ອິນ​ເດຍ ສ້າງຕັ້ງ​ກະຊວງ​ຊົນລະປະທານ ເພື່ອ​ຮັບ​ມື​ກັບ​ວິ​ກິດ​ການ​ແຫຼ່ງ​ນ້ຳ

653 24 ມິ.ຖ. 2019 ຂ່າວຕ່າງປະເທດ
ອິນ​ເດຍ ສ້າງຕັ້ງ​ກະຊວງ​ຊົນລະປະທານ ເພື່ອ​ຮັບ​ມື​ກັບ​ວິ​ກິດ​ການ​ແຫຼ່ງ​ນ້ຳ

    ເມື່ອ​ວັນ​ທີ 20 ມິຖຸນາ​ທີ່​ຜ່ານ​ມາ ລັດຖະບານ​ອິນ​ເດຍ ໄດ້​ປະກາດ​ການ​ສ້າງຕັ້ງ​ກະຊວງ​ຊົນລະປະທານ ຊຶ່ງ​ເປັນ​ກະຊວງ​ສ້າງຕັ້ງ​ຂຶ້ນ​ມາ​ໃໝ່ ເພື່ອ​ຮັບ​ມື​ກັບ​ວິ​ກິດ​ການ​ແຫຼ່ງ​ນ້ຳ ທີ່​ພວມ​ຜັນ​ແປ​ໄປ​ຢ່າງ​ໜັກໜ່ວງ ຢູ່​ໃນ​ປະເທດ​ດັ່ງກ່າວ ທີ່​ມີ​ປະຊາກອນ 1,3 ຕື້​ຄົນ​ນັ້ນ.

   ປະທານາທິບໍດີ ຣາມ ນັດ ໂຄ​ວິນ ຜູ້ນຳ​ຂອງ​ອິນ​ເດຍ ກ່າວ​ຕໍ່​ສະພາ​ແຫ່ງ​ຊາດ​ອິນ​ເດຍ ວ່າ​ຮູບ​ການ​ຕ່າງໆ​ໃນ​ການ​ອະນຸລັກ​ແຫຼ່ງ​ນ້ຳ​ແບບ​ດັ້ງເດີມ ພວມ​ຄ່ອຍໆ​ເສຍ​ຄຸນ​ປະໂຫຍດ​ໄປ ຍ້ອນ​ວ່າ​ບັນດາ​ໜອງ ບຶງ ພວມ​ຖືກ​ຖົມ​ເພື່ອ​ສ້າງ​ເຮີ​​ືອນ​ຢູ່. ປະທານາທິບໍດີ ຣາມ ນັດ ໂຄ​ວິນ ເວົ້າ​ວ່າ ກະຊວງ​ຊົນລະປະທານ ທີ່​ສ້າງຕັ້ງ​ຂຶ້ນ​ມາ​ໃໝ່​ນັ້ນ ຈະ​ຮັບຜິດຊອບ​ວຽກ​ງານ​ການ​ອະນຸລັກ ແລະ​ຄຸ້ມ​ຄອງ​ແຫຼ່ງ​ນ້ຳ ຢູ່​ໃນ​ອິນ​ເດຍ.

     ຕົວ​ເລກ​ສະຖິຕິ​ໃໝ່​ຫຼ້າ​ສຸດ ຊີ້​ໃຫ້​ເຫັນ​ວ່າ ໃນ​ປັດຈຸບັນ​ນີ້ ມີ​ປະຊາກອນ​ອິນ​ເດຍ​ກວ່າ 60% ຂຶ້ນ​ກັບ​ການເຄື່ອນໄຫວ​ຜະລິດ ແລະ​ແຫຼ່ງ​ນ້ຳ​ຝົນ. ປະຊາຊົນ​ອິນ​ເດຍ​ຫຼາຍ​ລ້ານ​ຄົນ ຕ້ອງ​ໄດ້​ຂຶ້ນ​ກັບ​ແຫຼ່ງ​ນ້ຳ ທີ່​ໃຊ້​ລົດ​ສະ​ແຕັກ​ໃນ​ການ​ຂົນສົ່ງ​ມາ​ໃຫ້ ຢູ່​ໃນ​ພື້ນ​ທີ່​ລັດ ທະມິນ ນາ​ດູ ຊຶ່ງ​ປະລິມານ​ນ້ຳ​ຝົນ​ເມື່ອ​ປີ​ກາຍ ຫຼຸດ​ລົງ​ເຖິງ 62%./.

