ສ ອາ​ເມ​ຣິ​ກາ ປະ­ຕິ­ບັດ​ການ​ປິດ​ລ້ອມ​ຕໍ່​ຜູ້­ນຳ​ສູງ​ສຸດ​ຂອງ​ອີ​ຣານ

491 26 ມິ.ຖ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ປະ­ຕິ­ບັດ​ການ​ປິດ​ລ້ອມ​ຕໍ່​ຜູ້­ນຳ​ສູງ​ສຸດ​ຂອງ​ອີ​ຣານ

    ເມື່ອ​ວັນ​ທີ 24 ມິ­ຖຸ­ນາ​ນີ້ ປະ­ທາ­ນາ­ທິ­ບໍ­ດີ ສ ອາ​ເມ​ຣິ​ກາ ໂດ​ນາ​ລ ທຣຳ ໄດ້​ລົງ​ນາມ ດຳ­ລັດ​ສະ­ບັບ​ໜຶ່ງ ກ່ຽວ​ກັບ​ການ​ປະ­ຕິ­ບັດ​ການ​ປິດ​ລ້ອມ​ເທື່ອ​ໃໝ່​ຕໍ່​ອີ​ຣານ ພ້ອມ​ທັງ​ຢືນ­ຢັນ​ວ່າ ມາດ​ຕະ­ການ​ປິດ​ລ້ອມ ອາດ​ຈະ​ຢຸດ­ຕິ​ລົງ​ໃນ​ມື້­ອື່ນ ຫຼື “ແກ່­ຍາວ​ເປັນ​ເວ­ລາ​ຫຼາຍ​ປີ” ໂດຍ​ຂຶ້ນ​ກັບ​ຄຳ​ຕອບ ຂອງ​ອີ​ຣານ.

     ໃນ​ເບື້ອງ​ຕົ້ນ ປະ­ທາ­ນາ­ທິ­ບໍ­ດີ ທຣຳ ກ່າວ​ຕໍ່​ຜູ້​ສື່​ຂ່າວ​ວ່າ ມາດ​ຕະ­ການ​ປິດ​ລ້ອມ​ດັ່ງ­ກ່າວ ຈະ​ແນ­ໃສ່​ທ່ານ ອາ­ລີ ຄາ​ເມ​ນີ ຜູ້­ນຳ​ສູງ​ສຸດ​ທາງ​ດ້ານ​ຈິດ­ໃຈ​ຂອງ​ອີ​ຣານ ແລະ ​ຫ້ອງ­ການ​ຂອງ​ເຂົາ ເພື່ອ​ເປັນ​ການ​ຕອບ​ໂຕ້ ຕໍ່​ການ​ທີ່​ີ​ອີ​ຣານ​ຍິງ​ເຮືອ­ບິນ​ສອດ­ແນມ​ແບບ​ບໍ່​ມີ​ຄົນ​ຂັບ ຂອງ ສ ອາ​ເມ​ຣິ​ກາ ຕົກ​ເມື່ອ​ອາ­ທິດ​ທີ່​ຜ່ານ​ມາ. ຫຼັງ​ຈາກ​ນັ້ນ ປະ­ທາ­ນາ­ທິ­ບໍ­ດີ ທຣຳ ຢືນ­ຢັນ​ວ່າ ຍັງ​ຈະ​ຄົງ​ປະ­ຕິ­ບັດ ການ​ປິດ​ລ້ອມ ເຖິງ​ວ່າ​ບໍ່​ມີ​ການ​ຍິງ​ເຮືອ­ບິນ​ດັ່ງ­ກ່າວ​ຕົກ​ກໍ​ຕາມ.

    ໃນ​ວັນ​ດຽວ​ກັນ ເຈົ້າ​ໜ້າ­ທີ່​ຂອງ ສ ອາ​ເມ​ຣິ​ກາ ຜູ້​ໜຶ່ງ​ເວົ້າ​ວ່າ ສ ອາ​ເມ​ຣິ​ກາ ຈະ​ປິດ​ລ້ອມ ຊັບ​ສິນ​ຂອງ​ອີ​ຣານ​ຕື່ມ​ອີກ “ຫຼາຍ​ຕື້​ໂດ​ລາ​ສະ­ຫະ­ລັດ” ແລະ ​ພາຍ​ໃນ​ອາ­ທິດ​ນີ້ ຈະ​ຈັດ​ໃຫ້​ລັດ­ຖະ­ມົນ­ຕີ ການ​ຕ່າງ­ປະ­ເທດ ອີ​ຣານ ຈາ​ວັດ ຊາ​ຣິ​ຟ ເຂົ້າ​ໄປ​ຢູ່​ໃນ​ບັນ­ຊີ​ຖືກ​ປິດ​ລ້ອມ.

ຂ່າວທີ່ກ່ຽວຂ້ອງ