ສະຫຼອງ​ວັນ​ສ້າງຕັ້ງ​ທະນາຄານ​ຮ່ວມ​ທຸລະ​ກິດ ລາວ-ຫວຽດ ຄົບຮອບ 20 ປີ

681 25 ມິ.ຖ. 2019 ຂ່າວໜ້າ​ໜຶ່ງ
ສະຫຼອງ​ວັນ​ສ້າງຕັ້ງ​ທະນາຄານ​ຮ່ວມ​ທຸລະ​ກິດ ລາວ-ຫວຽດ ຄົບຮອບ 20 ປີ

   ພິທີ​ປະດັບ​ຫຼຽນ​ໄຊ​ແຮງ​ງານ ຊັ້ນ 1 ຈາກ​ພັກ-ລັດຖະບານ​ລາວ ມອບ​ທຸງໄຊ​ແຂ່ງຂັນ​ຈາກ​ທະນາຄານ ແຫ່ງ ​ສສ ຫວຽດນາມ ແລະ ສະເຫຼີມສະຫຼອງ​ວັນ​ສ້າງຕັ້ງ​ທະນາຄານ​ຮ່ວມ​ທຸລະ​ກິດ ລາວ-ຫວຽດ ຄົບ ຮອບ 20 ປີ (1999-2019) ຈັດ​ຂຶ້ນ​ວັນ​ທີ 22 ມິຖຸນາ 2019 ຢູ່​ໂຮງແຮມ​ແລນ​ມາກ ໂດຍ​ມີ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດຖະມົນຕີ​ກະ ຊວງ​ການ​ເງິນ ທ່ານ ຫງວ​​ຽນ ຈິ​ຢຸງ ລັດຖະມົນຕີ​ກະຊວງ​ແຜນການ ແລະ ການ​ລົງທຶນ​ຫວຽດນາມ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ​ອຳນວຍ​ການ​ໃຫຍ່​ທະນາຄານ​ຮ່ວມ​ທຸລະ​ກິດ ລາວ-ຫວຽດ ໄດ້​ຂຶ້ນ​ລາຍ​ງານ​ການເຄື່ອນໄຫວ​ທຸລະ​ກິດ​ຂອງ​ທະ​ນາ ຄານ​ຮ່ວມ​ທຸລະ​ກິດ ລາວ-ຫວຽດ ຢູ່​ລາວ ໄລຍະ 20 ປີ ແຫ່ງ​ຜົນສຳເລັດ​ໃນ​ການ​ຮ່ວມ​ມື​ສອງ​ຝ່າຍ ເຮັດ​ໃຫ້​ທຸລະ​ກິດ​ມີ​ການ​ເຕີບ​ໃຫຍ່​ຂະຫຍາຍຕົວ​ດ້ານ​ປະລິມານ ແລະ ຄຸນ​ນະ​ພາບ ເຊິ່ງ​ປະກອບ ສ່ວນ​ຢ່າງ​ຕັ້ງໜ້າ​ໃນ​ການ​ພັດທະນາ​ເສດຖະກິດ-ສັງ ຄົມ ກໍ​ຄື ການ​ສ້າງສາ​ພັດທະນາ ​ສປປ ລາວ ແລະ ໃນ​ອະນາຄົດ ທະນາຄານ​ຈະ​ສືບຕໍ່​ພັດທະນາ​ທຸລະ​ກິດ ໃຫ້​ບັນລຸ​ຜົນ ສຳເລັດ ເປັນຕົ້ນ ການ​ລະດົມ​ເງິນ​ຝາກ ແລະ ສະໜອງ​ເງິນ​ກູ້​ໃຫ້​ຫົວໜ່ວຍ​ທຸລະ​ກິດ​ຕ່າງໆ​ໄດ້​ດຳເນີນ​ທຸລະ​ກິດ​ຂອງ​ຕົນ​ຢ່າງ​ມີ​ປະ​ສິດທິ​ຜົນ.

