ຮຽກຮ້ອງ​ພາກສ່ວນ​ກ່ຽວຂ້ອງ​ສຸມ​ໃສ່​ປະຕິບັດ​ໂຄງການ​ບຳບັດ​ນ້ຳ​ເປື້ອນ

455 25 ມິ.ຖ. 2019 ຂ່າວໜ້າ​ໜຶ່ງ
ຮຽກຮ້ອງ​ພາກສ່ວນ​ກ່ຽວຂ້ອງ​ສຸມ​ໃສ່​ປະຕິບັດ​ໂຄງການ​ບຳບັດ​ນ້ຳ​ເປື້ອນ

    ບໍລິສັດ ລາວ​ໂປຼ​ເຈັກ ຮ່ວມ​ກັບ​ຫ້ອງ​ວ່າການ​ນະຄອນຫຼວງ​ວຽງ​ຈັນ (ນວ) ຈັດ​ສຳ​ມະ​ນາ​ກ່ຽວ​ກັບ​ໂອກາດ ແລະ ຄວາມ​ທ້າ​ທາຍ​ຂອງ​ການ​ບຳບັດ​ນ້ຳ​ເປື້ອນ​ໃນ ນວ ພາຍ​ໃຕ້​ໂຄງການ​ບຳບັດ​ນ້ຳ​ເປື້ອນ​ຂອງ ນວ ຂຶ້ນ​ວັນ​ທີ 28 ມິຖຸນາ 2019 ທີ່​ຫໍ​ປະຊຸມ​ແຫ່ງ​ຊາດ ໂດຍ​ເປັນ​ປະທານ​ຂອງ​ທ່ານ ອາດ​ສະພັງ​ທອງ   ສີ​ພັນ​ດອນ ຮອງ​ເຈົ້າ​ຄອງ ນວ ທ່ານ  ເອີ​ວິນ ອິມ​ເຮ ຄິ​​ສ ປະທານ​ບໍລິສັດ​ລາວ​ໂປຼ​ເຈັກ ທັງ​ເປັນ​ປະທານ​ໂຄງການ​ບຳບັດ​ນ້ຳ​ເປື້ອນ​ຂອງ ນວ ພ້ອມ​ດ້ວຍ​ບັນດາ​ຫົວໜ້າ​ກົມ ຮອງ​ກົມ ສະ​ຖາ​ບັນ ພະແນກການ ເຈົ້າເມືອງ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

     ການ​ສຳ​ມະ​ນາ​ຄັ້ງ​ນີ້​ເປັນ​ກິດຈະກຳ​ໜຶ່ງ​ທີ່ຢູ່​ພາຍ​ໃຕ້​ງານ​ອຸດສາຫະກຳ​ນ້ຳ ແລະ ນ້ຳ​ເປື້ອນ​ສາກົນ (LAO WATHER 2019) ເຊິ່ງ​ໂຄງການ​ບຳບັດ​ນ້ຳ​ເປື້ອນ​ຂອງ ນວ ທີ່​ໄດ້​ຮັບ​ເງິນ​ກູ້​ບໍ່​ມີ​ດອກ​ເບ້ຍ 100 ລ້ານ​ໂດ​ລາ​ສະຫະລັດ ຫຼື ປະມານ 870 ຕື້​ກີບ ຈາກ​ລັດຖະບານ​ຮົງ​ກາລີ ກຳລັງ​ຂຸ້ນຂ້ຽວ​ໃນ​ການຈັດຕັ້ງ​ປະຕິບັດ​ວຽກ​ງານ​ການ​ສຳ​ຫຼວດ​ອອກ​ແບບ ເພື່ອ​ແກ້​ໄຂ​ບັນຫາ​ນ້ຳ​ເປື້ອນ​ຂອງ ນວ ແນໃສ່​ໃຫ້​ສຳເລັດ​ຕາມ​ແຜນການ​ທີ່​ວາງ​ໄວ້​ຄື ເລີ່ມ​ກໍ່ສ້າງ​ປີ 2020 ແລະ ໃຫ້​ສຳເລັດ​ປີ 2023 ປັດຈຸບັນ​ນ້ຳ​ເປື້ອນ​ໃນ​ຕົວ​ເມືອງ ໂດຍ​ສະເພາະ ນວ ການ​ລະບາຍ​ນ້ຳ​ອອກ​ຈາກ​ຕົວ​ເມືອງ​ແມ່ນ​ລະບາຍ​ແບບ​ລວມ​ໃນ​ທໍ່​ດຽວ​ເຮັດ​ໃຫ້​ຍາມ​ແລ້ງ​ມີ​ແຕ່​ນ້ຳ​ເປື້ອນ​ທີ່​ໄຫຼ​ຕາມ​ຮ່ອງ​ສາທາລະນະ​ຕ່າງໆ ເກີດ​ມີ​ກິ່ນ​ເໝັນ ເຮັດ​ໃຫ້​ປະຊາຊົນ​ຜູ້​ທີ່ຢູ່​ໃກ້​ຄຽງ ພົບ​ຄວາມ​ຫຍຸ້ງຍາກ ບັນຫາ​ນີ້ ການ​ນຳ ນວ ແລະ ພະແນກການ​ທີ່​ກ່ຽວຂ້ອງ​ໄດ້​ຊອກ​ຫາ​ວິທີ​ແກ້​ໄຂ​ຕະຫຼອດ​ມາ.

