ຂ່າວຫຼ້າສຸດ

ອາວຸດ​ນີວ​ເຄຼຍ​ຢູ່​ໃນ​ໂລກ​ມີ​ໜ້ອຍ​ກວ່າ​ເກົ່າ ແຕ່​ທັນ​ສະໄໝ​ກວ່າ​ເກົ່າ

508 21 ມິ.ຖ. 2019 ຂ່າວຕ່າງປະເທດ
ອາວຸດ​ນີວ​ເຄຼຍ​ຢູ່​ໃນ​ໂລກ​ມີ​ໜ້ອຍ​ກວ່າ​ເກົ່າ ແຕ່​ທັນ​ສະໄໝ​ກວ່າ​ເກົ່າ

     ຂໍ້​ມູນ​ຢູ່​ໃນ​ບົດ​ລາຍ​ງານ ຊຶ່ງ​ສະ​ຖາ​ບັນ​ຄົ້ນຄວ້າ​ສັນຕິພາບ​ສາກົນ ສະ​ຕົກ​ໂຮມ (SIPRI) ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 17 ມິຖຸນາ​ນີ້ ລະບຸ​ວ່າ ຈຳນວນ​ຫົວ​ກະ​ສູນ​ນີວ​ເຄຼຍ ຢູ່​ໃນ​ໂລກ ໃນ​ປີ 2018 ໄດ້​ຫຼຸດ​ລົງ ແຕ່​ວ່າ​ປະເທດ​ຕ່າງໆ​ພັດ​ພວມ​ຫັນ​ສາງ​ອາວຸດ​ດັ່ງກ່າວ​ຂອງ​ຕົນ​ໃຫ້​ທັນ​ສະໄໝ.

     SIPRI ໃຫ້​ຮູ້​ວ່າ ໃນ​ເວລາ​ຕົ້ນ​ປີ 2019 ສ ອາ​ເມ​ຣິ​ກາ ຣັດ​ເຊຍ ອັງກິດ ຝຣັ່ງ ຈີນ ອິນ​ເດຍ ປາ​ກິດ​ສະຖານ ອິດ​ສະ​ຣາ​ແອນ ແລະ ​ສປປ ເກົາຫຼີ ມີ​ອາວຸດ​ນີວ​ເຄຼຍ ລວມ​ເຂົ້າກັນ​ທີ່​ປະມານ 13.865 ຫົວໜ່ວຍ ໜ້ອຍ​ກວ່າ 600 ຫົວໜ່ວຍ ທຽບໃສ່​ຈຳນວນ​ທີ່​ມີ​ໃນ​ເວລາ​ດຽວ​ກັນ​ຂອງ​ປີ 2018 ແຕ່​ວ່າ​ທຸກໆ​ປະເທດ​ທີ່​ຄອບ​ຄອງ​ອາວຸດ​ນີວ​ເຄຼຍ ພວມ​ດຳເນີນ​ການ​ຫັນ​ອາວຸດ​ຂອງ​ຕົນ ໃຫ້​ທັນ​ສະໄໝ.

     ທ່ານ ຊານ​ນອນ ຄີ​​ລ ຜູ້ອຳນວຍການ​ໂຄງການ​ຄວບ​ຄຸມ​ອາວຸດ​ນີວ​ເຄຼຍ ທີ່​ຂຶ້ນ​ກັບ SIPRI ຊຶ່ງ​ເປັນ​ຜູ້​ໜຶ່ງ​ທີ່​ຂຽນ​ບົດ​ລາຍ​ງານ​ດັ່ງກ່າວ ເວົ້າ​ວ່າ ໂລກ​ພວມ​ເຫັນ​ການ​ຄ່ອຍໆ​ຫຼຸດ​ລົງ ໃນ​ດ້ານ​ປະລິມານ​ອາວຸດ​ນີວ​ເຄຼຍ ແຕ່​ພັດ​ທັນ​ສະໄໝ​ກວ່າ​ເກົ່າ.

