຮູ້-ຄວາມ​ເຂົ້າໃຈ ແລະ ສ້າງ​ການ​ພົວພັນ​ຮ່ວມ​ມື​ດ້ານ​ການ​ຄ້າ ແລະ ການ​ພັດທະນາ​ຮ່ວມ​ກັນ ພິເສດ​ຍັງ​ຈະ​ມີ​ການ​ຄັດ​ເລືອກ​ລາງວັນ​ລາວ​ໄອ​ຊີ​ທີ 2019 ເພື່ອ​ເປັນ​ຕົວ​ແທນ​ຂອງ ​ສປປ ລາວ ສົ່ງ​ເຂົ້າ​ແຂ່ງຂັນ​ກັບ​ປະເທດ​ສະມາຊິກ​ອາ​ຊຽນ ເພື່ອ​ຊີງ​ລາງວັນ ASEAN ICT Award 2019 ຕື່ມ​ອີກ.

    ປັດຈຸບັນ ເຕັກ​ໂນ​ໂລ​ຊີ​ການ​ສື່ສານ​ຂໍ້​ມູນ​ຂ່າວສານ (ICT) ມີ​ບົດບາດ​ສູງ​ໃນ​ການ​ເຂົ້າ​ມາ​ປ່ຽນ​ວິຖີ​ຊີວິດ  ວິທີ​ການ​ເຮັດ​ວຽກ​ຂອງ​ອົງ​ກອນ ກໍ​ຄື ຂອງ​ມະນຸດ ເຊັ່ນ: ລະບົບ 5G ລະບົບ​ຄຣາວ​ຄອມ​ພິວ​ເຕີ ແລະ ນະ​ວັດຕະ​ກຳ ເຊັ່ນ: ລະບົບ​ຂໍ້​ມູນ​ໃຫຍ່ ແລະ ປັນຍາ​ປະດິດ ​ສປປ ລາວ ເຖິງ​ຈະ​ບໍ່​ທັນ​ມີ​ຄວາມ​ກ້າວໜ້າ​ສູງ ຄື​ກັບ​ບັນດາ​ປະເທດ​ພັດທະນາ​ຕ່າງໆ ແຕ່​ກໍ​ມີ​ບາດກ້າວ​ການ​ເຕີບ​ໃຫຍ່​ຂະຫຍາຍຕົວ​ພໍ​ສົມຄວນ ສະແດງ​ອອກ​ການ​ນຳ​ໃຊ້​ໂທລະສັບ​ມື​ຖື ແລະ ອິນ​ເຕີ​ເນັດ ທີ່​ເປັນ​ຕົວ​ຊີ້​ວັດ​ພື້ນຖານ​ຂອງ​ການ​ພັດທະນາ ICT ເຊິ່ງ​ໄດ້​ຂະຫຍາຍຕົວ​ຈາກ 5% ໃນ​ປີ 2010 ເປັນ 48% ໃນ​ປີ 2018 ຜູ້​ປະກອບ​ດ້ານ​ໄອ​ຊີ​ທີ​ເພີ່ມ​ຂຶ້ນ 7% ຕໍ່​ປີ ໂດຍ​ສະເພາະ ຜູ້​ປະກອບ​ການ​ສະ​ຕາ​ອັບ ມີ​ການ​ເພີ່ມ​ຂຶ້ນ​ຢ່າງ​ວ່ອງໄວ ກະຊວງ ​ປທສ ໃນ​ຖານະ​ເປັນ​ຜູ້​ຄຸ້ມ​ຄອງ​ມະຫາ​ພາກ​ດ້ານ​ໄອ​ຊີ​ທີ ມີ​ເປົ້າ​ໝາຍ​ຈະ​ສ້າງ ​ສປປ ລາວ ໃຫ້​ບັນລຸ​ປັດ​ໄຈ​ພື້ນຖານ​ໃນ​ການ​ຫັນ​ເປັນ​ດີ​ຈີ​ຕອນ ຢ່າງຮອບດ້ານ.

ຂ່າວທີ່ກ່ຽວຂ້ອງ