ຂ່າວຫຼ້າສຸດ

ສ ອາ­ເມ­ຣິ­ກາ ເປີດ­ເຜີຍ​ແຜນ­ການ​ລົງ­ທຶນ 50 ຕື້​ໂດ​ລາ ໃຫ້​ແກ່​ປາ​ແລັດ​ສະ​ຕິນ

406 26 ມິ.ຖ. 2019 ຂ່າວຕ່າງປະເທດ
ສ ອາ­ເມ­ຣິ­ກາ ເປີດ­ເຜີຍ​ແຜນ­ການ​ລົງ­ທຶນ 50 ຕື້​ໂດ​ລາ ໃຫ້​ແກ່​ປາ​ແລັດ​ສະ​ຕິນ

    ເມື່ອ​ວັນ​ທີ 22 ມິ​ຖຸ​ຸ​ນາ​ທີ່​ຜ່ານ​ມາ ອຳ­ນາດ​ການ​ປົກ­ຄອງ​ຂອງ ສ ອາ​ເມ​ຣິ​ກາ ໄດ້​ເປີດ­ເຜີຍ​ການ​ນຳ​ສະ­ເໜີ​ແຜນ­ການ​ການ​ລົງ­ທຶນ​ກໍ່­ສ້າງ​ພື້ນ­ຖານ​ໂຄງ​ລ່າງ ມູນ​ຄ່າ 50 ຕື້​ໂດ​ລາ​ສະ­ຫະ­ລັດ ທີ່​ຈັດ​ສັນ​ໃຫ້​ແກ່​ປາ​ແລັດ​ສະ​ຕິນ.

ໃນ​ບົດ​ທີ່​ລົງ​ພິມ​ຢູ່​ໃນ​ເວບ​ໄຂ​ທາງ​ການ​ຂອງ​ທຳ​ນຽບ​ຂາວ ໃຫ້​ຮູ້​ວ່າ ແຜນ­ການ​ຮຽກ­ຮ້ອງ​ການ​ລົງ­ທຶນ ເປັນ​ການ​ສົມ­ທົບ ລະ­ຫວ່າງ​ການ​ເງິນ​ພາກ​ລັດ ກັບ​ເອ­ກະ​ຊົນ  ແລະ ​ຄາດ​ວ່າ​ຈະ​ສ້າງ​ວຽກ​ເຮັດ​ງານ​ທຳ​ໃໝ່​ອອກ​ມາ​ຢ່າງ​ໜ້ອຍ​ໜຶ່ງ​ລ້ານ​ຕຳ­ແໜ່ງ ໃຫ່​ແກ່​ຊາວ​ປາ​ແລັດ​ສະ​ຕິນ.

    ແຜນ­ການ​ດັ່ງ­ກ່າວ ມີ​ກຳ­ນົດ​ແກ່­ຍາວ​ເປັນ​ເວ­ລາ 10 ປີ ເປັນ​ການ​ຮຽກ­ຮ້ອງ​ທຶນ​ໃຫ້​ແກ່​ບັນ­ດາ​ໂຄງ­ການ ທີ່​ມີ​ຍອດ​ມູນ​ຄ່າ 27,5 ຕື້​ໂດ​ລາ​ສະ­ຫະ­ລັດ ຢູ່​ໃນ​ເຂດ​ຝັ່ງ​ຕາ­ເວັນ­ຕົກ​ແມ່­ນ້ຳ​ຈໍ​ແດນ ແລະ ກາ​ຊາ ຄຽງ​ຄູ່​ກັບ​ໂຄງ­ການ​ທີ່​ມີ​ມູນ​ຄ່າ​ຕາມ​ລຳ­ດັບ  9,1 ຕື້​ໂດ​ລາ​ສະ­ຫະ­ລັດ 7,4 ຕື້​ໂດ​ລາ​ສະ­ຫະ­ລັດ ແລະ 6,3 ຕື້​ໂດ​ລາ​ສະ­ຫະ­ລັດ ໃຫ້​ແກ່​ຊາວ​ປາ​ແລັດ​ສະ​ຕິນ ຢູ່​ໃນ​ເອ​ຢິບ ຊອກ​ດາ​ນີ ແລະ ​ລີ​ບັງ ຊຶ່ງ​ປະ­ກອບ​ມີ​ບັນ­ດາ​ໂຄງ­ການ​ໃນ​ຂົງ­ເຂດ​ດູ​ແລ​ສຸ­ຂະ­ພາບ ການ​ສຶກ​ສາ ໄຟ­ຟ້າ ນ້ຳ ເຕັກ​ໂນ​ໂລ​ຊີ​ສູງ ການ­ທ່ອງ­ທ່ຽວ ແລະ​ກະ­ສິ­ກຳ. ແຜນ­ການ​ນັ້ນ​ຍັງ​ຮຽກ­ຮ້ອງ​ການ​ຮ່ວມ​ກຸ່ມ ຝັ່ງ​ຕາ­ເວັນ­ຕົກ​ແມ່­ນ້ຳ​ຈໍ​ແດນ ກັບ​ກາ​ຊາ ໂດຍ​ຜ່ານ​ຕາ​ນ່າງ​ການ​ຄົມ­ມະ­ນາ­ຄົມ​ທີ່​ທັນ​ສະ­ໄໝ ອັນ​ປະ­ກອບ​ມີ​ທັງ​ການ​ບໍ­ລິ­ການ​ທາງ​ລົດ­ໄຟ​ຄວາມ​ໄວ​ສູງ.