     ທ່ານ ອາດ​ສະພັງ​ທອງ ສີ​ພັນ​ດອນ ກ່າວ​ວ່າ: ໂຄງການ​ນີ້​ເປັນ​ໂຄງການ​ບຸລິມະສິດ​ຂອງ​ລັດຖະບານ ກໍ​ຄື​ອົງການ​ປົກຄອງ ນວ ທີ່​ໄດ້​ເອົາໃຈໃສ່ ແລະ ໃຫ້​ຄວາມ​ສຳຄັນ ໂດຍ​ຫວັງ​ຢ່າງ​ຍິ່ງ​ວ່າ ໂຄງການ​ຈະ​ແກ້​ໄຂ​ບັນຫາ​ນ້ຳ​ເປື້ອນ​ໃນ​ຕົວ​ເມືອງ ແກ້​ໄຂ​ບັນຫາ​ສິ່ງແວດລ້ອມ​ທາງນ້ຳ​ໃນ​ຂອບ​ເຂດ ນວ ໂດຍ​ສະເພາະ​ບັນຫາ​ດ້ານ​ກິ່ນ​ເໝັນ​ຕາມ​ແຄມ​ຮ່ອງ​ລະບາຍ​ນ້ຳ​ສາທາລະນະ ແລະ ເພື່ອ​ສ້າງ​ໃຫ້​ຕົວ​ເມືອງ​ກາຍເປັນ​ຕົວ​ເມືອງ​ທີ່​ໜ້າ​ຢູ່​ເພື່ອ​ບັນລຸ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ​ຄື: ຮັບປະກັນ​ການ​ເຂົ້າ​ເຖິງ​ການ​ຊົມໃຊ້​ນ້ຳ ແລະ ການ​ຄຸ້ມ​ຄອງ​ນ້ຳ​ແບບ​ຍືນ​ຍົງ​ສຳລັບ​ໝົດ​ທຸກ​ຄົນ (SDG: 6) ແລະ ການ​ສ້າງ​ສິ່ງແວດລ້ອມ​ທີ່​ດີ​ໃນ​ຕົວ​ເມືອງ ແລະ ການ​ຕັ້ງ​ຖິ່ນ​ຖານ​ຂອງ​ປະຊາກອນ​ຢ່າງ​ກ້ວ​​າງ​ຂວາງ ປອດ​ໄພ ສະຫງົບ ແລະ ໝັ້ນຄົງ (SDG:11).

ຂ່າວທີ່ກ່ຽວຂ້ອງ