11% ຂອງ​​ປະຊາກອນ​ໃນ EU ຍັງ​ບໍ່​ທັນ​ໄດ້​ນຳ​ໃຊ້​ການ​ບໍລິການ​ອິນ​ເຕີ​ເນັດ

668 24 ມິ.ຖ. 2019 ຂ່າວຕ່າງປະເທດ
11% ຂອງ​​ປະຊາກອນ​ໃນ EU ຍັງ​ບໍ່​ທັນ​ໄດ້​ນຳ​ໃຊ້​ການ​ບໍລິການ​ອິນ​ເຕີ​ເນັດ

     ບົດ​ລາຍ​ງານ​ກ່ຽວ​ກັບ​ຕົວ​ເລກ​ບົ່ງ​ຊີ້ ຫຼື​ວ່າ​ດັດ​ສະ​ນີ ທາງ​ດ້ານ​ສັງຄົມ ແລະ​ເສດຖະກິດ​ດີ​ຈີ​ຕາ​​ລ 2019 ຂອງ​ສະຫະພາບ​ເອີ​ຣົບ (DESI) ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ມໍ່ໆມານີ້ ຊີ້​ໃຫ້​ເຫັນ​ວ່າ 11% ຂອງ​ຈຳນວນ​ປະຊາກອນ​ໃນ​ສະຫະພາບ​ເອີ​ຣົບ (EU) ຍັງ​ບໍ່​ທັນ​ໄດ້​ນຳ​ໃຊ້​ເຄືອ​ຂ່າຍ​ອິນ​ເຕີ​ເນັດ​ຈັກ​ເທື່ອ​ເລີຍ.

    ບົດ​ລາຍ​ງານ​ດັ່ງກ່າວ​ໃຫ້​ຮູ້​ວ່າ ຊາວ​ເອີ​ຣົບ​ປະມານ 83% ເຂົ້າ​ຊົມ​ເວບ​ໄຊ ຢ່າງ​ໜ້ອຍ​ໜຶ່ງ​ເທື່ອ​ຕໍ່​ອາທິດ ເປັນ​ການ​ເພີ່ມ​ຂຶ້ນ​ເມື່ອ​ທຽບໃສ່​ລະດັບ​ດຽວ​ກັນ​ນີ້​ທີ່ 75% ໃນ​ປີ 2014. ໃນ​ຂະນະ​ດຽວ​ກັນ ບົດ​ລາຍ​ງານ​ກໍ​ໃຫ້​ຮູ້​ວ່າ ບັນດາ​ວິ​ສາ​ຫະ​ກິດ ນັບ​ມື້​ນັບ​ຊຸກຍູ້​ທ່າ​ອ່ຽງ​ການ​ຫັນ​ເປັນ​ດີ​ຈີ​ຕາ​​ລ ແຕ່​ວ່າການ​ຄ້າ​ເອ​ເລັກ​ໂຕຣ​ນິກ ຍັງ​ພັດທະນາ​ຢ່າງ​ຊັກ​ຊ້າ.

    ເມື່ອ​ເບິ່ງ​ລວມ​ແລ້ວ ບັນດາ​ປະເທດ​ໃນ​ແຖວ​ໜ້າ​ຢູ່​ໃນ EU ຢູ່​ໃນ​ຂົງເຂດ​ດັ່ງກ່າວ ກໍ​ແມ່ນ ອຽກ​ລັງ ໂຮນ​ລັງ ແບນ​ຊິກ ແລະ​ດານ​ມາກ ໃນ​ຂະນະ​ທີ່ ຮົງ​ກາ​ຣີ ຣູ​ມາ​ນີ ບູນ​ກາ​ຣີ ແລະ​ໂປ​ໂລຍ ຍັງ​ຄົງ​ລາກທ້າຍ​ຢູ່.

     ບົດ​ລາຍ​ງານ​ກໍ​ຊີ້​ໃຫ້​ເຫັນ​ວ່າ ຄວາມ​ຕ້ອງການ​ໃນ​ດ້ານ​ທັກ​ສະ​ດ້ານ​ດີ​ຈີ​ຕາ​​ລ​ທີ່​ກ້າວໜ້າ ນັບ​ມື້​ນັບ​ເພີ່ມ​ຂຶ້ນ ຢູ່​ໃນ​ທຸກໆ​ຂົງເຂດ​ຂອງ​ພື້ນຖານ​ເສດຖະກິດ ແລະ ​ຈຳນວນ​ໜ້າ​ວຽກ​ທີ່​ຈັດ​ໃຫ້​ແກ່​ບັນດາ​ຊ່ຽວຊານ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ແລະ ​ການ​ສື່ສານ ເພີ່ມ​ຂຶ້ນ​ຕື່ມ 2 ລ້ານ​ຕຳແໜ່ງ ຢູ່​ໃນ EU ພາຍ​ໃນ​ເວລາ 5 ປີ​ທີ່​ຜ່ານ​ມາ. ເຖິງ​ຢ່າງໃດ​ກໍ​ຕາມ ກວ່າ 1/3 ຂອງ​ກຳລັງ​ແຮງ​ງານ ທີ່​ພວມ​ມີ​ວຽກ​ເຮັດ​ງານ​ທຳ​ຢູ່​ໃນ​ເອີ​ຣົບ ບໍ່​ມີ​ບັນດາ​ທັກ​ສະ​ດ້ານ​ດີ​ຈີ​ຕາ​​ລ​ໃນ​ຂັ້ນ​ພື້ນຖານ ເຖິງ​ແມ່ນ​ວ່າ​ໜ້າ​ວຽກ​ເກືອບ​ທັງ​ໝົດ ຕ່າງ​ກໍ​ຕ້ອງການ​ຢ່າງ​ໜ້ອຍ​ສຸດ​ແມ່ນ​ຕ້ອງ​ມີ​ທັກ​ສະ​ດ້ານ​ດີ​ຈີ​ຕາ​​ລ​ຂັ້ນ​ພື້ນຖານ​ກໍ​ຕາມ ແລະ ​ມີ​ພຽງ 31% ທີ່​ມີ​ທັກ​ສະ​ໃນ​ການ​ນຳ​ໃຊ້​ອິນ​ເຕີ​ເນັດ​ໄດ້​ເປັນ​ຢ່າງ​ດີ.

      ດັດ​ສະ​ນີ​ກ່ຽວ​ກັບ​ສັງຄົມ ແລະ ​ເສດຖະກິດ​ດີ​ຈີ​ຕາ​​ລ ເປັນ​ເຄື່ອງ​ວັດແທກ​ຄວາມ​ກ້າວໜ້າ​ຂອງ​ບັນດາ​ປະເທດ​ສະມາຊິກ EU ທີ່​ມີ​ຕໍ່​ສັງຄົມ ແລະ ​ພື້ນຖານ​ເສດຖະກິດ​ດີ​ຈີ​ຕາ​​ລ ຊຶ່ງ​ຕົ້ນຕໍ​ແມ່ນ​ອີງໃສ່​ຂໍ້​ມູນ​ຂອງ​ອົງການ​ສະຖິຕິ​ເອີ​ຣົບ (Eurostat).

ຂ່າວທີ່ກ່ຽວຂ້ອງ