    SIPRI ໃຫ້​ຮູ້​ວ່າ ສາເຫດ​ທີ່​ເຮັດ​ໃຫ້​ປະລິມານ​ອາວຸດ​ນີວ​ເຄຼຍ ຄ່ອຍໆ​ຫຼຸດ​ລົງ ໃນ​ຊຸມ​ປີ​ຫຼັງໆ​ມາ​ນີ້ ຕົ້ນຕໍ​ແມ່ນ​ຍ້ອນ​ວ່າ ສ ອາ​ເມ​ຣິ​ກາ ແລະ ​ຣັດ​ເຊຍ ຊຶ່ງ​ສອງ​ປະເທດ​ມີ​ຍອດ​ປະລິມານ​ອາວຸດ​ນີວ​ເຄຼຍ ກວມ​ເອົາ​ເຖິງ​ກວ່າ 90% ຂອງ​ທົ່ວ​ໂລກ​ນັ້ນ ໄດ້​ປະຕິບັດ​ຄຳ​ສັນຍາ​ຢູ່​ໃນ​ສົນທິສັນຍາ​ວ່າ​ດ້ວຍ​ການ​ຕັດ​ຫຼຸດ​ອາວຸດ​ໂຈມ​ຕີ​ຍຸດ​ທະ​ສາດ​ໃໝ່ (New START) ທີ່​ໄດ້​ລົງ​ນາມ​ເມື່ອ​ປີ 2010 ແລະ​ມີ​ຜົນ​ບັງຄັບ​ໃຊ້​ນັບ​ວັນ​ທີ 5 ກຸມພາ ປີ 2011 ເປັນຕົ້ນ​ມາ ປະກອບ​ກັບ​ການ​ຍົກເລີກ​ພວກ​ຫົວ​ກະ​ສູນ​ເກົ່າ ຕັ້ງແຕ່​ຍຸກ​ສົງຄາມ​ເຢັນ.

     ສົນທິສັນຍາ​ດັ່ງກ່າວ​ໄດ້​ກຳນົດ​ວ່າ ແຕ່​ລະ​ຝ່າຍ​ຕັດ​ຫຼຸດ​ສາງ​ອາວຸດ​ນີວ​ເຄຼຍ​ຂອງ​ຕົນ​ລົງ ເພື່ອ​ວ່າ​ຫຼັງ​ຈາກ 7 ປີ ແລະ​ໃນ​ອະນາຄົດ ບໍ່​ໃຫ້​ຍອດ​ປະລິມານ​ລູກ​ສອນ​ໄຟ​ຂ້າມ​ທະວີບ ລູກ​ສອນ​ໄຟ​ນຳ​ວິຖີ​ທີ່​ຕິດ​ຕັ້ງ​ໄວ້​ເທິງ​ກຳປັ່ນ​ດຳ​ນ້ຳ ແລະ ​ເຮືອບິນ​ຖິ້ມ​ລະເບີດ​ຂະໜາດ​ໜັກ ມີ​ເກີນ 700 ຫົວໜ່ວຍ ກໍ​ຄື​ຫົວ​ກະ​ສູນ 1.550 ຫົວ ແລະ ​ຖານ​ຍິງ 800 ຖານ ທີ່​ໄດ້​ຜັນ​ຂະຫຍາຍ ແລະ ​ບໍ່​ທັນ​ໄດ້​ຜັນ​ຂະຫຍາຍ. ສົນທິສັນຍາ​ນັ້ນ ຍັງ​ບັງຄັບ​ໃຫ້ ສ ອາ​ເມ​ຣິ​ກາ ແລະ ​ຣັດ​ເຊຍ ແລກປ່ຽນ​ຂໍ້​ມູນ​ຂ່າວສານ 2 ເທື່ອ​ໃນ​ແຕ່​ລະ​ປີ ກ່ຽວ​ກັບ​ປະລິມານ​ຫົວ​ກະ​ສູນ ແລະ​ພາຫະນະ​ໃຊ້​ໃນ​ການ​ຍິງ.

 

ຂ່າວທີ່ກ່ຽວຂ້ອງ