ນະຄອນຫຼວງ​ຮ່າ​ໂນ້ຍ ຕ້ອນຮັບ​ນັກ​ທ່ອງ​ທ່ຽວ​ສາກົນ​ໄດ້​ກວ່າ 3,3 ລ້ານ​ເທື່ອ​ຄົນ

510 24 ມິ.ຖ. 2019 ຂ່າວຕ່າງປະເທດ
ນະຄອນຫຼວງ​ຮ່າ​ໂນ້ຍ ຕ້ອນຮັບ​ນັກ​ທ່ອງ​ທ່ຽວ​ສາກົນ​ໄດ້​ກວ່າ 3,3 ລ້ານ​ເທື່ອ​ຄົນ

   ພະ​ແນກ​ທ່ອງ​ທ່ຽວ​ນະຄອນຫຼວງ​ຮ່າ​ໂນ້ຍ (ຫວຽດນາມ) ແຈ້ງ​ໃຫ້​ຮູ້​ວ່າ ນັບ​ແຕ່​ຕົ້ນ​ປີ​ມາ​ຮອດ​ເວລາ​ນີ້ ນັກ​ທ່ອງ​ທ່ຽວ​ເຂົ້າ​ໄປ​ທ່ອງ​ທ່ຽວ​ໃນ​ພື້ນ​ທີ່​ນະຄອນ​ຮ່າ​ໂນ້ຍ ບັນລຸ​ເກືອບ 14,4 ລ້ານ​ ເທື່ອ​ຄົນ ເພີ່ມ​ຂຶ້ນ 9,5% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ​ກາຍ ໃນ​ນັ້ນ ນັກ​ທ່ອງ​ທ່ຽວ​ຈາກ​ຕ່າງປະເທດ ບັນລຸ​ກວ່າ 3,3 ລ້ານ​ເທື່ອ​ຄົນ ເພີ່ມ​ຂຶ້ນ 10,6%.  ທີ່​ໜ້າ​ໃສ່ໃຈ​ກໍ​ຄື​ວ່າ ຍອດ​ລາຍ​ຮັບ​ຈາກ​ນັກ​ທ່ອງ​ທ່ຽວ ຄາດ​ວ່າ​ບັນລຸ 50.242 ຕື້​ດົ່ງ (ເງິນ​ຫວຽດນາມ) ເພີ່ມ​ຂຶ້ນ​ເກືອບ 30% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ​ກາຍ.

    ເພື່ອ​ເພີ່ມ​ທະວີ​ການ​ໂຄສະນາ​ກ່ຽວ​ກັບ​ຮູບ​ພາບ​ນັ້ນ ເມື່ອ​ບໍ່​ດົນ​ມາ​ນີ້ ຄະນະ​ກຳມະການ ປະຊາຊົນ​ນະຄອນ​ຮ່າ​ໂນ້ຍ ໄດ້​ລົງ​ນາມ​ບົດ​ບັນທຶກ​ຊ່ວຍ​ຈຳ ກ່ຽວ​ກັບ​ການ​ຮ່ວມ​ມື​ກັບ​ເຄືອ​ຂ່າຍ​ດ້ານ​ການ​ຂ່າວ​ຂອງ​ໂທລະພາບ​ໃຊ້​ສາຍ​ຂອງ CNN ໃນ​ການ​ໂຄສະນາ​ກ່ຽວ​ກັບ​ນະຄອນ​ຮ່າ​ໂນ້ຍ ຜ່ານ​ຊ່ອງ CNN ສາກົນ ໃນ​ໄລຍະ​ປີ 2019-2024. ໃນ​ໄລຍະ​ເວລາ​ດັ່ງກ່າວ CNN ສືບຕໍ່​ນຳ​ສະເໜີ​ກ່ຽວ​ກັບ​ນະຄອນ​ຮ່າ​ໂນ້ຍ ໂດຍ​ອີງໃສ່​ປຶກ​ແຜ່ນ​ກ່ຽວ​ກັບ​ຄຸນຄ່າ​ດ້ານ​ວັດທະນະທຳ ປະຫວັດສາດ ແລະ​ຊາວ​ເມືອງ​ໃນ​ນະຄອນຫຼວງ (ຮ່າ​ໂນ້ຍ) ຊຶ່ງ​ເປັນ​ຈຸດ​ເຊື່ອມ​ຈອດ ໄປ​ຍັງ​ປາຍທາງ​ແຫ່ງ​ອື່ນໆ​ຢູ່​ໃນ​ຫວຽດນາມ.