    ທ່ານ ສົມ​ດີ ດວງ​ດີ ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ​ຕໍ່​ຄວາມ​ພະຍາຍາມ​ໃນ​ການ​ປະກອບ​ສ່ວນ ແລະ ບັນດາ​ຜົນງານ​ທີ່​ພົ້ນ​ເດັ່ນ​ຂອງ​ທະນາຄານ​ຮ່ວມ​ທຸລະ​ກິດ ລາວ-ຫວຽດ ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ  ເຊິ່ງ​ໄດ້​ຢັ້ງຢືນ​ບົດບາດ​ເປັນ​ຂົວ​ຕໍ່​ໃນ​ການ​ຊຳລະ ລະຫວ່າງ ຫວຽດນາມ ແລະ ລາວ ຈັດ​ຕັ້ງ​ປະຕິບັດ​ໜ້າທີ່​ສະໜອງ​ທຶນ​ໃຫ້​ໂຄງການ​ກໍ່ສ້າງ​ພື້ນຖານ​ໂຄງ​ລ່າງ ຄົມມະນາຄົມ ໂຮງຮຽນ ໂຮງໝໍ ໃຫ້​ບໍລິການ​ການ​ເງິນ​ຫຼາຍ​ຢ່າງ​ໃຫ້​ສັງຄົມ ວິ​ສາ​ຫະ​ກິດ ແລະ ປະຊາຊົນ​ສອງ​ປະເທດ ພ້ອມ​ນີ້ ທ່ານ​ຮອງ​ນາຍົກລັດຖະມົນຕີ​ຍັງ​ສະແດງ​ຄວາມ​ເຊື່ອ​ໝັ້ນ​ວ່າ ທະນາຄານ ລາວ-ຫວຽດ ຈະ​ຮັກສາ​ມູນເຊື້ອ​ອັນ​ດີງາມ​ຂອງ​ຕົນ ແລະ ໄດ້​ຮັບ​ຄວາມ​ເຊື່ອ​ໝັ້ນ​ຈາກ​ພັກ ລັດຖະບານ ແລະ ປະຊາຊົນ​ສອງ​ປະເທດ ລາວ-ຫວຽດ ນາມ.

    ທ່ານ ສອນ​ໄຊ ສິດ​ພະ​ໄຊ ຜູ້​ວ່າການ​ທະນາຄານ​ແຫ່ງ ​ສປປ ລາວ ກ່າວ​ວ່າ: ທະນາຄານ ລາວ-ຫວຽດ ເປັນ​ໜຶ່ງ​ຫົວໜ່ວຍ​ຮ່ວມ​ທຸລະ​ກິດ​ພິເສດ ການ​ສ້າງຕັ້ງ ແລະ ການ​ເຕີບ​ໃຫຍ່​ຂະຫຍາຍຕົວ​ຂອງ​ທະ ນາ​ຄານ​ລາວ-ຫວຽດ ບໍ່​ພຽງ​ແຕ່​ເຮັດ​ໜ້າທີ່​ເປັນ​ສະ​ຖາ​ບັນ​ການ​ເງິນ-ການ​ທະນາຄານ ແຕ່​ຍັງ​ໄດ້​ເຮັດ​ໜ້າທີ່​ເປັນ​ຂົວ​ຕໍ່​ເຊື່ອມ​ໂຍງ​ພື້ນຖານ​ເສດຖະກິດ ລາວ-ຫວຽດນາມ ແລະ ເປັນ​ການ​ເພີ່ມ​ພູນ​ຄູນ​ສ້າງ ຮັດ​ແໜ້ນ​ສາຍ​ພົວພັນ​ສາມັກຄີ​ມິດຕະພາບ​ແບບ​ພິເສດ ລະຫວ່າງ​ສອງ​ຊາດ ລາວ-ຫວຽດນາມ ຕື່ມ​ອີກ.

    ໃນ​ພິທີ​ໄດ້​ປະດັບ​ຫຼຽນ​ໄຊ​ແຮງ​ງານ​ຊັ້ນ 1 ໃຫ້​ທະນາຄານ​ລາວ-ຫວຽດ ເຊິ່ງ​ປະດັບ​ໂດຍ​ທ່ານ ສົມ​ດີ ດວງ​ດີ ປະດັບ​ຫຼຽນ​ໄຊ​ແຮງ​ງານ​ຊັ້ນ 2 ໃຫ້ 4 ທ່ານ ຫຼຽນ​ໄຊ​ແຮງ​ງານ ຊັ້ນ 3 ໃຫ້ 5 ທ່ານ ແລະ ຫຼຽນ​ໄຊ​ມິດຕະພາບ​ລາວ-ຫວຽດນາມ ໃຫ້ 4 ທ່ານ ເຊິ່ງ​ປະດັບ​ໂດຍ​ທ່ານ ສອນ​ໄຊ ສິດ​ພະ​ໄຊ ນອກ​ນີ້ ຍັງ​ໄດ້​ມອບ​ທຸງ​ແຂ່ງຂັນ​ຈາກ​ທະນາຄານ​ແຫ່ງ ​ສສ ຫວຽດນາມ ຕື່ມ​ອີກ.

ຂ່າວທີ່ກ່ຽວຂ້ອງ