ອິ​ສລັງ ເປັນ​ປະເທດ​ທີ່​ສະຫງົບ​ງຽບ​ທີ່​ສຸດ​ໃນ​ໂລກ

575 24 ມິ.ຖ. 2019 ຂ່າວຕ່າງປະເທດ
ອິ​ສລັງ ເປັນ​ປະເທດ​ທີ່​ສະຫງົບ​ງຽບ​ທີ່​ສຸດ​ໃນ​ໂລກ

    ບົດ​ລາຍ​ງານ​ດັດ​ສະ​ນີ​ກ່ຽວ​ກັບ​ສັນຕິພາບ​ທົ່ວ​ໂລກ​ປີ 2019 ລະບຸ​ວ່າ ອິ​ສລັງ ຮັກສາ​ຄວາມ​ເປັນ​ປະເທດ​ທີ່​ມີ​ສັນຕິພາບ​ທີ່​ສຸດ​ໃນ​ໂລກ​ເອົາ​ໄວ້ ລວມ​ເຖິງ​ຫຼາຍ​ປະເທດ​ໃນ​ເອີ​ຣົບ ທີ່​ຖືກ​ຈັດ​ຢູ່​ໃນ​ອັນ​ດັບ​ຕົ້ນ​ໃນ​ບັນຊີ​ບັນດາ​ປະເທດ ແລະ​ເຂດ​ແຄວ້ນ ທີ່​ມີ​ສັນຕິພາບ​ທີ່​ສຸດ​ໃນ​ໂລກ.

    ອິ​ສລັງ ຮັກສາ​ທີ່​ຕັ້ງ​ໃນ​ອັນ​ດັບ​ແຖວ​ໜ້າ​ຂອງ​ບັນຊີ​ດັ່ງກ່າວ ຕັ້ງແຕ່​ປີ 2008 ເປັນຕົ້ນ​ມາ ຍ້ອນ​ໄດ້​ຈາກ​ຈຳນວນ​ກໍລະນີ​ຂ້າ​ຄົນ​ຫຼຸດ​ລົງ ໃນ​ຂະນະ​ທີ່​ລະດັບ​ການ​ຈ່າຍ​ເງິນ ໃຫ້​ແກ່​ກອງ​ກຳລັງ​ຮັກສາ​ສັນຕິພາບ​ຂອງ​ສະຫະ​ປະຊາ​ຊາດ​ເພີ່ມ​ຂຶ້ນ.

    ຮອງ​ລົງ​ມາ​ເປັນ​ອັນ​ດັບ​ທີ​ສອງ ຢູ່​ໃນ​ການ​ຈັດ​ອັນ​ດັບ​ດັ່ງກ່າວ ກໍ​ແມ່ນ ນູ​ແວນ ເຊ​ລັງ ຊຶ່ງ​ໃນ​ບົດ​ລາຍ​ງານ​ດັ່ງກ່າວ ໄດ້​ຕີ​ລາຄາ​ວ່າ ນູ​ແວນ ເຊ​ລັງ ແກ້​ໄຂ​ໄດ້​ຫຼາຍ​ແງ່​ມູມ ແລະ ​ມີ “ຄວາມ​ສາມາດ​ຟື້ນ​ຟູ​ໄດ້​ໄວ” ໃນ​ເວລາ​ປະ​ເຊີນ​ກັບ​ໄພພິບັດ.

    ຫຼາຍ​ປະເທດ​ໃນ​ເອີ​ຣົບ ອັນ​ປະກອບ​ດ້ວຍ ໂອ​ຕະ​ຣິດ ປອກ​ຕຸຍ​ການ ແອັດ​ສະ​ປາຍ ແລະ ​ດານ​ມາກ ກໍ​ຖືກ​ຈັດ​ຢູ່​ໃນ​ໝວດ​ແຖວ​ໜ້າ ຂອງ​ບັນດາ​ປະເທດ ແລະ ​ເຂດ​ແຄວ້ນ​ທີ່​ມີ​ຄວາມ​ສະຫງົບ​ງຽບ​ທີ່​ສຸດ​ໃນ​ໂລກ. ໃນ​ຂະນະ​ດຽວ​ກັນ ອາ​ຟະ​ກາ​ນິດ​ສະຖານ ຖືກ​ຈັດ​ຢູ່​ໃນ​ອັນ​ດັບ​ສຸດ​ທ້າຍ​ຂອງ​ບັນຊີ​ການ​ຈັດ​ອັນ​ດັບ​ໃນ​ປີ​ນີ້ ໂດຍ​ຖືກ​ຈັດ​ຢູ່​ຖັດ​ລົງ​ມາ​ຈາກ​ຊີ​ຣີ.

    ບົດ​ລາຍ​ງານ​ດັດ​ສະ​ນີ​ສັນຕິພາບ​ທົ່ວ​ໂລກ​ຄັ້ງ​ທີ 13 ນີ້ ຈັດ​ທຳ​ໂດຍ​ສະ​ຖາ​ບັນ​ເສດຖະກິດ ແລະ​ ສັນຕິພາບ ທີ່​ມີ​ສຳນັກງານ​ຕັ້ງ​ຢູ່​ໃນ​ອົດ​ສະ​ຕຣາ​ລີ ໂດຍ​ເປັນ​ການ​ຈັດ​ອັນ​ດັບ​ກັບ 163 ປະເທດ ແລະ​ເຂດ​ແຄວ້ນ ທີ່​ອີງໃສ່​ດັດ​ສະ​ນີ​ດ້ານ​ສັນຕິພາບ. ບົດ​ລາຍ​ງານ​ດັ່ງກ່າວ ເປັນ​ການ​ຕີ​ລາຄາ​ເຖິງ​ຄວາມ​ສະຫງົບ​ງຽບ ຂອງ​ບັນດາ​ປະເທດ ແລະ​ເຂດ​ແຄວ້ນ ຕາມ​ມາດຖານ​ຕ່າງໆ ເຊັ່ນ ລະດັບ​ການ​ໃຊ້​ຈ່າຍ​ໃຫ້​ແກ່​ວຽກ​ງານ​ການ​ທະຫານ ຈຳນວນ​ຜູ້​ເສຍ​ຊີວິດ​ຍ້ອນ​ການ​ພິພາດ ແລະ ​ການ​ກໍ່​ການ​ຮ້າຍ ຄວາມ​ເສຍ​ຫາຍ​ທາງ​ດ້ານ​ເສດຖະກິດ ທີ່​ເກີດ​ຈາກ​ຄວາມ​ຮຸນ​ແຮງ ດັ່ງນີ້​ເປັນຕົ້ນ.

ຂ່າວທີ່ກ່ຽວຂ້ອງ