    ໃນ​ຂະນະ​ດຽວ​ກັນ ພະ​ແນກ​ທ່ອງ​ທ່ຽວ​ນະຄອນ​ຮ່າ​ໂນ້ຍ ກໍ​ຜັນ​ຂະຫຍາຍ ບັນດາ​ເນື້ອ​ໃນ​ສັນຍາ ລະຫວ່າງ​ພະ​ແນກ​ທ່ອງ​ທ່ຽວ ກັບ​ສະຫະ​ບໍລິສັດ​ການບິນ​ຫວຽດນາມ ກ່ຽວ​ກັບ​ການ​ສົມທົບ​ຈັດ​ຕັ້ງ​ການ​ຕ້ອນຮັບ​ຄະນະ​ນັກ​ສຳ​ຫຼວດ​ຕ່າງໆ​ຈາກ​ຍີ່ປຸ່ນ ອົດ​ສະ​ຕຣາ​ລີ ແລະ​ ເອີ​ຣົບ ໃນ​ປີ 2019; ສົມທົບ​ຈັດ​ຕັ້ງ​ລາຍການ “ລະດູ​ໜາວ​ເອີ​ຣົບ”  ຢູ່​ໃນ​ເຂດ​ເຮືອນ​ບາດ​ຢາກ-ສວນ​ດອກ​ໄມ້​ຫຼີ​ທ້າຍ​ໂຕ. ນອກຈາກ​ນັ້ນແລ້ວ ພະ​ແນກ​ທ່ອງ​ທ່ຽວ​ນະຄອນ​ຮ່າ​ໂນ້ຍ  ກໍ​ຊຸກຍູ້​ການ​ສ້າງ​ຜະລິດ​ຕະ​ພັນ​ການທ່ອງທ່ຽວ​ໃນ​ເຂດ​ຊານເມືອງ ໂດຍ​ອີງໃສ່​ການ​ຂຸດ​ຄົ້ນ​ຄວາມ​ສາມາດ​ບົ່ມ​ຊ້ອນ​ດ້ານ​ການທ່ອງທ່ຽວ ຢູ່​ເມືອງ​ຕ່າງໆ.

    ທ່ານ ເຈິ່ນ​ດຶກ​ຫາຍ ຫົວໜ້າ​ພະ​ແນກ​ທ່ອງ​ທ່ຽວ​ນະຄອນ​ຮ່າ​ໂນ້ຍ ເວົ້າ​ວ່າ ໃນ​ລະຍະ​ເວລາ​ຕໍ່ໜ້າ​ນີ້ ຂະແໜງ​ການທ່ອງທ່ຽວ​ຈະ​ສືບຕໍ່​ສ້າງ ແລະ​ ຍົກ​ສູງ​ຄຸນ​ນະ​ພາບ​ຂອງ​ບັນດາ​ຜະລິດ​ຕະ​ພັນ​ການທ່ອງທ່ຽວ​ດ້ານ​ວັດທະນະທຳ ນັ້ນ​ກໍ​ຄື​ປາຍທາງ​ການທ່ອງທ່ຽວ ຕິດ​ພັນ​ກັບ​ມໍລະດົກ ຮ່ອງຮອຍ​ຂອງ​ງານ​ບຸນ ບ້ານ​ອາຊີບ ອາຫານ ກະສິກຳ ທ່ອງ​ທ່ຽວ​ຊຸມ​ຊົນ.

ຂ່າວທີ່ກ່ຽວຂ້ອງ