ລາວ ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ສອງ​ຝ່າຍ

601 25 ມິ.ຖ. 2019 ຂ່າວໜ້າ​ໜຶ່ງ
ລາວ ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ສອງ​ຝ່າຍ

    ໃນ​ໂອກາດ​ເດີນທາງ​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 34 ທີ່​ບາງກອກ ປະເທດ​ໄທ ໃນ​ລະຫວ່າງ​ວັນ​ທີ 22-24 ມິຖຸນາ 2019 ໄດ້​ມີ​ການ​ພົບ​ປະ​ແບບ​ບໍ່​ເປັນ​ທາງ​ການ ລະຫວ່າງ​ສາມ​ນາຍົກລັດຖະມົນຕີ ກຳປູເຈຍ-ລາວ-ຫວຽດນາມ (CLV) ຕາມ​ຄຳ​ເຊີນ​ຂອງ​ນາຍົກລັດຖະມົນຕີ​ຫວຽດນາມ ໃນ​ວັນ​ທີ 23 ມິຖຸນາ ທີ່​ຜ່ານ​ມາ.

    ໃນ​ໂອກາດ​ນີ້ ພະນະ​ທ່ານ​ນາຍົກ​ລົດ​ຖະ​ມົນຕີ ທອງ​ລຸນ ສີ​ສຸ​ລິດ ໄດ້​ສະແດງ​ຄວາມ​ຂອບໃຈ​ທີ່​ພະນະ​ທ່ານ​ນາຍົກ ລັດຖະມົນຕີ ຫງວ​​ຽນ ຊວັນ ຟຸກ ໄດ້​ເຊື້ອ​ເຊີນ​ເຂົ້າ​ຮ່ວມ​ພົບ​ປະ​ສາມ​ນາຍົກ CLV ໃນ​ຄັ້ງ​ນີ້ ແລະ ໄດ້​ສະແດງ​ຄວາມ​ດີໃຈ​ທີ່​ໄດ້​ພົບ​ກັບ​ພະນະ​ທ່ານ ຫງວ​​ຽນ ຊວັນ ຟຸກ ແລະ ສົມເດັດ ຮຸນ​ແຊນ ອີກ​ຄັ້ງ ເຊິ່ງ​ສະແດງ​ໃຫ້​ເຫັນ​ເຖິງ​ຄວາມ​ຮັກແພງ ແລະ ຄວາມ​ສາມັກຄີ​ແບບ​ພິເສດ ທີ່​ມີ​ມູນເຊື້ອ​ມາ​ແຕ່​ດົນ​ນານ ລະຫວ່າງ ສາມ​ປະເທດ ໃນ​ການ​ພົບ​ປະ​ຄັ້ງ​ນີ້ ສາມ​ນາຍົກ​ໄດ້​ທົບ​ທວນຄືນ​ການ​ຮ່ວມ​ມື ລະຫວ່າງ ສາມ​ປະເທດ ໃນ​ຂອບ CLV ເຊິ່ງ​ກວມ​ເອົາ​ການ​ຮ່ວມ​ມື​ໃນ​ດ້ານ​ເສດຖະກິດ ການ​ຄ້າ ການ​ລົງທຶນ ແລະ ອື່ນໆ ພ້ອມ​ນີ້ ຍັງ​ໄດ້​ປຶກສາ​ຫາລື​ການ​ພົວພັນ​ຮ່ວມ​ມື​ນຳ​ກັນ​ໃນຕໍ່ໜ້າ ລະຫວ່າງ​ສາມ​ປະເທດ  ແລະ ແລກປ່ຽນ​ຄວາມ​ຄິດ​ເຫັນ​ຕໍ່​ບັນຫາ​ພາກ​ພື້ນ ແລະ ສາກົນ ທີ່​ມີ​ຄວາມ​ສົນໃຈ​ຮ່ວມ​ກັນ.