 

ພາຍຸ​ທຳລາຍ​ພື້ນຖານ​ໂຄງ​ລ່າງ ເຮັດ​ໃຫ້​ບັນດາ​ປະເທດ​ທຸກ​ຍາກ​ເສຍ​ຫາຍ​ຫຼາຍ​ຮ້ອຍ​ຕື້​ໂດ​ລາ

     ບົດ​ລາຍ​ງານ​ສະ​ບັນ​ໜຶ່ງ ຂອງ​ທະນາຄານ​ໂລກ (WB) ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 19 ມິຖຸນາ​ທີ່​ຜ່ານ​ມາ ຊີ້​ໃຫ້​ເຫັນ​ວ່າ ບັນດາ​ປະເທດ​ທີ່​ທຸກ​ຍາກ​ຢູ່​ໃນ​ໂລກ ແບກ​ຫາບ​ຄວາມ​ເສຍ​ຫາຍ​ເປັນ​ມູນ​ຄ່າ​ຫຼາຍ​ຮ້ອຍ​ຕື້​ໂດ​ລາ​ສະຫະລັດ ຍ້ອນ​ລະບົບ​ພື້ນຖານ​ໂຄງ​ລ່າງ​ຖືກ​ທຳລາຍ​ຈາກ​ໄພພິບັດ​ທາງ​ທຳ​ມະ​ຊາດ ທີ່​ເກີດ​ຈາກ​ສະພາບ​ດິນ​ຟ້າ​ອາກາດ​ປ່ຽນແປງ.

     ບົດ​ລາຍ​ງານ​ດັ່ງກ່າວ​ຂອງ WB ໄດ້​ເວົ້າ​ເຖິງ​ສະພາບ​ທີ່​ລະບົບ​ໄຟຟ້າ ນ້ຳ ຖະໜົນ​ຫົນທາງ​ຖືກ​ທຳລາຍ ຍ້ອນ​ສະພາບ​ອາກາດ​ຮຸນ​ແຮງ ປະກອບ​ກັບ​ວຽກ​ງານ​ການ​ຄຸ້ມ​ຄອງ ແລະ​ການ​ສ້ອມ​ບຳລຸງ​ບໍ່​ໄດ້​ດີ ໄດ້​ເຮັດ​ໃຫ້​ບັນດາ​ປະເທດ​ທີ່​ມີ​ລາຍ​ຮັບ​ຕ່ຳ ແລະ​ລາຍ​ຮັບ​ປານ​ກາງ ເກີດ​ຄວາມ​ສູນ​ເສຍ​ເປັນ​ມູນ​ຄ່າ 390 ຕື້​ໂດ​ລາ​ສະຫະລັດ/ປີ.

      WB ໃຫ້ການ​ຄາດ​ຄະເນ​ວ່າ ເມື່ອ​ຮອດ​ປີ 2050 ຈະ​ມີ 2/3 ຂອງ​ຈຳນວນ​ປະຊາກອນ​ໂລກ ເຕົ້າໂຮມ​ກັນ​ຢູ່​ໃນ​ບັນດາ​ຕົວ​ເມືອງ ນັບ​ວ່າ​ເປັນ​ການ​ເພີ່ມ​ຂຶ້ນ 55% ເມື່ອ​ທຽບໃສ່​ຕົວ​ເລກ​ໃນ​ປັດຈຸບັນ. ໃນ​ຂະນະ​ດຽວ​ກັນ ລະບົບ​ພື້ນຖານ​ໂຄງ​ລ່າງ​ທີ່​ຮັບ​ໃຊ້​ໃຫ້​ແກ່​ໄຟຟ້າ ນ້ຳ ແລະ​ສາທາລະນະ​ສຸກ ເພື່ອ​ສະໜອງ​ຕອບ​ຕໍ່​ຄວາມ​ຕ້ອງການ​ໃນ​ການ​ດຳລົງ​ຊີວິດ ຂອງ​ປະຊາກອນ​ເຫຼົ່ານັ້ນ ຍັງ​ບໍ່​ທັນ​ໄດ້​ຮັບ​ການ​ກໍ່ສ້າງ.

     WB ກໍ​ໃຫ້​ຮູ້​ວ່າ ການເຄື່ອນໄຫວ​ລົງທຶນ ເພື່ອ​ເພີ່ມ​ທະວີ​ລະບົບ​ພື້ນຖານ​ໂຄງ​ລ່າງ ຈະ​ເຮັດ​ໃຫ້​ບັນດາ​ປະເທດ​ພວມ​ພັດທະນາ ສິ້ນ​ເປືອງ​ການ​ໃຊ້​ຈ່າຍ​ໄປ 4.200 ຕື້​ໂດ​ລາ​ສະຫະລັດ ໃນ​ໄລຍະ​ຍາວ.

ຂ່າວທີ່ກ່ຽວຂ້ອງ