ປະ​ເມີນ​ການ​ສຳ​ຫຼວດ​ສະຖິຕິ​ກະສິກຳ ແລະ ເສດຖະກິດ​ທົ່ວ​ປະເທດ

592 25 ມິ.ຖ. 2019 ຂ່າວໜ້າ​ໜຶ່ງ
ປະ​ເມີນ​ການ​ສຳ​ຫຼວດ​ສະຖິຕິ​ກະສິກຳ ແລະ ເສດຖະກິດ​ທົ່ວ​ປະເທດ

     ກອງ​ປະຊຸມ​ຊີ້​ນຳ​ລະດັບ​ຊາດ​ຮ່ວມ​ກັບ​ຄະນະ​ຊີ້​ນຳ​ຂັ້ນ​ແຂວງ ການ​ສຳ​ຫຼວດ​ສະຖິຕິ​ກະສິກຳ​ທົ່ວ​ປະເທດ ຄັ້ງ​ທີ III ແລະ ການ​ສຳ​ຫຼວດ​ເສດຖະກິດ​ທົ່ວ​ປະເທດ ຄັ້ງ​ທີ III ປີ 2019 (ນະຄອນຫຼວງ​ວຽງ​ຈັນ ແຂວງ​ບໍ​ລິ​ຄຳ​ໄຊ ແຂວງ​ວຽງ​ຈັນ ແລະ ແຂວງ​ໄຊ​ສົມບູນ) ຈັດ​ຂຶ້ນ​ວັນ​ທີ 24 ມິຖຸນາ 2019 ຢູ່​ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ (ນວ) ໂດຍ​ເປັນ​ປະທານ​ຂອງ​ທ່ານ ສົມ​ດີ ດວງ​ດີ ຮອງ​ນາ ຍົກ​ລັດຖະມົນຕີ ລັດຖະມົນຕີ​ກະຊວງ​ການ​ເງິນ ຫົວໜ້າ​ຄະນະ​ຊີ້​ນຳ​ລະດັບ​ຊາດ ການ​ສຳ​ຫຼວດ​ສະຖິຕິ​ກະສິກຳ​ທົ່ວ​ປະເທດ ແລະ ການ​ສຳ​ຫຼວດ​ເສດຖະກິດ​ທົ່ວ​ປະເທດ ມີ​ບັນດາ​ຄະນະ​ຊີ້​ນຳ​ຂັ້ນ ນວ ແລະ ແຂວງ​ກ່ຽວຂ້ອງ​ເຂົ້າ​ຮ່ວມ.

    ທ່ານ ສົມ​ດີ ດວງ​ດີ ກ່າວ​ວ່າ: ປັດຈຸບັນ ພັກ-ລັດຖະບານ ພວມ​ເອົາໃຈໃສ່​ຈັດ​ຕັ້ງ​ປະຕິບັດ​ໄລຍະ​ສຸດ​ທ້າຍ​ຂອງ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ແລະ ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ 8 (2016-2020) ຂໍ້​ມູນ​ຈາກ​ການ​ສຳ​ຫຼວດ​ສະຖິຕິ​ກະສິກຳ​ທົ່ວ​ປະເທດ ແລະ ຂໍ້​ມູນ​ສຳ​ຫຼວດ​ເສດຖະກິດ​ທົ່ວ​ປະເທດ ຄັ້ງ​ທີ III ຈຶ່ງ​ມີ​ຄວາມ​ສຳຄັນ ປະ​ເມີນ​ຕໍ່​ຜົນສຳເລັດ​ໃນ​ການຈັດຕັ້ງ​ປະຕິ ບັດ​ມະຕິ ແລະ ແຜນ​ພັດທະນາ​ດັ່ງກ່າວ ທັງ​ເປັນ​ພື້ນຖານ​ໃນ​ການ​ວາງ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ ກໍ​ຄື ການ​ວາງ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ 9 (2020-2025) ໂດຍ​ສະເພາະ ການ​ສະຫຼຸບ​ຕີ​ລາຄາ​ຄວາມ​ຄືບ​ໜ້າ ການຈັດຕັ້ງ​ປະຕິບັດ​ເປົ້າ​ໝາຍ ການ​ພັດທະນາ​ແບບ​ຍືນ​ຍົງ ເຊິ່ງ​ລັດຖະບານ​ມີ​ພັນທະ​ໄດ້​ລາຍ​ງານ​ຕໍ່​ສາກົນ.

