ຫິວຈົນມືດບອດ

2.333 21 ມິ.ຖ. 2019 ນານາສາລະ

    ທຳ​ມະ​ຊາດ​ຂອງ​ມະ­ນຸດ ເມື່ອ​ຮູ້­ສຶກ​ຫິວ​ກໍ​ພະ­ຍາ­ຍາມ​ຊອກ​ຫາ​ແນວ​ມາ​ບັນ­ເທົາ​ຄວາມ​ຫິວ ຕ່າງ​ແຕ່​ວ່າ​ຄົນ​ໃນ​ສັງ­ຄົມ​ສ່ວນ​ໜຶ່ງ​ກຳ­ລັງ​ມີ​ຄວາມ​ຫິວ​ຄ້າຍ­ຄື​ກັນ ເພາະ​ຊີ­ວິດ​ຕົກ​ຢູ່​ພາຍ​ໃຕ້​ກະ­ແສ​ຂອງ​ໂລກ​ບໍ­ລິ­ໂພກ​ນິ­ຍົມ ຜູ້​ຜະ­ລິດ ຫຼື ນັກ­ທຸ­ລະ­ກິດ ແລະ ນັກ​ລົງ­ທຶນ​ກໍ​ຈະ​ຊອກ​ວິ­ທີ​ມາ​ລໍ້​ກິ­ເລດ​ຂອງ​ມະ­ນຸດ​ໃຫ້​ຮູ້­ສຶກ​ຫິວ​ຕະ­ຫຼອດ​ເວ­ລາ ເພາະ​ຫຼົງ​ຖື​ຄະ­ຕິ​ວ່າ ການ​ມີ​ວັດ­ຖຸ​ລາ­ຄາ​ແພງ​ມາ​ສະ­ໜອງ​ຕັນ­ຫາ​ຂອງ​ຕົນ​ນັ້ນ ຄື​ສຸດ​ຍອດ​ປາດ​ຖະ​ໜາ.

    ໂລກ​ຂອງ​ການ​ບໍ­ລິ­ໂພກ​ຄົນ​ເຮົາ​ຈຶ່ງ​ມີ​ຄວາມ­ສຸກ​ຍາກ ແຕ່​ທຸກ​ງ່າຍ ເພາະ​ຫຼົງ​ຢຶດ​ຕິດ​ກັບ​ວັດ­ຖຸ​ເປັນ​ສິ່ງ​ສະ­ໜອງ​ຕອບ​ຄວາມ­ສຸກ ເຊິ່ງ​ກຳ­ລັງ​ເປັນ​ກະ­ແສ​ໃຫຍ່​ໃຫ້​ຄົນ​ໃນ​ສັງ­ຄົມ​ດີ້ນ­ຮົນ​ສະ­ແຫວງ­ຫາ ເຊິ່ງ​ເອີ້ນ​ໄດ້​ວ່າ ຄວາມ­ສຸກ 2 ປະ­ເພດ​ຄື: 1) ຄວາມ­ສຸກ​ອາ­ໄສ​ວັດ­ຖຸ​ພາຍ​ນອກ 2) ຄວາມ­ສຸກ​ທີ່​ບໍ່​ເອື່ອຍ​ອີງ​ກັບ​ວັດ­ຖຸ​ພາຍ​ນອກ ດັ່ງ­ນັ້ນ ເມື່ອ​ຄົນ​ໃນ​ສັງ­ຄົມ​ສ່ວນ​ໃຫຍ່​ຍອມ­ຮັບ​ຄ່າ​ນິ­ຍົມ​ຂອງ​ການ​ບໍ­ລິ­ໂພກ ແຕ່­ລະ­ຄົນ​ຈຶ່ງ​ເຫັນ​ວ່າ​ໃຜ​ມີ​ລົດ​ໃຫຍ່​ລາ­ຄາ​ແພງ ແລະ ເຮືອນ​ຫຼັງ​ງາມ​ຢູ່​ເປັນ​ກຽດ​ສູງ​ສຸດ​ຂອງ​ຊີ­ວິດ ເຊິ່ງ​ຫາກ​ເວົ້າ​ເຖິງ​ຕົ້ນ­ຕໍ​ຄ່າ​ນິ­ຍົມ​ດັ່ງ­ກ່າວ ກໍ​ເກີດ​ຂຶ້ນ​ຫຼັງ​ຈາກ​ນະ­ໂຍ­ບາຍ​ເປີດ​ກວ້າງ...

