ຂ່າວຫຼ້າສຸດ

ຈຳ­ນວນ​ຜູ້​ຕິດ​ພະ­ຍາດ­ໝາກ­ແດງ​ຢູ່​ໃນ ສ ອາ​ເມ​ຣິ​ກາ ສືບ­ຕໍ່​ເພີ່ມ​ຂຶ້ນ

389 26 ມິ.ຖ. 2019 ຂ່າວຕ່າງປະເທດ
ຈຳ­ນວນ​ຜູ້​ຕິດ​ພະ­ຍາດ­ໝາກ­ແດງ​ຢູ່​ໃນ ສ ອາ​ເມ​ຣິ​ກາ ສືບ­ຕໍ່​ເພີ່ມ​ຂຶ້ນ

     ສູນ​ຄວບ​ຄຸມ ແລະ ​ປ້ອງ​ກັນ​ພະ­ຍາດ​ຂອງ ສ ອາ​ເມ​ຣິ​ກາ (CDC) ແຈ້ງ​ໃຫ້​ຮູ້­ເມື່ອ​ວັນ​ທີ 24 ມິ­ຖຸ­ນາ​ນີ້​ວ່າ ໃນ​ອາ­ທິດ​ທີ່​ຜ່ານ​ມາ ປະ­ເທດ​ນີ້​ໄດ້​ຢັ້ງ­ຢືນ​ຜູ້​ຕິດ​ພະ­ຍາດ­ໝາກ­ແດງ 33 ກໍ­ລະ­ນີ ເຮັດ​ໃຫ້​ຈຳ­ນວນ​ຜູ້​ຕິດ​ພະ­ຍາດ­ໝາກ­ແດງ ນັບ​ແຕ່​ຕົ້ນ​ປີ​ນີ້​ເປັນ­ຕົ້ນ​ມາ ເພີ່ມ​ຂຶ້ນ​ເປັນ 1.077 ຄົນ.

    ການ​ລະ­ບາດ​ຂອງ​ພະ­ຍາດ­ໝາກ­ແດງ​ໃນ​ງວດ​ດັ່ງ­ກ່າວ ນັບ​ວ່າ​ຮ້າຍ​ແຮງ​ທີ່​ສຸດ ນັບ​ແຕ່​ປີ 1992 ເປັນ­ຕົ້ນ​ມາ ຊຶ່ງ​ໃນ​ປີ​ນັ້ນ​ໄດ້​ຢັ້ງ­ຢືນ​ຜູ້​ຕິດ​ພະ­ຍາດ­ໝາກ­ແດງ ຢູ່​ທີ່​ລະ­ດັບ​ສູງ​ເປັນ​ປະ­ຫວັດ​ການ​ຢູ່​ໃນ  ສ ອາ​ເມ​ຣິ​ກາ ໂດຍ​ມີ 2.126 ກໍ­ລະ­ນີ.

    CDC ໃຫ້​ຮູ້​ວ່າ ຈຳ­ນວນ​ຜູ້​ຕິດ​ພະ­ຍາດ­ໝາກ­ແດງ​ເພີ່ມ​ຂຶ້ນ 3% ໃນ​ອາ­ທິດ​ທີ່​ສິ້ນ​ສຸດ​ລົງ​ໃນ​ວັນ​ທີ 20 ມິ­ຖຸ­ນາ​ທີ່​ຜ່ານ​ມາ ເມື່ອ​ທຽບ­ໃສ່​ອາ­ທິດ​ກ່ອນ​ໜ້າ​ນັ້ນ.  CDC ໃຫ້​ຮູ້​ຕື່ມ​ວ່າ ພະ­ຍາດ­ໝາກ­ແດງ ໄດ້​ລະ­ບາດ​ຢູ່​ໃນ​ນີວ​ຢອກ ມາ​ຕັ້ງ­ແຕ່​ລະ­ດູ​ໃບ​ໄມ້​ຫຼົ່ນ ປີ 2018 ໂດຍ​ສ່ວນ​ຫຼາຍ​ເຕົ້າ­ໂຮມ​ຢູ່​ໃນ​ຊຸມ​ຊົນ ຂະ­ໜາດ​ນ້ອຍ ບ່ອນ​ທີ່​ມີ​ອັດ­ຕາ​ສ່ວນ​ການ​ສັກ​ວັກ​ແຊງ ຕ່ຳ​ກວ່າ​ອັດ­ຕາ​ສ່ວນ​ການ​ສັກ​ຢາ​ກັນ​ພະ­ຍາດ ໂດຍ​ສະ­ເລ່ຍ​ໃນ​ທົ່ວ​ປະ­ເທດ ຊຶ່ງ​ປັດ­ຈຸ­ບັນ​ນີ້​ຢູ່​ທີ່​ີ​ລະ­ດັບ90%.

    ທາງ​ດ້ານ​ອົງ­ການ​ອະ­ນາ­ໄມ​ໂລກ (WHO) ໃຫ້​ຮູ້​ວ່າ ສະ­ເພາະ​ແຕ່​ໃນ 3 ເດືອນ​ຕົ້ນ​ປີ 2019 ທົ່ວ​ໂລກ​ໄດ້​ຢັ້ງ­ຢືນ​ຜູ້​ຕິດ​ພະ­ຍາດ­ໝາກ­ແດງ 110.000 ກວ່າ​ລາຍ ເປັນ​ຕົວ​ເລກ​ທີ່​ເພີ່ມ​ຂຶ້ນ  300% ເມື່ອ​ທຽບ­ໃສ່​ໄລ­ຍະ​ເວ­ລາ​ດຽວ​ກັນ​ຂອງ​ປີ​ກາຍ.

ຂ່າວທີ່ກ່ຽວຂ້ອງ