    ອີງໃສ່​ຜົນ​ຂອງ​ການ​ສຳ​ຫຼວດ​ສະຖິຕິ​ກະສິກຳ​ທົ່ວ​ປະເທດ 2 ຄັ້ງ ສາມາດ​ເຫັນ​ໄດ້​ໂຄງ​ສ້າງ​ພື້ນຖານ​ຂອງ​ການ​ປູກ​ພືດ ລ້ຽງສັດ ການ​ປະມົງ ແລະ ປ່າໄມ້ ການ​ປ່ຽນແປງ​ໂຄງ​ປະກອບ​ຂອງ​ຂະແໜງການ ການ​ປະກອບ​ການ-ການ​ນຳ​ໃຊ້​ແຮງ​ງານ​ເຂົ້າ​ໃນ​ການ​ຜະລິດ​ກະສິກຳ ການ​ນຳ​ໃຊ້​ເຄື່ອງ​ກົນ​ຈັກ ອຸປະ  ກອນ​ເຄື່ອງມື​ກະສິກຳ ການ​ນຳ​ໃຊ້​ຝຸ່ນ-ປຸ໋ຍ ການ​ນຳ​ໃຊ້​ຊົນລະປະທານ ແລະ ສະພາບ​ເສດຖະກິດ-ສັງ ຄົມ​ອື່ນໆ​ທີ່​ກ່ຽວຂ້ອງ​ໃນ 10 ປີຜ່ານມາ ຜົນ​ການ​ສຳ​ຫຼວດ​ເສດຖະກິດ​ທົ່ວ​ປະເທດ 2 ຄັ້ງ​ຜ່ານ​ມາ ໄດ້​ສະແດງ​ໃຫ້​ເຫັນ​ສະພາບ​ການ​ຂະຫຍາຍຕົວ ແລະ ການ​ດຳເນີນ​ທຸລະ​ກິດ ການ​ລົງທຶນ ຫຼື ພື້ນຖານ​ການ​ຜະລິດ​ເສດຖະກິດ​ໃນ​ແຕ່​ລະ​ຂົງເຂດ ຂະແໜງການ​ທົ່ວ​ປະເທດ ນອກ​ນີ້ ຜົນ​ຂອງ​ການ​ສຳ​ຫຼວດ​ຍັງ​ຈະ​ເຮັດ​ໃຫ້​ພວກ​ເຮົາ​ສາມາດ​ກຳ​ໄດ້​ສະພາບ​ຕົວ​ຈິງ​ຂອງ​ການ​ດຳເນີນ​ທຸລະ​ກິດ​ຂອງ​ຫົວໜ່ວຍ​ຕ່າງໆ ເຊິ່ງ​ຈະ​ເປັນ​ພື້ນຖານ​ສຳຄັນ​ໃນ​ການ​ປັບປຸງ​ຖານ​ຂໍ້​ມູນ​ເກັບ​ລາຍ​ຮັບ​ແຫ່ງ​ຊາດ ພິເສດ ແມ່ນ​ການ​ກວດກາ​ຄືນ​ກ່ຽວ​ກັບ​ທີ່​ດິນ​ກະສິກຳ ເພື່ອ​ການ​ປູກຝັງ ແລະ ລ້ຽງສັດ ຈຳນວນ​ຜູ້​ຜະລິດ​ກະສິກຳ​ໃນ​ລາວ ແບ່ງ​ຕາມ​ປະເພດ ຄື: ຄົວ​ເຮືອນ ຫົວໜ່ວຍ​ການ​ຜະລິດ ແລະ ທຸລະ​ກິດ ການ​ຂະຫຍາຍຕົວ​ຂອງ​ຂະແໜງ​ກະສິກຳ ແລະ ສະພາບ​ການເຄື່ອນໄຫວ​ການ​ຜະລິດ​ກະສິກຳ ກໍ​ຄື ການ​ດຳເນີນ​ທຸລະ​ກິດ​ໃນ​ລາວ.

    ອີງ​ຕາມ​ແຜນ​ຂອງ​ການ​ສຳ​ຫຼວດ​ນີ້ ຕ້ອງ​ດຳເນີນ​ການ​ເກັບ​ຂໍ້​ມູນ​ສຳເລັດ ເພື່ອ​ລາຍ​ງານ​ລັດຖະບານ​ພາຍ​ໃນ​ເດືອນ​ມິຖຸນາ 2020 ເຊິ່ງ​ກອງ​ປະຊຸມ​ຄັ້ງ​ນີ້ ບໍ່​ພຽງ​ແຕ່​ຈະ​ພ້ອມ​ກັນ​ສະຫຼຸບ​ຕີ​ລາຄາ​ຄືນ​ຄວາມ​ຄືບ​ໜ້າການ​ກະກຽມ ການຈັດຕັ້ງ​ປະຕິບັດ ການ​ສຳ​ຫຼວດ ຍັງ​ຈະ​ສຸມ​ໃສ່​ປຶກສາ​ຫາລື ໂດຍ​ສະເພາະ ການ​ກຳນົດ​ວິທີ​ການ ແລະ ການ​ສຳ​ຫຼວດ​ເສດຖະກິດ​ທົ່ວ​ປະເທດ ຄັ້ງ​ທີ III ໃຫ້​ບັນລຸ​ຕາມ​ເປົ້າ​ໝາຍ ແລະ ກຳນົດ​ເວລາ.

ຂ່າວທີ່ກ່ຽວຂ້ອງ