    ຄົນ​ໃນ​ສັງ­ຄົມ​ສ່ວນ​ໃຫຍ່​ຈຶ່ງ​ມຸ່ງ​ເນັ້ນ​ຄວາມ­ສຸກ​ຈາກ​ກາມ​ມະ​ຄຸນ 5 ປະ­ການ ຄື: ຮູບ ສຽງ ກິ່ນ ລົດ​ຊາດ ແລະ ສຳ­ຜັດ​ທາງ​ກາຍ... ເອີ້ນ​ວ່າ​ມີ​ຄວາມ­ສຸກ​ຈາກ​ການ​ເສບ​ບໍ­ລິ­ໂພກ​ວັດ­ຖຸ​ຕ່າງໆ ເມື່ອ​ຄວາມ­ສຸກ​ຖືກ​ຜູກ​ພັນ​ກັບ​ວັດ­ຖຸ​ພາຍ​ນອກ​ຫຼາຍ​ຄົນ ຈຶ່ງ​ສະ­ແຫວງ­ຫາ​ວັດ­ຖຸ​ໃຫ້​ຫຼາຍ​ຂຶ້ນ ເຊິ່ງ​ຫຼາຍ​ກໍ­ລະ­ນີ​ນຳ​ມາ​ເຊິ່ງ​ຄວາມ​ຂັດ​ແຍ້ງ ແລະ ຈິດ­ໃຈ​ຄັບ­ແຄບ​ຈົນ​ພາ­ໃຫ້​ເກີດ​ມີ​ທ່າ​ອ່ຽງ​ຄະ­ດີ​ຟ້ອງ​ຮ້ອງ​ເລື່ອງ​ຊັບ​ສິນ​ມາ​ເປັນ​ອັນ​ດັບ​ສອງ​ຮອງ​ຈາກ​ຄະ­ດີ​ຢ່າ​ຮ້າງ​ໃນ​ສານ ເຫັນ​ໄດ້​ວ່າ​ແຕ່­ລະ­ຄົນ​ຕ່າງ​ກໍ​ພະ­ຍາ­ຍາມ​ພັດ­ທະ­ນາ​ຄວາມ​ສາ­ມາດ​ໃນ​ການ​ສະ­ແຫວງ­ຫາ​ສິ່ງ​ທີ່​ມາ​ສະ­ໜອງ​ຄວາມ​ຕ້ອງ­ການ​ຂອງ​ຕົນ​ເພື່ອ​ໃຫ້​ມີ​ຄວາມ­ສຸກ​ກັບ​ວັດ­ຖຸ.

    ສັງ​ລວມ​ໄດ້​ວ່າ: ຫາກ​ຄົນ​ໃນ​ສັງ­ຄົມ​ຍັງ​ຕົກ​ຢູ່​ໃນ​ລັກ­ສະ­ນະ​ຫິວ​ກະ­ຫາຍ​ຄວາມ​ສຳ­ເລັດ ຫຼື ໂຫຍ​ຫາ​ວັດ­ຖຸ​ມາ​ບຳ­ເລີ​ຄວາມ​ຕ້ອງ­ການ​ຫຼາຍ​ກໍ­ລະ­ນີ​ຈຶ່ງ​ກາຍ​ເປັນ­ຄວາມ​ມືດ​ບອດ ເພາະ​ຄວາມ​ຫິວ​ດັ່ງ­ກ່າວ​ຖືກ​ຄອບ​ງຳ​ດ້ວຍ​ຄວາມ​ໂລບ​ທາງ​ຊັບ​ສິນ​ເງິນ​ຄຳ ແລ້ວ​ກໍ​ເຂົ້າ​ສູ່​ຄ່າ​ນິ­ຍົມ ແລະ ຂະ​ບວນ​ການ​ແຂ່ງ­ຂັນ​ກັນ­ຫາ​ຈົນ​ເກີດ​ຄວາມ​ຂັດ​ແຍ້ງ​ແບບ​ບໍ່​ຮູ້­ສຶກ​ໂຕ ແລະ ສິ່ງ­ແວ­ດລ້ອມ​ກໍ​ຖືກ​ທຳ­ລາຍ ເພາະ​ເຫັນ­ແກ່​ໄດ້ ນີ້​ກໍ​ແມ່ນ​ທີ່​ມາ​ຂອງ​ຄວາມ​ເຫັນ­ແກ່​ໂຕ.

ຂ່າວທີ່ກ່ຽວຂ້ອງ