ສຳເລັດ​ຊຸດ​ເຝິກອົບຮົມ​ປະດິດ​ແຕ່ງ​ບົດ​ຟ້ອນ ແລະ ກຳກັບ​ການສະແດງ

594 25 ມິ.ຖ. 2019 ຂ່າວໜ້າ​ໜຶ່ງ
ສຳເລັດ​ຊຸດ​ເຝິກອົບຮົມ​ປະດິດ​ແຕ່ງ​ບົດ​ຟ້ອນ ແລະ ກຳກັບ​ການສະແດງ

    ພິທີ​ມອບ-ຮັບ​ໃບຢັ້ງຢືນ​ໃຫ້​ຜູ້​ສຳເລັດ​ການ​ເຝິກອົບຮົມ​ປະດິດ​ຟ້ອນ ແລະ ກຳກັບ​ການສະແດງ​ຂອງ​ນັກ​ສິລະ​ປິນ​ລາວ ຈັດ​ຂຶ້ນ​ວັນ​ທີ 21 ມິຖຸນາ 2019 ຢູ່​ໂຮງຮຽນ​ສິລະ​ປະ​ດົນຕີ​ແຫ່ງ​ຊາດ ໂດຍ​ມີ​ທ່ານ ຈັນ​ສະ ໝອນ ຈັນ​ຍາ​ລາດ ລັດຖະມົນຕີ​ກະຊວງ​ປ້ອງ​ກັນ​ປະເທດ ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີ​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ທ່ານ ຫງວ​​ຽນ ກວງ​ວິງ ຫົວໜ້າ​ກົມ​ສິລະ​ປະ​ການສະແດງ ກະຊວງ​ວັດທະນະທຳ ກີລາ ແລະ ທ່ອງ​ທ່ຽວ ​ສສ ຫວຽດນາມ ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ ຄຳ​ພວງ ອິນ​ທະ​ວົງ ຫົວໜ້າ​ກົມ​ສິລະ​ປະ​ການສະແດງ ກ່າວ​ວ່າ: ຊຸດ​ເຝິກອົບຮົມ​ດັ່ງກ່າວ ໄດ້​ເລີ່ມ​ແຕ່​ວັນ​ທີ 18 ເມສາ-18 ມິຖຸນາ 2019 ໂດຍ​ມີ​ສຳ​ມະ​ນາ​ກອນ​ເຂົ້າ​ຮ່ວມ 40 ຄົນ ຍິງ 27 ຄົນ ເຊິ່ງ​ຖ່າຍ​ທອດ​ຄວາມ​ຮູ້​ໂດຍ​ວິທະຍາກອນ 3 ທ່ານ​ຈາກ ​ສສ ຫວຽດນາມ ໃນ​ນີ້ ໄດ້​ຮຽນ​ຮູ້​ວິທີ​ການ​ປະດິດ​ບົດ​ຟ້ອນ ແລະ ກຳກັບ​ການສະແດງ​ດ້ານ​ທິດ​ສະ​ດີ ແລະ ພາກ​ປະຕິບັດ​ຕົວ​ຈິງ​ໄປ​ພ້ອມ​ກັນ ຜ່ານ​ການ​ເຝິກ​ອົບ ຮົມ​ສຳ​ມະ​ນາ​ກອນ​ສາມາດ​ແຕ່ງ​ບົດ​ຟ້ອນ​ໄດ້ 37 ບົດ ນອກ​ນີ້ ຍັງ​ເຮັດ​ໃຫ້​ເຂົາເຈົ້າ​ເຂົ້າໃຈ ແລະ ຮັບ​ຮູ້​ຢ່າງ​ເລິກເຊິ່ງ​ກ່ຽວ​ກັບ​ການ​ປະດິດ​ບົດ​ຟ້ອນ ແລະ ກຳກັບ​ການສະແດງ ໃນ​ນີ້ ປະເພດ​ດີ​ໃນ​ການ​ປະດິດ​ແຕ່ງ​ບົດ​ຟ້ອນ 13 ຄົນ ດີ​ຫຼາຍ 25 ຄົນ ດີເລີດ 2 ຄົນ.

    ຜູ້​ເຂົ້າ​ຮ່ວມ​ໃນ​ພິທີ ຍັງ​ໄດ້​ຮັບ​ຊົມ​ການສະແດງ​ສິລະ​ປະ​ວັນນະຄະດີ ກໍ​ຄື ບົດ​ຟ້ອນ​ທີ່​ສຳ​ມະ​ນາ​ກອນ​ປະດິດ​ຂຶ້ນ ເຊິ່ງ​ທຸກໆ​ບົດ​ຟ້ອນ​ລ້ວນ​ແຕ່​ມີ​ເນື້ອ​ໃນ ສາລະ​ທີ່​ຕິດ​ພັນ​ກັບ​ແນວທາງ​ນະໂຍບາຍ​ຂອງ​ພັກ-ລັດ ວັດທະນະທຳ ຮີດຄອງ​ປະເພນີ ວິຖີ​ຊີວິດ​ຂອງ​ປະຊາຊົນ​ລາວ​ບັນດາເຜົ່າ ແລະ ມີ​ສີສັນ​ສິລະ​ປະ​ດ້ານ​ການ​ຟ້ອນ​ແຕກ​ຕ່າງ​ກັນ ເຊິ່ງ​ເປັນ​ການ​ປະກອບສ່ວນ​ສຳຄັນ​ໃນ​ການ​ພັດທະນາ​ວຽກ​ງານ​ສິລະ​ປະ ການສະແດງ​ໄປ​ສູ່​ຄຸນ​ນະ​ພາບ​ໃໝ່ ຄຽງ​ຄູ່​ກັບ​ການ​ຂະຫຍາຍຕົວ​ເສດຖະກິດ-ສັງຄົມ​ໃນ​ປັດຈຸບັນ ທັງ​ສາມາດ​ສ້າງ​ວິຊາ​ການ​ປະດິດ​ແຕ່ງ​ບົດ​ຟ້ອນ ແລະ ກຳກັບ​ການສະແດງ​ຂອງ​ລາວ​ໃຫ້​ມີ​ຄວາມ​ເຂັ້ມແຂງ​ຂຶ້ນ.

ຂ່າວທີ່ກ່ຽວຂ້ອງ