    ເອ­ກະ­ສານ​ຕ່າງໆ​ໃຫ້​ຮູ້​ວ່າ ແຜນ­ການ​ດັ່ງ­ກ່າວ ຄາດ​ວ່າ​ຈະ​ເພີ່ມ​ຍອດ​ຜະ­ລິດ​ຕະ​ພັນ​ພາຍ​ໃນ​ປະ­ເທດ (GDP) ຂອງ​ປາ​ແລັດ​ສະ​ຕິນ ຂຶ້ນ​ທົບ​ສອງ​ເທົ່າ​ຕົວ ພ້ອມ​ທັງ​ຫຼຸດ­ຜ່ອນ​ອັດ­ຕາ​ສ່ວນ​ທຸກ​ຍາກ​ລົງ​ໃຫ້​ຍັງ​ເຫຼືອ​ໜຶ່ງ​ຫຼັກ​ຕົວ​ເລກ. ເຖິງ​ຢ່າງ­ໃດ​ກໍ​ຕາມ ເອ­ກະ­ສານ​ເຫຼົ່າ­ນັ້ນ ບໍ່​ໄດ້​ຍົກ​ໃຫ້​ເຫັນ​ຢ່າງ​ຊັດ​ເຈນ​ເຖິງ​ບັນ­ດາ​ໂຄງ­ການ ທີ່​ຈະ​ໄດ້​ຮັບ​ຄວາມ​ຊ່ວຍ­ເຫຼືອ​ດ້ານ​ການ​ເງິນ​ນັ້ນ​ຄື​ແນວ­ໃດ.

     ໃນ​ວັນ​ດຽວ​ກັນ​ກັບ​ທີ່ ສ ອາ​ເມ​ຣິ​ກາ ປະ­ກາດ​ແຜນ­ການ​ດັ່ງ­ກ່າວ ປະ­ທາ­ນາ­ທິ­ບໍ­ດີ​ປາ​ແລັດ​ສະ​ຕິນ ມາ​ມຸດ ອັບ​ບາ​ສ ໄດ້​ກ່າວ​ຢ້ຳ​ຄືນ ເຖິງ​ການ​ປະ­ຕິ­ເສດ​ຕໍ່​ແຜນ­ການ​ສັນ­ຕິ­ພາບ​ຂອງ ສ ອາ​ເມ​ຣິ​ກາ ພ້ອມ​ທັງ​ຢືນ­ຢັນ​ວ່າ ວິ­ທີ​ການ​ແກ້​ໄຂ​ທາງ​ການ­ເມືອງ ຕ້ອງ​ເປັນ​ບາດ­ກ້າວ​ທຳ​ອິດ.

ຂ່າວທີ່ກ່ຽວຂ້ອງ