    ໃນ​ຕອນ​ທ້າຍ​ຂອງ​ການ​ພົບ​ປະ​ໂອ້​ລົມ ພະນະ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ຍັງ​ອວຍພອນ​ໃຫ້​ສາຍ​ພົວພັນ​ມິດຕະພາບ​ແບບ​ພິເສດ ລະຫວ່າງ ສາມ​ຊາດ ລາວ-ຫວຽດນາມ-ກຳປູເຈຍ ທີ່​ມີ​ມາ​ແຕ່​ດົນ​ນານ ຈົ່ງ​ໝັ້ນຄົງ​ທະ​ນົງ​ແກ່ນ ພ້ອມ​ທັງ​ອວຍພອນ​ໃຫ້​ສອງ​ນາຍົກລັດຖະມົນຕີ​ຫວຽດນາມ ແລະ ກຳປູເຈຍ ຈົ່ງ​ມີ​ສຸຂະພາບ​ແຂງແຮງ ແລະ ປະສົບ​ຜົນສຳເລັດ​ໃນ​ການ​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ອາ​ຊຽນ​ໃນ​ຄັ້ງ​ນີ້.

    ໃນ​ວັນ​ດຽວ​ກັນ ພະນະ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ພ້ອມ​ດ້ວຍ​ຄະນະ ຍັງ​ໄດ້​ພົບ​ປະ​ສອງ​ຝ່າຍ​ກັບ ພະນະ​ທ່ານ ພົນ​ເອກ ປຣະ​ຢຸດ ຈັນ​ໂອຊາ ນາຍົກລັດຖະມົນຕີ ແຫ່ງ ລາຊະ​ອານາຈັກ​ໄທ ໃນ​ການ​ພົບ​ປະ​ດັ່ງກ່າວ ພະນະ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ໄດ້​ສະແດງ​ຄວາມ​ຊົມເຊີຍ ຕໍ່​ຜົນສຳເລັດ​ອັນ  ຈົບງາມ​ໃນ​ການ​ເລືອກ​ຕັ້ງ​ທົ່ວ​ໄປ​ຂອງ​ໄທ ເມື່ອ​ບໍ່​ດົນ​ຜ່ານ​ມາ ແລະ ຊົມເຊີຍ​ຢ່າງ​ຈິງ​ໃຈ​ຕໍ່​ພະນະ​ທ່ານ ພົນ​ເອກ ປຣະ​ຢຸດ ຈັນ​ໂອຊາ ທີ່​ໄດ້​ຮັບ​ເລືອກ​ຕັ້ງ​ໃຫ້​ດຳລົງ​ຕຳແໜ່ງ​ເປັນ​ນາຍົກລັດຖະມົນຕີ​ອີກ​ວາລະ​ໜຶ່ງ ພ້ອມ​ທັງ​ສະແດງ​ຄວາມ​ດີໃຈ ແລະ ຍິນ​ດີ​ເຮັດ​ວຽກ​ຮ່ວມ​ກັນ​ໃນ​ການ​ສືບຕໍ່​ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີງາມ ລະ ຫວ່າງ ສອງ​ປະເທດ ໃນ​ຂົງເຂດ​ເສດຖະກິດ ການ​ຄ້າ ການ​ລົງທຶນ ການ​ເຊື່ອມ​ໂຍງ​ທາງ​ດ້ານ​ພື້ນຖານ​ໂຄງ​ລ່າງ ດ້ານ​ພະລັງງານ​ໄຟຟ້າ ແລະ ອື່ນໆ ເພື່ອ​ນຳ​ເອົາ​ຜົນ​ປະໂຫຍດ​ຕົວ​ຈິງ​ມາສູ່​ປະຊາຊົນ​ສອງ​ຊາດ ລາວ ແລະ ໄທ ຕໍ່ໜ້າ ແລະ ສອງ​ຝ່າຍ​ຍັງ​ເຫັນ​ດີ​ຮ່ວມ​ກັນ​ຈັດ​ກິດຈະກຳ​ສະເຫຼີມສະຫຼອງ​ຄົບຮອບ 70 ປີ (19/12/1950-19/12/2020) ການ​ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ​ໃນ​ປີ 2020.

ຂ່າວທີ່ກ່ຽວຂ້ອງ